1 KORÌTÙT 5 - Ala Ane Wene Ket Mene Warogo Wo'ninapike Wene

Ap aike opase agwe mene wanhikomo, Paùlùten inasuk wasike wene

¹ Apùnì nen, ap hit mene aike he wanusak lek mene wanhesik werek ìlùk abok ìkì logolìk yogonetama nasuk holhì o. It apùnì Ala ane inokot mene nen atì'nogo hagatarek lek mene, ap atì opase agwe mene wanhesik werek atì.

² Atì'nogo hagate kolegat he, hit hogorakìkì lagep atì. Hit hagasusak he, hina'la weak arìk, ap weak hagate werek atì, wulaksasak mene hinom lapuk hogo welagep atì.

^3-4 An nebe walegat welagì mene re, netaùken hit ninom welago hake o. Atì nen, nebe ninom logolìk u hak he, ninoe Etagepogot Yesùt etage palogo re, at ap weak hagate werek atì ùkùm oba higima werek o. Halok, hit omakìma atogotenem, an netaùken ninom welago hake atì nen, ninoe Etagepogot Yesùt omame ba, mel haga'no.

⁵ Ap atì etaùken ninoe Etagepogot wesigin atì like waga logolìk teluak en he, yogotak ebe Ibilit en weagathouagalùk, at Ibilit at wogo'no.

⁶ Apùnì nen inane lagak hogo ìkì logolìk, “Eken sùpùrùk horoti mene hisuagalùk a'la pelaparek mene hamùlùgat a'la pelabì'mo nen, horoti ebe obogat hìterek o,” ìlùk egarek a'nogo hinokot nogo? Hinelu logolìk hogorakìkì lagep atì hano hùk. Weak o.

⁷ Apùnì Yahuri mene pesta Paskah nìkì logolìk, topa warn warogo, eken horoti hisuagalùk a'la pelaparek mene wulaksìlìk, hìtì'lek mene nek nekarek hak haga'no. Ninako topa wasu hak, Karìsùt nit hesik arat wasukwa atì nen he, hinebe horoti ket hìtì'lek mene agasip welagep hak eberogoat asuageip en, eken horoti hisuagalùk pelaparek mene alep mene wulaksagarek hak, weak hagatì lagep mene atì horogo heraksano o.

⁸ Halok he, pesta Paskah nìkì logolìk, eken horoti hisuagalùk a'la pelaparek mene a'la pelapì'lek mene nekarek hak, nit weak hagatìk, pailak haksìgìk, ìkì logousak lek o. We, ninetaùken omakeat logolìk, eberogoat mene nek hagatì logouok o.

⁹ An nen alebat wene helal waganogo hinoba lakhei waga logolìk he, mel yogohisasigi akìgì: “Hit he, it apùnì pailak haksìlì'lùgì mene hinom lapuk hogo logogùp o,” ìlùk yogohisasigi o.

¹⁰ Atì'nogo yogohisasigi atì re, it apùnì Ala ane inokot logolìk pailak haksagarek mene mel, inamì'mìk weak hagatarek mene mel, lalinaparek mene mel, tùgì hareken oba hìpìrìk logolìk hogoratarek mene mel, it atì hesik yogohisasigi lek o. It atì'nogo hagatarek mene hinom logousak lek, ìlùk ilema re, it apùnì kweangma mene yoma motok heraksalùk wùlìbilep o.

¹¹ Atì'nog'o yogohisasigi atì re, wene ebe yì'nogo. At aike nen ìkì logolìk he: “An hinagaiyak Ala apurat o,” ìlùk ìkì logolìgat he, pailak haksìgìk, amì'mìk weak hagatìk, tùgì hareken oba hìpìrìk logolìk hogoratìk, ane aik weak wenagisìgìk, amusu lùgùlùgì paluogolùk nekarek a'nogo mene niko motok welagìk, apùnì lalinapìk, ikerek mene atì hake mene hinebe hinom lapuk hogo logousak legat, sùpùrùk hinom nìkì logousak legat, ìlùk yogohisasigi akìgì.

^12-13 It apùnì Ala ane inokot mene ùkùm an nen inoba housak nogo? Lek o. We, Ala nen inoba hegein werek o. Ala ane helal waganogo hìkì logolìk he, mel isukwa: “At aike hina'la logolìk weak hagarì'logo mene atì, wulaksano,” ìlùk isikomo helal waganogo hesukwama werek atì nen he, ap aike hit Ala againapùrì hinom atogotì lagep mene nen weak hagate halok, hit en ùkùm oba housak lek nogo? Housagat o.