1 KORÌTÙT 3 - Ala Ane Wene Ket Mene Warogo Wo'ninapike Wene

“Ninebe Ala atitigeke welago,” ìlùk yogoisasike wene

¹ Nerùgì nagaiya'lak. An nen alebat he, wene apùnì Ala Areagùn ina'la werek mene hùgì yogoisagarek hak he, yogohisìgì'lek o. Atì'nogo yogohisasigi lek atì re, hit Karìsùt hinom hùnesigisibat he, hinoabùt hinesogat logolìk, omalik ketago mene hake welagagip atì nen he, apùnì inoabùt atì'nogo were'ma yogoisagarek hak yogohisasigi atì.

² An nen he, apùnì inalùgetek sùpùrùk haro mene wogisagarek hak, hit wene wurik mene wanusak mea atì nen he, wene wurik mene yakùlhisìgì'lek. We, omalik ketago mene ineilak wogisagarek hak, wene akut mene yogohisasigi atì. Mene re, yogotak he, atì'nogoat wene wurik mene yogohisasak he, meaat welagep atì.

³ Hit-hirat ua palhìk, wene palhìk, ìkì lagep halok he, hinoabùt he, apùnì inoabùrat welagep o. Apùnì inoabùt inesogat logolìk hagatarek hak hagatì lagep atì nen yogohisìgì o.

⁴ Atì'nogo hagatì logolìk, hit aike nen he: “Nit Paùlùt akìt,” ìgìk, nen, hit aike nen he: “Nit Apolot akìt,” ìgìk, ìkì lagep halok he, hinoabùt he, apùnì inoabùrat welagep o.

⁵ At Apolot atì sa nogo. Nen, an Paùlùt sa nogo. Nit atì ninoe Etagepogot enat a'la akalùk nineyabu lopok hagatì logouagalùk ninayoko hesikomo re, at atitigeke welago. Atì'nogo logolìk, wene yakùlhisasugumo re, hinetaùken Yesùt oba hìpìrethesigip atì.

⁶ Wene atì, sùpùrùk awì yatarek hak, an nen yasigi. Nen, at Apolot en he, i kesalìk lagaike. Nen, ebe re, at Ala nenat hùkothesike.

⁷ Ebe esin etagewerek he, awì yaterek mene atì hùk. I kesalìk lagarek mene atì hùgat o. We, esin etagewerek he, Ala nen ebe hùkothikerek atìat etagewerek o.

⁸ An awì yatìrek mene atì, at i kesalherek mene atì, neperak higit meneat he, nineki oko re, ninebe lopok yabu hagatì logogun mene higit hogoat wo'nisegein o.

⁹ Hit hinebe atì Ala eyabu hak were'ma re, nit neperak en Ala woksìkì lago. Aike re, hinebe Ala awì hak were'ma re, neperak en Ala awì wùrogo hisìkì lagoat.

¹⁰ At Ala oabùt hano nen nayoko hesikomo re, o atì tik he, an o netaùken wekelek mene nen wasigimo nen, it aike nen oba louk hogo wùrì'lùgì atì. Mene re, apùnì inebe lopok, o tik atì ba louk hogo wusuogolùk halok he, hùthìlìk en inetawì wekelogo wususak o.

¹¹ At Ala nen he, “O atì tik, Yesùt Karìsùt atìat logouak,” ìlùk hesike atì nen he, at aike nen, o tik hùnogo mene wasusak motok lek o.

¹² O tik atì warek were'ma, oba louk hogo re, it aike nen oko hùko palogo, emas mene wùtìk, perak mene wùtìk, helebeken permata mene wùtìk, wùrì'lùgì. Atì'nogo wùto kolek he, it aike nen he, e mene wùtik, e ket eka mene wùtìk, pùk eka mene wùtìk, wùrì'lùgì atì.

¹³ Atì'nogo wùto were'ma, at Karìsùt hobuk wesigin atì like, apùnì nen o wùta mene lopok hano a? Weak a, ìlùk, etumo walhikenem, hukalogo enagat aganem hogoin o.

¹⁴ Atì'nogo walhikenem he, at aike nen o tik atì ba wùte mene etu nìkì'lek logogin halok he, eki oko wogosigin o.

¹⁵ Atì'nogo meneat he, at aike nen o wùte mene, etu nike halok he, o halì nikenem inebe tegelogo hisa lagaikarek hak, at o wùte werek atì ebe nek he, tegelogo hei legein meneat he, oko nong asigin o.

¹⁶ Nit ninebe Ala awì wùrìgat, ìlùk he, hinokot nogo? Ala Areagùn nina'la awì wùrogo welagarek, ìlùk he, hinokorat nogo?

¹⁷ Hit hinebe, at Ala awì wùrìk welagep atì, at meneat welagep o. Halok, hit en Ala awì wùrìk atì weagathoumo re, at en hit weagathinabiginat o.

¹⁸ Hinokawerek en hinebe lalagùp o. Hat aike nen he: “An apùnì yoma inawene mene na'la kagalek o,” ìlùk akìkì lagen halok he, ha'la ebe wene atì kagalasuak en he, apùnì inawene atì ha'la abit asuak o.

¹⁹ Apùnì kweangma mene nen he: “Nit apùnì ninawene nina'la motok kagalek,” ìlùk akìlì'lùgì halok he, Ala nen he, “Ina'la abit werek o,” ìlùk akikerek. It ap Ala ane helal waganogo hìkì lagaukwa mene nen he: “Paik hele hìlì'mo kerelaganem watarek hak, it apùnì kweangma mene yoma ina'la kagalek salek logolìk lalinabì'lùgì atì ba, kerelaganem he, Ala nen weagarinabigin werek o,” ìlùk helal waganogo hesukwa.

²⁰ Nen, wene aike re, yì: “It apùnì ina'la kagauksek mene nen ina'la eberì'lùgì atì re, we tùlemat eberì'lùgì o, ìlùk ninopase Etagepogot elu,” ìlùk helal waganogo hesukwama weregat.

^21-22 Halok he, an Paùlùt nebe mel, at Apolot ebe mel, Kepat ebe mel, o kweangma yoma obogat mel, ineluk welagaikarek atì mel, wa'lagaikarek atì mel, o yogotak ya welagarek mene mel, hobuk haga'lasigin mene mel, atoma obogat he, hit esewerek atì nen he, hit en he: “An noe atì o,” ìlùk apùnì mene hesik hogorakagùp o.

²³ Hit hinebe atì, esewerek he, Karìsùt. Nen, Karìsùt ebe esewerek he, Ala at o.