1 KORÌTÙT 8 - Ala Ane Wene Ket Mene Warogo Wo'ninapike Wene

Tùgì hareken ako waretarek wene

¹ Hit en he, “Tùgì hareken ako waretarek atì re, wene ero yì'nogo ìlùk ninelu nek,” egesep atì re, nit hùthogo. Mene re, wene atì'nogo inelu logolìk he, inokawerek en hogorakagarek meneat he, apùnì inebe inetawì logolìk hagatarek enek he, inetaùken wurigerinaparek atì.

² At aike a'la nen akìkì logolìk he: “An wene arat nelu,” ìlùk akìlì'logo meneat he, at tùkùm hogo elu asusak meneat he, oan okot logolìk ìlì'logo o.

³ Atì'nogo meneat he, at aike nen, Ala ebe etaùken hutik halok he, Ala nen at atì ebe elu o.

⁴ Tùgì hareken ako waretarek atì re, tùgì hareken kweangma mene yoma ebe lek meneat, ìlùk ninelu. Ninopase Ala ebe omakeat. Aike lek o.

⁵ It apùnì yoma nen ìkì logolìk he, “Nit he, ninopase oba hìpìrìk welagorek ninawesa mene yìat o,” ìlùk he, pogot oba mene hesik mel, kweangma mene hesik mel, ìlì'lùgì atì. Atì'nogo egarek atì, inawesa mene apigat were'ma re, etagewerek he, apigat werek o.

⁶ Atì'nogo meneat he, nit ninopase Ala ebe omakeat. Aike lek. Yì mene tì mene obogat at en elalhikomo re, ninebe at hesigat welago. Atì'nogoat, ninoe Etagepogot Yesùt Karìsùt ebe omakearat o. Yì mene tì mene obogat Ala nen elalhike atì, ebe at Yesùt en elalhikesik, ninebe at enat telninapikomo nineluk welago.

⁷ Meneat he, wane atì apùni obogat inelu hùk. It aike alebat he, inetaùken tùgì hareken oba hìpìrìk logolìk hogoratì lagaukwasi'mo nogo nen he, hobuk wam tùgì hareken ako warek mene kùrìk nìkì logolìk, oba eberì'lùgì. Inetaùken akut logolìk, nikenem he, ina'la weak agarek atì.

⁸ Yì mene tì mene nekarek mene atì nen Ala oba wo'nisek legein lek o. Nit nìkì'lek kamo ugun halok he, nong asugun lek. Nen, nogoin halok he, aike sabùrogoin legat.

⁹ Hit yùgùnat nasagat meneat he, nikenem en, it apùnì like inetaùken akut mene weak asinogo ìlùk he, hinepe hebelogo logoino.

¹⁰ Hat aike nen he, wene atì helu logolìk o wam tùgì hareken ako waretare'ma kìlìk hebe hù'larìk negein halok he, at aike etaùken akut mene nen eileken hììlìk a'la nen he: “An aike negeinat o,” ìlùk a'la kagalasigin lek nogo? Kagalarìk negeinat o.

¹¹ Hat en: “An wene nelu o,” ìlùk atì'nogo hagasigin atì ba, hagaiyak aike etaùken akut mene hesik Karìsùt wa'lagaike meneat he, hat en weagathegein atì.

¹² Hinerùgì hinagaiya'lak inetaùken akut mene ineil salogo weagarinapìk, inetaùken menetìk, ìkì lagep atì re, Karìsùt ebeat eil salogo hagatì lagep o.

¹³ Halok he, nekarek mene atì ba nen an nagaiyak ebe weagatheinogo ìlùk he, at hesik he, an wam tùgì hareken ako warek mene kùrìk nìkì'lek motok herakhìkì logogin o.