1 PETERÙT 2 - Ala Ane Wene Ket Mene Warogo Wo'ninapike Wene

“Yesùt ebe helep o tik watarek atì hakeat o,” ìlùk yogoisasike wene

¹ Atì nen, hit weak hagatì lagep mene atì motok heraksìlìk logoino o. Apùnì aike lalinapìk, hinetaùken pìre hagatìk, ua palhìk, hinapeliak en apùnì aike inabok weak palhìk, ìkì lagep atì, heraksìkì logoino o.

^2-3 Yì mene tì mene etuk mìkhìlìk, hano egarek atì hak, ninoe Etagepogot oabùt hano hegep atì nen he, omalik ketago mene eilak nele nen niko motok welagaikarek atì hak, wene hano wene hinetaùken atì ba wurik asumo hanothinabuagalùk, wene atìat hinamolorogo wanho motok logoino o.

⁴ At ebe helep hake eluk welagarek mene ìlùk he, oba we'no. Apùnì nen he, “Helep atì weak,” ìlùk hebisasukwa meneat he, Ala nen he, “Helep yì motok hano meneat,” ìlùk wenago hesike.

⁵ Atì'nogo hesikomo, hit hinebe helep eluk welagarek atì mene hake logolìk, at oba we'no o. At oba waganem, Ala nen he, at okawerek awì wùrogo hikoak. At awì wùrì'mo, hinebe Ala eseweregat Yesùt Karìsùt hinom hutik logolìk, Ala a'la hanorogo ako waretì logou hak, hinetaùken wogotì logoino o.

⁶ Atì mene hesik Ala nen mel isike: “An nen, helep hano motok mene wenagasogo o Sion atoma o tik aike warogo hìgì yì hani! Hit apùnì hinebe lopok hinetaùken at oba hìpìrìk logogun halok he, hinekalì hogoin lek o,” ìlùk isikomo helal waganogo hesukwa atì.

⁷ Hit hinetaùken at oba hìpìrìk mene nen he, “At hano motok,” ìlùk hùthìkì lagep atì, Meneat he, it aike inetaùken at oba hìpìrethìgì'lek mene hesik enek he, mel isike: “It ap tukang o helep mene wùtarek mene nen, o ebe wùtì logolìk he, Helep yì weak, ìlùk heraksasukwa mene atì obùleat ya'lagama o,” ìlùk isike.

⁸ Nen, aike mel isike: “Apùnì helep atì ba inesok a'lip temuk hogo warìlìk, tukwak hogo laga logogun o,” ìlùk isike. Atì'nogo tukwak hogo laga logogun atì re, it en hano wene atì, “Eberogoat,” ìlùk hùthogoin lek atì nen, Ala nen akasike hagat, warìlì'lùgì atì.

⁹ Mene re, hit enek he, “At Ala nen hano haga'ninabì'logo,” ìlùk abok yogoisìlìk loagalùk, hinebe o mùmmo were'ma, at ebe elalinat lìa motok welagarek oba wesuagalùk hinayoko hesikesik, hit at againapùrì asuagalùk wenakhinapìk, at ebe esewerek kaintek logouagalùk menhikìgìk, hinùkùl etage at okawerek ùkùl etage mene salogo hikìgìk, “Nokawerek nagainapùrì,” ìlùk hinebe wokhinapìk, isike atì.

¹⁰ Hit alep he, Ala hinom inapik welagagip meneat he, yogotak hinebe Ala againapùrì agep o. Nen, alep he, hit en he, “Ala ninebe etawì werek,” ìlùk hinokot welagagip meneat he, yogotak “Ninebe Ala etawì nen wo'ninapikomo welago,” ìlùk hinelu agep o.

“Hiboabùt Ala atitigeke logolìk, Tì'nogo hagatì logoino,” ìlùk yogoisasike wene

¹¹ Nerùgì nagaiya'lak. Hinebe netawì e. Hit hinebe ap pok apùnì inaua pùgùlogo lìlìk, atoma logolìk he, yì mene tì mene hina'la nen kagalogo lagai wìrìk, hinetaùken nen nikenem walok akegesep mene atì re, selei mene nen inoatarek atì hak hinebe weagathinabiglìlùk, hina'la nen kagalogo lagai wagarek mene atì heraksìkì logouageip ìlùk yogohisìkì lagi atì o.

