1 KORÌTÙT 9 - Ala Ane Wene Ket Mene Warogo Wo'ninapike Wene

Ala nen apùnì inayoko hesike mene lopok hagatì logousak wene

¹ An nalepma welagìrek lek nogo? At Ala nen nayoko hìlìk lakhani wagaike lek nogo? Ninoe Etagepogot Yesùt ebe an neileken hìgì'lek nogo? Ninoe Etagepogot neperak hutik logolìk hagatì mene, hinebe welagep atì lek nogo?

² It apùnì aike nen an hesik ìkì logolìk he: “At Paùlùt Karìsùt en ayoko hìgì'lek o,” ìlùk iko halok he, hit he, atì'nogo usak lek. An nayoko hìlìk lakhani wagaikomo wagagì ìlùk he, hit hinebe ninoe Etagepogot hinom hutik welagep atì ba enagat hùthanusak o.

³ Apùnì nen nabok weak iko kolek, an nen yì'nogo yogoisìkì lagì:

⁴ “An Ala eyabu hagatìrek atì hesik, neki oko sùpùrùk wo'netìk, i wo'netìk, ikenem, helasak lek nogo? Helasagat o.

⁵ Nen, it ap aike Ala nen inayoko hìlìk laksa wagaike mene mel, ninoe Etagepogot agoromì opolik mene mel, at Kepat mel, inagagwì wogisek nùgì atì hak, an enek he, nagwe Ala a'logo mene wolok nìkì logousak lek nogo?

⁶ Ì a, at he, it atì yabu wanhì'lek welegat werek kolek, an Parenapat neperak ninaligat enek yì mene tì mene nineki ba nen set kalogo herakasak akegep?

⁷ Ap tentara inogogì kaintek en inagoromì weim yabuagalùk inayoko hikenem, it inokawerek en ineki oko heragasogo aike yaparek nogo? Lek o. Nen it aike nen anggur awì yakhìlìk he, eken ìtenem aike inokawerek nekarek lek nogo? Ì a, at he, it aike inako topa wam apigat hesogo logolìk he, eilak amusu aike inokawerek nekarek lek nogo? Nekaregat o,” ìlùk yogoisìkì lagì.

⁸ An wene ìgì atì re, nit apùnì nen hagatorek mene oba lìrogo ìgì meneat he, ebe Ala nen wene ninasuk wasike wene a'nogo ba atì eperak higit ìgì'lek nogo? Isikomo nenat ìgì o.

⁹ Wene Ala nen ninasuk wasike wene a'nogo ba, at Musa nen mel yogoisasike: “Apùnì nen sapi wam esok en gandum ogat lìlìbùk warogo eken ìbìluagalùk hìlìk he, eken aike at nanogo ìlùk, ape hele te'mek hogo homasusak lek o. Aike noagalùk herakhìkì logoino,” ìlùk yogoisasike atì, at Ala nen wam sapi wam atì etaùken hutik en isike nogo? Lek o.

¹⁰ Nit apùnì nen yabu wanhìk, eken palhìk, ìkì logolìk he: “An aike negein o,” ìlùk nina'la hai hakìkì logolìk yabu wanhìk, eken palhìk, ogorek atì nen, wene atì nit hesigat isikomo helal waganek werek o.

¹¹ Awì yatarek hak he, wene hinetaùkenma yasugu atì. Nen, ebe tasu hak he, hit en yì mene tì mene kweangma mene wo'nisamo re, atì apik nogo? Lek o. Elok hogo wo'nisasak meneat o.

¹² Hit en, it aikeagùn mene atì'nogo wogisasak higirat halok he, nit ebe esewerek mene aike wo'nisasak lek nogo? “Wo'nisasak higirat o,” ìlùk yogohisìkì lagì. Atì'nogo meneat he, nit aike wo'nisoagalùk ìkì lago lek. Hano wene Karìsùt hagasike wene atì, nit en yogoisìlìk nikenem akwe palinogo ìlùk he, yì mene tì mene aike wo'nisasak ìlùk ìgì'lek ninepe morogo heraksìkì lago.

¹³ It ap Ala awì wùrìk esewerek logolìk yabu atoma hagatì logolìk, inapùrùk he, Ala awìla mene nekarek ìlùk he, hinokot nogo? Nen, Ala ako warerìk etu loletarek oba loletì logolìk atì'nogoat o'moko kùrogo it nekarek ìlùk he, hinokot nogo?

¹⁴ Atì hagat he, at ninoe Etagepogot en ninasuk watì logolìk he: “It apùnì nen hano wene yogoisìlìk laganem he, it aike nen hano wene atì alisik hogo inapùrùk melagisasagat o,” ìlùk isike atì.

