1 PETERÙT 3 - Ala Ane Wene Ket Mene Warogo Wo'ninapike Wene

Hìmìap inagagwì inagonì inom inoabùt hagatì logousak wene

^1-2 Ati hak, hit hìmì aike hinagonì Ala ane wanhì'lek mene hinane yogoisogoin oba hùk. We, hinoabùt hineil lopok hogo hinagonì inane hologo hagatenem, it en ineileken hisìlìk, Ala werekwe wìrìk ane wanuagalùk, hinokawerek hinagonì lopok inawe a'ma kìlìk inane hologo hagatì logoino o.

³ Hinoba hanorogo, hinogat etakwe mene hesik wanhì logogùp. Atì re, hinesi lalhìk, hinalìlìke emas mene wanhìk, su hano oko apik mene labetìk, ìkì logogup o.

⁴ At he, hinoba hanorogo re, hinetaùken hesik hinago mene atì wanhì logoino. Ati re, hinoabùt motok logogin mene enago welagìk, lìoksek welagìk, ìkì logoino o. Hinoabùt Ala eilhanem atì'nogo hagatenem, at a'la nen hano motok akikerek atìat o.

⁵ Holoat it hìmì Ala a'logomi mene inetaùken Ala ba hìpìrìk logolìk, inoba hanorogo atì'nogoat inagonì lopok inawe a'ma logolìk inane hologo hagatì lagaukwa.

⁶ At he Sara atì'nogoat agùn Aberaham awe a'ma logolìk ane hologo hagatì logolìk, hai he, “Ì, noe,” ìlùk watì lagaike. Hit yogotak hogo re, apùnì nen hinayùk asuagalùk hagatenem hinayùk agì'lek hano hagatì lagep halok he, at Sara eagwìat welagep o.

⁷ Nen, hit ap hogo re, Ala oabùt hano nen hinagagwì hinom higit hogoat hineluk motok logouagalùk esewerek hikikomo welagep atì nen, hit sapan ikenem Ala nen hinane asuk holhì'lek kamo inogo ìlùk, hinagagwì hinom hano logolìk, hina'la nen he, “Hìmì inomame lek,” ìlùk hùthìlìk, hinane agauk hogo yogoisìgìk, hinetawìrinapìk, ìkì logoino o.

“Hinerùgì hinagaiya'lak hinom netawì-hetawìrogo hagatì logoino,” ìlùk yogoisasike wene

⁸ Wene atì elùgùn warogo mel yogohisak. Hit hinebe obogat hina'la nen he, “Ninebe Ala againapùrì ninerùgì ninagaiya'lak ninom,” ìlùk hinetaùken hutik logolìk, hina'la omakeat mene akìgìk, hinetaùken omakeat mene ebetìk, ìkì logoino. Atì'nogo ìkì logolìk, hinokawerek en hogorakìgì'lek, hinetaùken seberogo logolìk, hit-hit netawì-hetawìrogo hagatì logoino.

⁹ Apùnì aike nen hit weak hagathinapenem, hit en oko weagarinapùp o. Nen, inane sagan weak wokhikikenem, hit en oko hinane sagan wogisagùbat o. Oko re, Ala nen inebe hanorinabuagalùk, ayoko hìkì logoino. Hobuk at en hano mene wokhisagalùk hinayoko hesike atì nen, hit en oko hano mene wogisìkì logoino.

^10-12 Wene atì hesik mel isukwa: “Apùnì inoabùt ninopase Etagepogot a'la walok akikerek mene higit hogo hagarì'lùgì mene hùgì, at eileken inoba logolìk, sapan ayoko hikenem inane asuk holherek o. Meneat he, it weak hagarì'lùgì mene hùgì, elokoken age warisikerek o, atì nen, sa nen, An neluk aike inom logoile, ninhùp-nanhùbat hano mene nek haga'laganem hìkì logoile, ìlùk logou walok halok he, ameli ba weak wene ìgì'lek welagìk, ape ba nen apeliak apùnì aike lalinapì'lek welagìk, weak mene apotma heraksalùk hano mene nek hagatìk, oabùt apùnì aike inom lapuk hogo hano welagaikarek atì mene esinethìlìk omamerogo hagarìk lagìk, ìkì logousak o,” ìlùk Ala ane ba helal waganogo hesukwa.

¹³ Hit he, hano hagatì logouogolùk akiluk hogo hagatì lagep halok he, sa nen weagathinabusak nogo. Weagathinabusak lek o.

¹⁴ Meneat he, higit hogo hagatenem weagathinapa halok, yì aik tì aik hìkì logolìk, hina'la hai hakìkì logoino. Hinayùk asuagalùk hagathinapenem, hinayùk arìk hina'la wenesùgì uan horo ebetùp o.

¹⁵ Hit en he, Karìsùt agaugeratì logolìk, “Ninoe Etagepogot at o,” ìlùk hinetaùken oba nen hogoratì logoino. Hogoratenem, it aike nen hinok hinoba wanhì logolìk he, “Hano asigin, ìlùk oba eberek welagep atì nahalok,” ìlùk yogohisikenem he, oko wene tùkùm hogo yogoisogoin mene hina'la eberek motok logolìk,

¹⁶ hinane lìok hogo hai warogo yogoisìkì logoino. Atì'nogo yogoisìkì logolìk, hina'la nen he, “An wene noba selek o,” ìlùk akìkì logolìk, Karìsùt hinom hutik logolìk, hano hagatenem, apùnì nen hinabok weak palugun mene atì ineileken hisìlìk inekalì asugun o.

¹⁷ Hit weak hagatenem hinoba yì aik tì aik hinoabùt oba hìkì logogun halok weak. Meneat he, hit en hano hagatenem, Ala nen, “It yì aik tì aik hoak,” ìlùk akike halok enek he, hano o.

¹⁸ Nit apùnì weak hagatorek atì hesik nineki elùgùn oba, at Karìsùt hobuk wa'lagì'lek logoigìlùk omake hesigat wa'lagaike. Ninebe Ala oba wo'nisek lagalùk he, at oabùt higit hagaterek mene nen, nit ninoabùt kolo hagatorek mene hesik wa'lagaike atì. Ebe nit apùnì mene atì wasukwama wa'lagaike meneat he, areagùn mene atì Ala nen eluguthesike atì.

¹⁹ Eluguthesikomo re, it aike inamokareke hele warek were'ma wene yogoisa lagaike.

²⁰ Inamokareke atì inebe re, hageat at Nu nen i so Wùto kolek, Ala oabùt hano nen serisek werek kolegat he, wene wanhì'lek heraksìlìk weak hagato motok were'ma i hu nen inoasikomo wa'lagaukwa mene atì. Atì'nogo inoato kolegat he, it aike so a'la kìlìk welagaukwa mene, inebe 8 nen hamùlùgat i hu atì ba telinapike atì.

²¹ It i ba telinapike atì inomanem, nit yogotak ima pogorek atì ba telninaperok o. I ba telninaperek atì re, ima pelakhiaikenem, ninogat i atì ba sobalagarek atì ba telninaperek hùk. At he, ninetaùken oba nen wene ninoba selek asuagalùk Ala ayoko hikenem, Yesùt Karìsùt wa'lagaikesik eluk agaike atì ba telninaperek o.

²² At ebe eluk agaikesik he, pogot oba lagasikesik, Ala era'lu kain logolìk, malaikat Ala nen yoko pelaksa wagarek mene amanogo mel, inogogì kaintek mene mel, inomame apik mene mel, hagisek welagarek o.