1 KORÌTÙT 16 - Ala Ane Wene Ket Mene Warogo Wo'ninapike Wene

“Ala againapùrì nen inerùgì inagaiya'lak aike uang hisasak,” ìlùk yogoisasike wene

¹ Yogotak he, hit en uang atogorogo hinerùgì hinagaiya'lak Ala againapùrì aike hisùogolùk egep atì re, wene it Ala againapùrì o Kalatia mene yakùlisìgì atìi hagat haga'no o.

² An nebe waganem en atogosusak lek o. We, ya baat hari Minggu ba ninhùp-nanhùp ìkì logolìk, hinebe lopok hinekim aga halok, atogorogo hisìlìk hesogo logoino o.

³ Hisìlìk he, ap wolok logoin mene hit en, “It elok,” ìlùk akegep mene halok inayoko heino. Atì'nogo inayoko hìlìk were'ma, an nebe wìrìk he, hit en hisegep mene atì wolok loak en, sùesika palogo o Yerusalem laksegein o.

⁴ Mene re, an nebe lasak aga halok he, an ninomat logoin o.

Paùlùt en, “Tì'nogo hagasigin,” ìlùk wene kagalogo hesike wene

⁵ An o Maketonia legein ìlùk na'la akìgìrì'mo re, atoma lìlìk ya ha'lagìk arat lagì halok en, hit hinoba wesigin o.

⁶ Hinoba wìrìk he, an hit ninom neki hamùlùgat logopik he a? O weak werek kolek neki aike inom hogo logopik he a, hit en o an legein akìgìma atoma lakhanuageip en ìlùk yogohisìgì o.

⁷ An atì'nogo o wele'ma lagalùk laga logolìk neki omake hesik ninom logousak he, nabit. We, ninoe Etagepogot en hano ike halok he, an neki hamùlùgat aike inom hogo ninom logogun o, ìlùk na'la akìkì lagì.

^8-9 Wesik en he, o Epesùt yoma apùnì, “Wene ninabit,” ìlùk wene palì'lùgì mene inebe apigat werek meneat he, an nen it aike yogoisikenem wene wanusak mene apik werek atì nen he, yoma logopik Hari Pentakosta arat haga'lùk en wesigin o.

¹⁰ At Timotìùt a'nogo, an nen ninoe Etagepogot hesik hagatì lagì hak hagarì'logo mene hit hinoba wesigin atì, ebe waga halok he, hit hinom ayù'lek hogo logouak en he, ebe hanorogo wanino o.

¹¹ At waganem he, it apùnì aike nen, “At ebe mea,” ìlùk ina'la meathousak motok lek o. At apotkwe noba waga logolìk he, ninerùgì ninagaiya'lak he'nakìt amanogo inom nea wesuagalùk serisek welagì atì nen he, at hanorogo lebethìkì logoino o.

¹² Ninagaiyak Apolot a'nogo nen, it ninerùgì ninagaiya'lak he'nakìt amanogo wogisek hinoba wesuagalùk, hobugalebat a'la kagalhì lagì meneat he, at yogotak ya wesusak ìlùk akìlì'logo lek o. Mene re, hobuk wesusak akike halok he, wesiginat o.

At Paùlùt en ina'la kagalhìk, hai warinapìk, isike wene

¹³ Hinepe hebelogo logolìk he, hinetaùken Ala oba hìpìrethìlìk, metegat logoino o. Hinoabùt abat logolìk he, hinomamerogo logoino o.

¹⁴ Hit yì mene tì mene hagasuogolùk he, apùnì inebe hinetawìrogo hagatì logoino o.

¹⁵ Nerùgì nagaiya'lak. Wene aike yì hina'la kagalìk. At Sitepanùt againapùrì inom amanogo inebe hinelu o. O propinsi Akaya atoma re, it tak Ala againapùrì agaukwasik he, it Ala againapùrì aike leberisìkì logouogolùk inetaùken oba nenat isukwasik en leberisìlì'lùgì atì.

¹⁶ It inoabùt hake halok, it aike it inom ning hogoat hagato halok he, obogat inawe a'ma kìlìk inane hologo logoino o.

¹⁷ Sitepanùt ho, Porotunatùt ho, Akaìkùt ho, noba wagaikasik, hit en an hesik hagatì logou hak, it en hano hagarì'lùgì atì nen, na'la hai hakìkì lagì o.

¹⁸ It wagaikama re, an na'la hano aga hak, hit hina'la hano asigin o. Halok, it apùnì aike inoabùt it hake mene halok he, hinane agauk hogo yogoisìkì logoino o.

¹⁹ Ala againapùrì o propinsi Asia ya ta atogorì'lùgì mene yoma nen hit hai wathinapa o. Ap Akwila agwe Perisikila eperagat, nen, Ala againapùrì it inaua atogorì'lùgì mene inomat en, ninoe Etagepogot inom hutik logolìk hai apik wathinapaat o.

²⁰ Nen, ninerùgì ninagaiya'lak o yoma mene obogat en hai wathinapaat o. “Nit obogat ninebe Ala againapùrì,” ìlùk he, hit-hit hai hinape saluk wat-wat ìlìk lano.

²¹ An Paùlùt nokawerek neki nen helal waganogo hai wathinapì atì.

²² At aike nen, ninoe Etagepogot etawì lek halok he, Ala nen at atì ebe homan houak o. Mene re, ninoe Etagepogot hepok eme o, u hak, Maranatha, ìlùk ìgì atì.

²³ Ninoe Etagepogot Yesùt oabùt hano a'nogo nen sethisek motok logouak o.

²⁴ Karìsùt Yesùt ninom hutik logolìk he, hinebe obogat netawì ìlùk hai wathinapì atì o.