¹⁵ Atì'nogo isike meneat he, an he, hano wene alisik hogo atì'nogo wanhì'lek welagìrek. An hesik atì'nogo wo'nesuagalùk wene yì helal waganogo lakhei wagì hùk. An atì'nogo wo'nesuagalùk hagatì'lek welagì ìlùk he, hogorakìkì lagì mene yì re, at aike nen nane legethousak he, nabit. An nebe wa'lasumo re, hano.

¹⁶ Hano wene yogoisìlìk nìgìrek atì re, yogoisasak meneat yogoisìlìk nìgìrek atì nen he, hogorakasak motok lek o. Yogoisìgì'lek kamo umo re, eige. Nokawerek nebe alema'lasusak o.

¹⁷ An atì'nogo yogoisìlìk nìkì lagì atì, an na'la nen kagalogo yogoisìlìk nìkì logoilema re, neki oko wo'netenem, wanhì logoile o. Mene re, an na'la nen kagalhì'lek were'ma, Ala nen nayoko hìlìk esewerek hanhike atì nen oko lek yogoisìlìk nìgìrek atì.

¹⁸ Halok he, an neki oko nena mene wo'nesusak. Atì re, ebe yì. Oko wo'nesu hak, hano wene atì oko lek welegat yogoisìlìk nìkì logolìk na'la hano welagì atì. Atì'nogo yogoisikenem he, oko wo'nesusak higit meneat he, atì'nogo aike wo'netenem wanhì'lek welagìrek atì hano.

¹⁹ An he, apùnì inatitigeke welagì hùk. Nalepma welagì meneat he, apùnì inebe apigat Karìsùt hesik woginabigìlùk he, apùnì obogat inatitigeke arik nìgìrek o.

²⁰ Apùnì Yahuri mene Karìsùt hesik woginabigìlùk he, an noabùt Yahuri mene inoabùt waganogo hagatì lagì. Nen, apùnì wene Ala nen ninasuk wasike wene at Musa nen yogoisasike wene a'nogo, an hologo logousak lek meneat he, it aike hologo welagaikarek mene Karìsùt hesik woginabigìlùk he, an noabùt wene atì nasuk hologo welagìrek mene salek hagatì lagì o.

²¹ Nen, it aike wene Ala nen ninasuk wasike wene at Musa nen yogoisasike wene atì, inasuk holharek lek mene aike Karìsùt hesik woginabigìlùk he, an noabùt wene atì holhì'lek salek welagìat o. Atì re, an wene Karìsùt en ninasuk wasike wene atì hologo motok logolìk he, wene Ala nen ninasuk wasike wene atì an holhì'lek welagìrek hùk. Hologo welagìregat o.

²² It apùnì inetaùken akut mene Karìsùt hesik woginabigìlùk he, an noabùt he, netaùken akut mene salek welagì. It apùnì obogat inoabùt hagatarek lopok hagatì lagì atì re, it mene aike telinabigìlùk atì'nogo hagatì lagì o.

²³ An it apùnì obogat inoabùt atì'nogo waganogo hagatì lagì atì re, it ninom hano mene esewerek asuogolùk hano wene atì hesigat hagatì lagi o.

²⁴ Sa awewerek sa awewerek lùogolùk he, inebe logoin mene atì, inebe obogat lagaikarek meneat he, omakeragùn tak lìlì'mo oko hano mene wogotarek ìlùk hinokot nogo? Atì hagat, oko hano mene wokhisoagalùk he, humusek hinomamerogo laga logoino o.

²⁵ Inawe lek asinogo ìlùk, yì mene tì mene herakhìlìk inokawerek en tegelharek atì. It he, hepok weak asigin meneat wogisoagalùk tegelharek atì. Meneat he, nit he, weak asigin lek mene wo'nisoagalùk yì hesik tì hesik tegelhì lago atì.

²⁶ Atì nenat, an laga lagì atì re, ka legein he, yùgùnat laga lagì hùk. Nelokwe tùkùm laga lagì o. Atì hagat he, apùnì ineki yìkìlogo at aike nen aike watìk, aike nen aike watik, ìkì logolìk alemarogo wele'ma inoatarek lek atì hak, an we yùgùnat hagatì lagì hùk.

²⁷ It apùnì aike hano asuagalùk hano wene yogoisìlìk nìkì lagì meneat he, nokawerek herakhanumo nong asinogo ìlùk, nokawerek en nebe wara hak, netaùken ning hogo sebelìgìk, apùnì inawe a'ma logolìk inane hologo welagaikarek hak, an nebe nane awe a'ma logoigìlùk nasuk warìgìk, ìkì lagì o.