1 KORÌTÙT 4 - Ala Ane Wene Ket Mene Warogo Wo'ninapike Wene

“Nit Karìsùt atitigeke logolìk yì'nogo hagatì lago,” ìlùk yogoisasike wene

¹ Hit en nit hesik he, “It inebe Karìsùt atitigeke mene, wene Ala a'la akikerek wene apùnì kweangma mene inokot mene yogoisìlìk negarek mene,” ìlùk hùthinìkì logoni o.

² It ap kaintek inagarok yì mene tì mene it inatitigeke mene ineki ba logouagalùk inoabùt palogo nen, inoabùt lenurek mene halogat hisagarek.

³ Mene re, an nen atìi'nogo hagatenem, hit en he a? It aike nen he a, ìkì logolìk, “At higit hagarì'logo he a? Kolo hagarì'logo he a,” ìlùk nanema wo'neasak he, mea akìkì lagì. Nen, an nokawerek en usak hogo re, meat o.

⁴ An nokawerek en, “Weak aike hagatì'lek,” ìlùk akìkì lagì atì ba, ùkùm noba koregein legat o. We, at ninoe Etagepogot en ùkùm noba hìgìk, kotìk, usak o.

⁵ Atì nen he, at en ùkùm apùnì inoba hìgìk, kotìk, igin atì like oan asi wagì'lek werek kolek, hit en it aike ùkùm inoba hìgìk, kotìk, usak motok lek o. We, at ninoe Etagepogot ebe wìrìk en he, apùnì nen hùako hinagasogo hagarì'lùgì mene sele'mathìgìk, Tì'nogo hagasugun, ìlùk akalìk ina'la sebelek werek mene atì hukalogo hìgìk, i wesigin atì serogo logousak o. Atì'nogo hukalogo hikenem, Ala nen he, hano hagata mene inebe lopok hogorinabusak meneat hogorinabigin o.

⁶ Nerùgì nagaiya'lak. An wene yogohisìgì atì re, hit aike nen he, “Hit hinoe atì mea mene re, nit ninoe yì nek he, esin,” ìlùk hogorakanogo ìlùk yogohisìgì. Atì'nogo hogorakasak lek ìlùk, mel egarek akìgì: “Wene Ala ane helal waganek werek kolek oba louk hogo aike usak lek,” ìlùk egarek a'nogo hùthoageip ìlùk, nit Apolot neperak ninoba lìrogo yogohisìgì atì.

⁷ “It aike atì mea mene re, aike atì nek he, esin motok, ìlùk ìkì logoino,” ìlùk sa nen yakùlhisasikomo ìkì lagep. Hit hinagarok yì mene tì mene helìkì lagep atì, Ala nenat wokhisikerek lek nogo? At enat wokhisikerek o. Atì'nogo wokhisikenem helìkì lagep meneat he, hit en elalhep mene salek hinokawerek en hogorakìkì lagep atì nenahalok.

⁸ Hit yì mene tì mene arat helegep hìgì. Arat kain akegep hìgì. Nit kepù werek kolek, hit enek he, hinetagepogot arat akegep hìgì. Hit atì'nogo hinetagepogot a'lepma, nit ninomat ninetagepogot logoilo e. Meneat he, lek o.

⁹ Nit atì re, apùnì inapsìrì mene apùnì ineilhanem sele'ma inebe horotsìlìk inekalì warogo inoatarek atì hak, nit Ala nen ninayoko hìlìk lakhina wagaikomo wagagu mene atì, apùnì mel, malaikat mel, ineilhanem atìtì'nogoat haga'ninabì'lùgì o.

¹⁰ Nit he, Karìsùt hesik ninebe kepù werek kolek he, hit enek he, Karìsùt hinom hutik logolìk hina'la kagauksek welagep hìgì. Nit maben werek kolek, hit enek he, hinomame werek welagep hìgì. Nit ina'la meathinanho kolek he, hit enek he, hogothinabì'lùgì hìgì.

¹¹ Nit o hageat a'loma nen yogotak hùlì, sùpùrùk mel, i mel neleat welagorek. Atì'nogo logolìk, ninasu legat were'ma tùgì ninoato kolek, ninaua le'ma, o yì awì tì awì nogorek.

¹² Atì'nogo nìkì logolìk, yì mene tì mene helùogolùk, yabu nineki ba nen, ninomamerogo waganogo helogorek. Apùnì nen homan hinikenem, nit en agaugerinapìk, yì aik tì aik haga'ninapenem, ninepe morogo welagìk,

¹³ ninabok weak palhenem, ninane lìok hogo yogoisìgìk, ogorek. Atì'nogo iko kolek, o hageat en yogotak hùlì apùnì yoma obogat en he, apùpùleke horogo wulaksagarek hak, nit atì'nogoat haga'ninapoat werek.

¹⁴ An nen helal wanhì lagì yì re, hit hinekalì wasigìlùk wanhì lagì hùk. We, hit hinebe an ebe nagainapùrì mene negen netawì logolìk hinasuk watì lagì o.

¹⁵ Hit Karìsùt hinom hutik were'ma re, ap wene yakùlhisìlì'lùgì mene inebe 10.000 apigat werek meneat he, hinopase re, apik hùk. We, inagainapùrì taginaparek hak, an nenat wene hano wene atì yogohisa wagagisik Karìsùt Yesùt hinom hùnogo hikasigimo welagep atì ba, hinopase naligat agagisik welagì o.

¹⁶ Atì nenat, “An noabùt wanini o,” ìlùk nane ning hogo hinasuk watì lagì o.

¹⁷ Hit an noabùt wanuageip en ìlùk, naput Timotìùt, nokawerek en tatì mene negen ebe netawì mene hinoba lakhei wagì atì. At he, ninoe Etagepogot eperak hutik logolìk, at hesik oabùt lenurogo hagaterek mene hinoba wìrìk he, mel yakùlhisegein: “At Paùlùt Karìsùt eperak hutik logolìk, it Ala againapùrì o yì awì tì awì atogotarek mene at okawerek hagaterek mene oabùt wanuagalùk, yì'nogo yakùlisikerek,” ìlùk hina'la eberogo yogohisa wesigin o.

¹⁸ An hit hinoba wesigin lek salek he, hit aike hinokawerek en hogorakegep atì.

¹⁹ Atì'nogo meneat he, ninoe Etagepogot en a'la akalùk en, “Hano, lan,” ìlùk yogonete halok he, an hinoba hepogat wesigin o. Wìrìk he, it aike hogorakìlì'lùgì mene atì, inane ugun mene nasuk holigin hùk. We, inomame werek a? Lek a, ìlùk inoabùt paligin o.

²⁰ Atì re, “Ala awe a'ma welago,” ìlùk, inane ba ugun halok, enagat agarek hùk. We, inomamerogo hagatì logogun halok magat agarek o.

²¹ Mene re, an hit hinoba tùgì wolok wesu hak wìrìk nane ning hogo yogohisa wesusak walok a? At he, nane lìok hogo hinebe netawìrogo yogohisa wesusak walok a. Hit en kì hak walok akegep.