1 KORÌTÙT 7 - Ala Ane Wene Ket Mene Warogo Wo'ninapike Wene

Hìmìap waganek welagaikarek wene

¹ Hit en wene helal waganogo noba lakhei wagep a'nogo, oko yogohisak o. Ap en he, hìmì wanhì'lek elege welegat logousak.

² Meneat he, pailak haksìkì logoinogo ìlùk he, ap inagagwì lopok waganek welagìk, hìmì inagonì lopok waganek welagìk, usak o.

³ Inagonì nen he, inagagwì lopok, nen, inagagwì nen he, inagonì lopok, inom nogo ìkì logousak meneat ìkì logouak o.

⁴ Nen, hìmì inebe re, inokawerek esewerek hùk. Inagonìat esewerek o. Nen, ap inebe atì'nogoat he, inokawerek esewerek hùk. Inagagwìat esewerek o.

⁵ Halok he, hìmìap hinom nogo ìkì logousak. Heksek logogùp o. Sapan ìkì logouogolùk halok he, mel usak: “Elama hesik welegat logouok,” ìlùk weneane hinom ìlìk en, sapan ìkì logopik he, hobuk hinom lapuk hogo logoino. Hinetaùken sebelusak mea atì nen, Ibilit en hina'la kagalinogo ìlùk he, hinom lapuk hogo logousak atì.

⁶ Wene yogohisìgì atì re, nane ning hogo yogohisìgì hùk. We, hinasuk watì o.

⁷ Apùnì obogat he, an hìmì lek welegat welagìrek hak logoumo re, hano, ìlùk akìgìrek meneat he, at Ala nen he, ninoabùt lopok, at aike oabùt hùnogoat, at aike oabùt hùnogoat, wo'nisasike atì nenat he, atì'nogo mea o.

⁸ Hit ap aike, hinagagwì lek mene mel, hit hìlìmìkìrùgì mene mel, hìmì soge mene mel, an welagìrek hakeat logoumo re, hano, ìlùk yogohisìgì atì.

⁹ Hinetaùken sebelusak mea aga halok he, hinagagwì lopok, hinagoni lopok, woginapì logoino. Hinoba aiyage lagaikenem yùgùnat haksamo re, weak o. Hinagonì lopok, hinagagwì lopok, waganek logoumo re, hano.

¹⁰ Nen, hit ap aike, hinagagwì werek mene mel, hit hìmì aike hinagonì werek mene mel, an nen hinasuk wasigin o. Mene re, an nen hùk. Ninoe Etagepogot en hinasuk wasigin o. Hit hìmì hinagonì heraksalùk he, tauk hogo wùlùpùp o.

¹¹ Hat he aike hagùn heraksalùk wùlùpen halok he, ap aike wanhì'lek welegat logoino. Welegat logousak mea aga halok he, hagùn alep mene atìat wanino. Nen, hit ap hogo re, hinagagwì heraksagùbat o.

¹² Hit aike hesik, wene ninoe Etagepogot en ìgì'lek mene, an nenat yogohisak o. Hat ap Ala aput mene nen, hagwe etaùken Karìsùt oba hìpìrethìgì'lek mene waganek welagen mene, at en he, “Nagùm neperak lapuk hogo logousak,” ìlùk akikerek halok he, hano. Hat en, hagwe atì hebisasak motok lek o.

¹³ Nen, hat he Ala a'logo mene nen, hagùn etaùken Karìsùt oba hìpìrethìgì'lek mene waganek welagen mene, at ap atì nen he, “Nagwe neperak lapuk hogo logousak,” ìlùk akikerek halok he, hagùn atì heraksalùk tauk hogo wùlùbusak motok lek o.

¹⁴ At he Ala a'logo mene nen, agùn etaùken Karìsùt oba hìpìrethìgì'lek mene, waganek eperak hano lapuk hogo welagaikarek atì ba, agwe nen agùn ebe Ala hesik hisìlì'logo. Nen, atì hak at ap Ala aput mene nen, agwe etaùken karìsùt oba hìpìrethìgì'lek mene waganek eperak hano lapuk hogo welagaikarek atì ba, agùn nen agwe ebe Ala hesik hisìlì'logoat. Atì'nogo inebe Ala hesik hisìgì'lek logoilepma re, hinagainapùrì inebe Ala meneat he, etakwe mene logoilep o.

