1 KORÌTÙT 2 - Ala Ane Wene Ket Mene Warogo Wo'ninapike Wene

Yesùt ebe e ba menhìlìk wasukwa wene

¹ Nerùgì nagaiya'lak. Ala ane atì a'la hinago were'ma, apùnì kweangma mene nen inokot mene atì, an nen hukalogo yogohisa wagagi atì re, an nane higit hogo ìgìrek en, na'la kagalek en, yogohisa wagagi lek.

² An hit ninom logolìk he, na'la nen wene welek mene ebetì'lek, we, at Yesùt Karìsùt hesik ebetì logolìk, esik he, at ebe e ba menhìlìk wasukwa wene atìat ebesigin o, ìlùk na'la akasigi.

³ Na'la atì'nogo akasigisik ebetì logolìk, an nokawerek nebe mabenatma nayùk en noagelekwe lei'-leigat hinoba wagagisik welagagi akìgì.

⁴ Atì'nogo logolìk he, apùnì inawene an na'la kagalek en, nane hano nen, ning hogo yogohisasigi lek o. We, at Ala Areagùn omame ba, yogohisasigimo, ebe agaikomo re, hineileken hasigip.

⁵ Atì'nogo yogohisasigi atì re, hit hinetaùken apùnì ina'la kagalek mene atì inoba hakothìlìk welagì'lek, we, Ala omame werek ìlùk, at oba hakothìlìk hinetaùken at oba hìpìrethoageip ìlùk yogohisasigi atì.

“Ala a'la kagalek welagaike mene atì, hukalogo yogonisikerek,” ìlùk yogoisasike wene

⁶ It apùnì inetaùken wurik mene halogat, wene wurik mene atì ina'la kagauk hogo yogoisogorek o. Atì'nogo yogoisogorek atì re, it apùnì kweangma mene yoma, inawene mene lek. Inogogì kaintek inebe hobuk lek asugun mene o yogotak werek yoma, inawene kagauksek wene legat o.

⁷ Wene atì Ala a'la kagauksek wene hinago welagaike mene hukalogo yogoisogorek. Wene atì apùnì kweangma mene inokot meneat he, emakum Ala nen yì mene tì mene elalhì'lek logolìk he, at enat nit hano'ninapenem nina'la hai akoagalùk a'la akasike mene hinagoat welagaike.

⁸ Apùnì kweangma mene inogogì kaintek o yogotak werek yoma, wene atì inelu agì'lek inokorat werek. Inelu logoilepma re, ninoe Etagepogot hogoratorek a'nogo, ebe e ba menhìlìk wa'lep legat o.

⁹ Wene atì hesik he, Ala ane yì'nogo helal waganek werek: “At Ala nen he, yì mene tì mene apùnì nen ineileken hìgì'lek. Inasuk holhì'lek. Ina'la nen kagalhì'lek. Mene, obogat nit apùnì at ebe ninetawì welagorek mene hùgì hinikomo werek o,” ìlùk helal waganogo hesukwama werek.

¹⁰ Hinike mene atì, at Ala Areagùn nen yì mene tì mene peneterek atì nen, Ala a'la hinago welagarek mene atì inomat penetì logolìk, hukalogo yogonisasike o.

¹¹ Nit apùnì nina'la sa elu. Ninokawerek nina'la lopok ninelu welagorek akìgì. Atì hagat, Ala a'la re, it aike inokot enek. We, okawerek Areagùn aligat elu welagarek o.

¹² Nit en he, apùnì kweangma mene yoma inareagùn wanhugu hùk. We, at Ala oabùt hano nen wo'nisasike mene ninelu asuagalùk he, at Areagùn pelakhei wagaikomo helasugu o.

¹³ At Areagùn helasugusik he, Ala oabùt hano nen wo'nisikerek wene atì, apùnì Ala Areagùn ina'la werek mene yogoisùogolùk he, apùnì ina'la kagalek mene nen yakùlnisikenem yogoisìkì lago hùk. We, Ala Areagùn nen yakùlnisikenem yogoisogorek o.

¹⁴ Wene Ala Areagùn nen wo'nisikerek wene atì, it apùnì Ala Areagùn ina'la werek mene nek hùthagarek atì nen, it apùnì inoabùt inesogat logolìk, hùthagarek lek. Atì'nogo hùthagarek lek atì re, it en he, “Wene atì apùnì kepù mene nen egarek hake ìlì'lùgì,” ìlùk egarek atì nen, wene atì hùthìgì'lek werek o.

¹⁵ Atì'nogo meneat he, nit Ala Areagùn nina'la werek mene re, yì wene tì wene hùthìkì lago. Atì'nogo hùthikenem, it aike nen he, nit ninoabùt hùthinìlì'lùgì lek o.

¹⁶ Wene atì hesik, Ala ane ba helal mel ìlùk waganogo hesukwa: “Ninopase Etagepogot a'la ebeterek atì, sa hak elu. At he, sa hak en asuk wasusak nogo,” ìlùk it ap Ala ane yogoisìkì lagaukwa mene nen, helal waganogo hesukwa. Atì'nogo meneat he, nit Karìsùt a'la ebeterek wene atì hesogo welago o.