¹² It apùnì etakwe mene Ala inokot mene hinom logolìk, it en he, hit weak hagatì lagep mene salek, “It weak hagarì'lùgì o,” ìlùk hinabok weak ìkì logolìgat he, hit hinoabùt hano hagatenem ineileken hisìkì logopik he, apùnì nen at Ala ebe hobuk waganem hogorasuagalùk hit hinoabùt higit hogo hagatì logoino o.

^13-15 At Ala nen he, hit mel hagatì logouagalùk a'la akasike. Apùnì inetaùken lek mene nen wene inokot logolìk ìlì'lùgì atì, inekalì arìk inane lek asuagalùk, hit hinoabùt hano hagatì logouagalùk akasike atì nen he, ninoe Etagepogot hesik, apùnì nen pemerintah mene kain logouagalùk menhisasukwa mene atì, inebe obogat inawe a'ma kìlìk inane hologo hagatì logoino o. Atì'nogo hagatì logolìk, Kaisat etagepogot pemerintah mene kain esin hake atì mel, at en it gubernurlak apùnì weak hagatenem ùkùm inoba hìgìk, hano hagatenem hogorinapìk, hagatì logouagalùk inayoko hìlìk laksa wagarek mene atì mel, inane hologo hagatì logoino o.

¹⁶ Atì'nogo logolìk, hit en he, “Nit weak mene awe a'ma were'ma, Ala nen hele hikalogo ninalepma hinasikomo welago,” ìlùk, weak aike hinagasogo hagatì logogùp. We, hinoabùt Ala atìtigeke logolìk hagasusak mene higit hogoat hagatì logoino o.

¹⁷ Apùnì obogat hinetawì nek logolìk hinane agauk hogo yogoisìkì logoino o. Atì'nogo yogoisìkì logolìk, hinerùgì hinagaiya'lak Ala againapùrì mene aike hinetaùken hutik logoino o. Logolìk he, Ala ebe hinayùk hago welagìk, nen, Kaisat etagepogot pemerintah mene inoe kain atì hogoratìk, ìkì logoino o.

“Hit en Karìsùt oabùt wanusak,” ìlùk yogoisasike wene.

¹⁸ Hit aike, hinogogì inatitigeke welagep mene atì, it inawe a'ma logolìk, inoabùt hano lìoksek mene hecik enek hinayùk hogo inane hologo hagatì logousak hùk. At he, inoabùt kolo mene inomat hinaytùk hogo inane hologo hagatì logoino.

¹⁹ Hit en weak aike hagatì'le'maat he, hinogogì nen yì aik tì aik hagathinapo kolek, hina'la nen he, “Ala a'la walok mene hagasusak,” ìlùk hùthìlìk, hinepe morogo logogun halok he, at en hanothinabigin o.

²⁰ Meneat he, hit en weak hagasugun oba, oko tùgì hinoato kolek, hinepe morogo logogun halok, hogothinabusak nogo? Lek o. Hinoabùt enat usak o. Meneat he, hano hagatenem, yì aik tì aik hagathinapo kolegat, hinepe morogo logogun halok he, Ala oabùt hano nen hanothinabiginat o.

²¹ At Karìsùt ebe hit hesik yì aik tì aik hìlìk hìlìk wa'lagaike atì nen, hit hogo re, at oabùt waganogo yì aik tì aik hoagalùgat Ala nen hinayoko hesike atì.

²² At en he, “Weak aike hagatì'legat. Nen, apeliak ikenem, apùnì aike inasuk holhì'legat o.”

²³ Apùnì nen inane sagan weak wokhiko kolegat, at en oko ane sagan wogisìgì'legat. It en yì aik tì aik hagato kolegat, at en, “An hobuk oko aike hinoasigin,” ìlùk yogoisìkì lagaike legat. At he, “We, Ala nen ùkùm inoba hìgìk, kotìk, higit hogo igin mene werek o,” ìlùk, at eki ba hìlìk, ane oko ìgì'lek kamo ìkì lagaike.

²⁴ Nit ninoabùt weak hagatì lagagu mene atì, apùnì wa'larìk yì mene tì mene hagatarek lek atì hak, nit weak mene heraksìlìk, nineluk logolìk Ala walok mene hagatì logouagalùk, nit weak hagatì lagagu mene korogo, at Karìsùt oba hakasikomo, ebe e ba menogo hìlìk wasukwa atì. At ebe libi'-labak hogo wasukwa atì ba, hit hanothinapike atì.

²⁵ Hit alep he, wam topa wam kwe nong asi lagarek atì hak, nong asi laga lagagip meneat he, yogotak at Ala nen, ap hinebe hakhisek logolìk sethisek welagarek mene oba hinapotkwe wokhisek hika wagama welagep o.