¹⁵ At ap etaùken Karìsùt oba hìpìrethìgì'lek mene atì agwe heraksike halok he, heraksoagat o. Nen, at he etaùken Karìsùt oba hìpìrethìgì'lek mene atì agùn heraksaluk tauk hogo wùlùpe halok he, wùlùbuagat o. Ala nen he, ninetaùken hapuk hogo hano logouagalùk ninayoko hesike atì nen he, atì'nogo hagasugun halok, ùkùm hinoba housak lek o.

¹⁶ Hat he yì, ha'la nen he, “Hobuk nagùn telusak mea asigin,” ìlùk akìkì lagen a? Nìkì'nogo nen helu. Hat ap yì, ha'la nen he, “Hobuk nagwe telusak mea asigin,” ìlùk akìkì lagen a? Nìkì'nogo nen helu.

“Ala nen ninebe lopok ninayoko hesike higit hogo hagatì logousak,” ìlùk yogoisasike wene

¹⁷ Hit he, Ala nen hinebe lopok hinayoko hikenem he, ninoe Etagepogot en he: “Hat aike yì'nogo logoino. Nen, hat aike tì'nogo logoino,” ìlùk yogohisasike hagat logoino. Atì'nogo logouagalùk, an nen Ala againapùrì o ya ta atogotarek mene obogat inasuk watìrek o.

¹⁸ At aike ogat ekalima mene arat palek were'ma, Ala nen ayoko hesikesik oba nen, hobuk ogat pale'lek mene negen asigìlùk aike hagasusak mea o. Nen, at aike re, ogat ekalìma mene pale'lek were'ma Ala nen ayoko hesikesik oba nen, hobuk ogat atì'nogo palusak legat o.

¹⁹ Inogat inekalìma mene atì'nogo palek logousak inom, pale'lek logousak inom, atì esin hùk. Lek o. Ebe esin he, Ala ane hologo hagatì logousak atìat o.

²⁰ Apùnì inebe lopok Ala nen inayoko hikenem welagaukwa hagat logouak o.

²¹ Hat aike, apùnì inatitigeke were'ma Ala nen hayoko hesike halok he, “An tì'nogo welagì mene,” ìlùk, atì hesik wenesùgì ebetùn. Hobuk he, halepma hagauogolùk halok he, “Nabìt,” ùgùn. “Atì hano,” ìlùk halepmaat a'no.

²² At aike apùnì inatitigeke were'ma re, ninoe Etagepogot en ayoko hesikomo eperak hutik logolìk he, at agot alepmaat agasik werek. Nen, at aike re, alepma were'ma ayoko hesikomo, ninoe Etagepogot atitigekeat agasik werek o.

²³ Hit hinebe Ala nen oko motok katok hogo palogo wokhinapike atì nen he, apùnì inatitigeke agùp o.

²⁴ Halok he, nerùgì nagaiya'lak. Hit hinebe lopok Ala nen hinayoko hikenem welagagip hagat, Ala hinom hutik logolìk atì'nogoat logoino o.

Ap inagagwì lek mene mel, hìmì inagonì lek mene mel, hesik isike wene

²⁵ Wene hìlìmìkìrùgì salisik mene hesik he, “Tì'nogo hagatì logoino,” ìlùk ninoe Etagepogot en ninasuk watì'lek meneat he, wene an na'la akìkì lagì mene yì yogohisak. Nane yogohisegein yì re, hit hina'la nen he, “Ala nen Paùlùt ebe etawì nen wanhikomo oabùt hùpùn mene nen yogonisike atì eberogoat,” ìlùk hina'la akano o.

²⁶ Nit o yogotak weak welago ya ba logolìk he, ninebe lopok welago hak logousak o, ìlùk akìkì lagì.

²⁷ Hit ap aike hinagagwì werek mene halok, lologo heraksùokgolùk hagatùp o. Nen, hit aike hinagagwì lek mene halok, hìmì woginabuogolùk heraginapùp o.

