1 KORÌTÙT 6 - Ala Ane Wene Ket Mene Warogo Wo'ninapike Wene

“Ala againapùrì mene aike ùkùm inoba werek halok, apùnì Ala ane inokot mene Inayoko housak lek,” ìlùk yogoisasike wene

¹ Hit Ala againapùrì mene, hit-hit hat aike nen at aike ùkùm oba hegen halok he, Ala againapùrì mene nen pìlìngìthìlìk ùkùm atì oba hìgìk, kotìk, uagalùk inayoko hìgì'lek, it apùnì weak hagarì'lùgì mene inayoko hìkì lagep atì nahalok. Hinekalì lek a?

² Hobuk Ala againapùrì nen apùnì kweangma mene yoma ùkùm inoba hìgìk, kotìk, ugun atì hinokot nogo? Atì'nogo ugun halok, wene hamùlùgat mene atì re, hit en pìlìngìthìlìk en ùkùm inoba hìgìk, kotìk, usak lek nogo?

³ Nit enat, it malaikat Ala nen yoko pelaksa wagarek mene amanogo, ùkùm inoba hìgìk, kotìk, ugun atì hinokot nogo? Halok he, nit kweangma yoma logolìk, apùnì ùkùm yì hesik tì hesik inoba aganem, nit en pìlìngìthìlìk ùkùm inoba hìgìk, kotìk, usak lek nogo? Usagat o.

⁴ Ùkùm atì'nogo mene hinoba aga halok he, pìlìngìthìlìk ùkùm hinoba hìgìk, kotìk, uagalùk sanì inayoko hìkì lagep. Nit Ala againapùrì nen he, “It atì inoabùt weak,” ìlùk ogorek mene atì inayoko hìkì lagep a?

⁵ Hinekalì watì lagì o. Hit hinerùgì hinagaiya'lak hinom, hat aike nen at aike ùkùm oba hegen halok he, ap Ala aput a'la motok kagalek logolìk wene pìlìngìrogo legethousak mene omakeat aike lek nogo? Werek akìkì lagì.

⁶ Meneat he, hat aike nen he, hagaiyak aike ùkùm oba hìlìk he, apùnì inetaùken Ala ba hìpìrethìgì'lek mene nen pìlìngìrogo ùkùm oba hìgìk, kotìk, uak en ìlùk inayoko hìkì lagen atì.

⁷ Hit-hit hinerùgì hinagaiya'lak hinom meneat he, hinom wene-wene motok welagep atì nen maben akìkì lagep o. Hit he, weak hagathinapenem en, hinepe morogo logoumo weak a? Alemathinapa halok heraksamo weak a? Hano o.

⁸ Hit he, hinerùgì hinagaiya'lak hinom meneat he, weagarinapìk, alemarinapìk, ìkì lagep atì.

⁹ Apùnì weak hagarì'lùgì mene Ala awe a'ma hisikere'ma atì esewerek asugun lek o, ìlùk he, hinokot nogo? Hinokawerek en lalagùp. Pailak haksagarek mene mel, tùgì hareken oba hìpìrìk logolìk hogoratarek mene mel, ap inagagwì mene pailak haksagarek mene mel, ap en hìmì haksagarek hak it ap-ap haksagarek mene mel,

¹⁰ yogot wanharek mene mel, inamì'mìk weak hagatarek mene mel, amusu lùgùlùgì paluogolùk nekarek mene a'nogo niko motok welagaikarek mene mel, inane aik weak wenagisagarek mene mel, ineki abusak wanharek mene mel, it apùnì atì'nogo hagatarek mene atì obogat Ala awe a'ma hisikere'ma atì esewerek asugun motok lek o.

¹¹ Alebat hit aike atì'nogo hagatì lagagip meneat he, yogotak he, Ala nen hina'la hano sobalogo hikasikesik, hinebe at okawerek hesik hakasikomo welagep o. Ùkùm hinoba welagaike mene atì, ninopase Ala Areagùn nen ninoe Etagepogot Yesùt Karìsùt etage ba, korogo wokhasikesik Ala hinom lapulogo hikasikomo welagep o.

“Hinebe Ala hesik hisìlìk hano hagatì logousak,” ìlùk yogoisasike wene

¹² Hit mene aike nen ìkì logolìk he, “An yì mene tì mene yùgùnat hagasusak enek,” ìlùk ìlì'logo meneat he, an na'la nen he, yì mene tì mene obogat atì nen hanorinabusak enek hùk. Yì mene tì mene atì omame arìk, atì mene nen an nebe awe a'ma hanusak he, nabit o.

¹³ It aike nen yì'nogo egaregat: “Nekarek mene atì ninalabut hesik. Nen, ninalabut atì nekarek mene hesik,” ìlùk egarek. Atì'nogo egarek meneat he, pìreat he, at Ala nen hobuk legethegein werek o. Ala nen, ninebe yì re, pailak haksìkì logouagalùk weiname'ninapike hùk. At he, ninoe Etagepogot hesigat weiname'ninapike atì. Ninebe yì esewerek he, ninoe Etagepogot werek o.

¹⁴ Ala nen he, ninoe Etagepogot wa'lagaikesi'mo nen eluguthesike hak, at omame ba, nit ninelugu'ninabiginat o.

¹⁵ Nit ninebe yì re, Karìsùt eki esok hake welago, ìlùk hinokot nogo? Halok, ninebe Karisùt eki esok welago atì mene waganogo, hìmì inoabùt yanani mene atì inom hùnesusak nogo? Motok lek o.

¹⁶ It ap hìmì inoabùt yanani mene atì inom hùnì'lùk he, inebe omakeat agaikarek, ìlùk he, hinokot nogo? Ala nen ìkì logolìk, “It inebe pìre mene at he, hobuk omakeat haga'larìk logogun o,” ìlùk isikomo helal waganogo hesukwama werek atì.

¹⁷ Nit ninebe hesik atì'nogo haga'lagorek meneat he, ninoe Etagepogot ninom hùnì'lùk he, at ninom ninetaùken omakeat agorek atì.

¹⁸ Pailak haksagarek atì mene haksìkì logoinogo ìlùk, hese pùgùlhi logoino o. Yì weak tì weak hagatarek atì re, inebe etakwe yìat hagatarek. Meneat he, pailak haksagarek atì nek he, inokawerek inebeat weagathakagarek atì.

¹⁹ Hit en he, “Ala nen, Areagùn wo'nisasikomo, ninebe at awì wùrìk welago,” ìlùk he, hinokot nogo? Hinebe hinokawerek esewerek hùk. At esewerek o.

²⁰ Ala nen he, hinebe oko arat katok hogo palogo wokhinapikomo welagep atì nen he, apùnì nen Ala hogorasuagalùk he, hinebe at hesik hano hagatì logoino o.