²⁸ Meme re, hit ap en hinagagwì helegep halok he, atì weak hagatep ìlùk usak lek o. Nen, hit hìlìmìkìrùgì salisik mene nen hinagonì helegep halok he, atì weak hagatep usak legat o. Meneat he, woginabìk, yì ekin tì ekin hogoin atì nen he, atì'nogo hanogo ìlùk ìgì o.

²⁹ Nerugì nagaiya'lak. Yogotak he, o wùrep oba asi lagosik welago. Ya ba logolìk be, ap inagagwì waganek mene atì, waganek lek mene negen logouak, ìlùk akìgìrìk en yogohisìgì o.

³⁰ Apùnì aike le arì'lùgì mene halok he, le arì'lùgì lek mene negen logouak. Nen, it aike ina'la hai hakìlì'lùgì mene halok he, hai hakili'lflgl lek mene negen logouak. Nen, it aike yì mene tì mene oko palogo helìlì'lùgì mene atì, ese agì'lek mene negen logouak.

³¹ Nen, it aike kweangma yì mene tì mene helagarek mene atì, helìgì'lek mene negen logouak. Atì'nogo ìgì atì re, yì mene tì mene kweangma welagarek mene obogat arat lek arì'logo atì nen ìgì o.

³² Hit he, hìmì hesik, ap hesik, hina'la wenesùgì ebetì'lek logouageip en ìlùk yogohisìgì o. Atì'nogo ìgì atì re, ap inagagwì lek mene nen he, ninoe Etagepogot a'la hano asuagalùk, at hesik esinethìlìk ina'la ebetarek o.

³³ Atì'nogo meneat be, ap inagagwì waganek mene atì re, inagagwì ina'la hano asuagalùk, yì mene tì mene kweangma mene esinethìlìk ina'la ebetarek o.

³⁴ Atì'nogo ebetì logolìk he, inetaùken pìre agarek atì. Hìlìmìkìrùgì inagonì lek salisik mene atì re, inebe mel, inetaùken mel, ninoe Etagepogot hesik logouogolùk he, at hesik esinethìlìk ina'la ebetarek atì. Mene re, it hìmì inagonì werek mene atì re, inagonì ina'la hano asuagalùk, it hesik yì mene tì mene kweangma mene esinethìlìk ina'la ebetarek atì.

³⁵ Wene atì'nogo yogohisìgì atì re, wam kopì kelogo hagarek hak, “Yì hagasusak lek. Tì hagasusak lek,” ìluk wene palhì hùk. We, hit hano asuagalùk yogohisìgì o. Halok, hit he, hinetaùken we mene oba ebetì'legat, ninoe Etagepogot hesik higit hogo hanorogo hagato motok logouageip ìlùk ìgì.

³⁶ Ap aike nen helekerek salisik mene eperak lopolek logolìk, a'la nen he: “An yì'nogo weak welagì. He atì ebe wanigin o,” ìlùk oba aiyage lagaike halok he, at a'la atì'nogo akikesi'mo re, he ebe wanusak o. Atì'nogo wanigin atì weak hùk. Hano o.

³⁷ Mene re, at aike, apùnì aike nen a'la kagalhenem he, okawerek etaùken wurigat logolìk, etaùken okawerek en sebelogo nen: “Lek o. An nagwe neperak lopolek mene atì, atì'nogoat logouak,” ìlùk a'la akike halok he, atì hano motok.

³⁸ Ap en helekerek salisik mene eperak lopolek mene wanhe halok he, atì hano meneat he, wanhì'lek kamo ike halok he, atì hano motok o.

³⁹ It hìmì re, inagoni inebe ineluk werek kolek, ap hùnogo mene aike woginabusak lek o. We, inagonì inebe wa'lago halogat, ina'la walok akìlì'lùgì mene woginabusak. Mene yùgùnat woginabusak lek. We, ninoe Etagepogot inom hutik mene halok woginabusak o.

⁴⁰ Atì'nogo woginabusak meneat he, wanhì'lek welegat logoumo re, ina'la hano logousak akìkì lagì o. Atì'nogo akìkì lagì atì re, Ala Areagùn na'la logolìk akìkì lagì.