1 KORÌTÙT 15 - Ala Ane Wene Ket Mene Warogo Wo'ninapike Wene

Karìsùt ebe wa'lagaikesi'mo nen Ala nen eluguthesike wene

¹ Nerùgì nagaiya'lak. Yogotak he, an nen wene aike hina'la ebethisak. An nen hano wene yogohisa wagagimo re, wanhigisip he, hinetaùken hano wene atì ha wurik agagisip welagep atì.

² Hano wene yogohisa wagagi wene atìat hineki ning hogo hesogo logogun halok he, atì baat telhinabì'logo. Atì'nogo meneat he, hit we tùlemat alemarogo hinetaùken Ala oba hìpìrethesigisip welagep halok he, mea o.

³ Wene emakum an yakùlnesukwama, wanhigi meneat hit hobuk yakùlhisasigi atì re, ebe mel akìgì. Nit weak hagatì lagagu mene hesik, at Karìsùt nineki elùgùn oba wasugun ìlùk helal waganogo hesukwa higit hogoat ebe wasukwa atì.

⁴ Wasukwama re, ebe warek omoulama hei lagaukwa. Hei lagaukwama re, eki pìre warek welagaikesik were'ma eki aike ba Ala nen eluguthesike. Eluguthesike atì re, hageat Ala ane helal waganogo hesukwa higit hogoat eluguthesike ati.

⁵ Eluguthesikomo re, at Kepat eileken hoagalùk elokoma melagaike. Opolik he, it inebe 12 nen amanogo ineileken hoagalùk inelokoma melagaikeat.

⁶ Opolik he, it at opolik nìkì lagaukwa mene inebe 500, nen aike inomat, apinene ineileken hoagalùk inelokoma melagaikeat. It ineileken hasukwa mene atì, inebe hùkokwe yogotak ineluk werek meneat he, aike hamùlùkkwe inebe wa'lagaukwa.

⁷ Arat mela'lùk hobuk he, Yakobùt eileken hoagalùk elokoma melagaikeat. Hobuk he, at en inayoko hìlìk laksasike mene amanogo aike inom inebe obogat en ineileken hoagalùk inelokoma melagaikeat.

⁸ Atì'nogoo inelokoma melarìk waga lagaikesik, hobuk ebe hobuk he, an omalik inetawì akutmo tago mene hake meneat he, nelokoma melagaikomo neileken hasigiat.

⁹ Nit Yesùt en ninayoko hìlìk lakhinasike mene aike inetagewerek meneat he, an enek he, netage lek o. An nen Ala againapùrì atogotarek mene yì aik tì aik hagarinapì lagagi atì nen, an nen, “Nebe Yesùt en nayoko hìlìk lakhani wagaike mene,” ìlùk, usak he, mea o.

¹⁰ Atì'nogo usak mea meneat he, Ala oabùt hano nen nayoko hesikomo yì'nogo agagisik welagì o. Nayoko hesike atì we tùlemat hesike lek atì nen he, it aike obogat yabu hamùlùgat hake wanho kolek, an enek he, apik hake wanhì lagì o. Mene re, atì'nogo wanhì lagì atì re, an nen wanhì lagì hùk. Ala oabùt hano nen, neperagat logolìk wanì'logo o.

¹¹ Yabu atì ebe re, an mel, it aike mel, hano wene yogoisìlìk nìkì lago atìat o. Wene atìat yogohisikenem, hit en eberogoat ìlùk wanhigip atì.

Apùnì warek mene Ala nen inelugurinabigin wene

¹² At Karìsùt wa'lagaikesi'mo nen, hobuk Ala nen eluguthesike, ìlùk yogohisìkì lago meneat he, hit aike nen he, “Apùnì wa'larì'mo nen Ala nen inelugurinabigin lek o,” ìlùk ìkì lagep atì nahalok.

¹³ Apùnì wa'larì'mo Ala nen inelugurinabigin lek logoilepma re, at Karìsùt wa'lagaikesi'mo nen elugutheilep legat o.

¹⁴ At Karìsùt wa'lagaikesi'mo nen Ala nen elugutheilep le'ma re, nit en wene we tùlemat yogoisìkì logoilo. Nen, hit en hogo re, wene eberogoat ìlùk wanhigip atì re, we tùlemat wanilep o.

¹⁵ Nit en Ala abok ìkì logolìk he: “At en he, Karìsùt eluguthesikomo nineileken hasugu,” ìlùk yogoisogorek. Mene re, apùnì wa'larì'mo Ala nen inelugurinabigin lek logoilepma re, at Karìsùt elugutheilep legat o. Nen, at elugutheilep le'ma re, it aike nen he: “Hit en ìkì logolìk, Ala nen atì'nogo hagasikomo nineileken hasugu, ìlùk ìkì lagep atì re, hinera nenat lìbìlogo ìkì lagep,” ìlùk higirat yogoniselep o.

¹⁶ Apùnì wa'larì'mo Ala nen inelugurinabigin lek logoilepma re, at Karìsùt ebe elugutheilep legat o.

¹⁷ At Karìsùt Ala nen elugutheilep le'ma re, hit en, “Wene atì eberogoat,” ìlùk wanhigip atì, we tùlemat wanilepma re, hit weak hagatì lagagip mene atì, ùkùm hinoba logoilep o.

¹⁸ Atì hak, it aike Karìsùt inom hutik logolìk wa'lagaukwa mene atì re, nong a'lebat o.

¹⁹ Nit en he, “Hano'ninabigin,” ìlùk ninetaùken Karìsùt oba hìpìrethesugusik nina'la hai hakìkì lago atì. Mene re, yogotak ya nineluk logolìk enek atì'nogo akìkì logopik he, hobuk ninelugu'ninabigin lek logoilepma re, it apùnì heta nen, “Eigo. Netawìlak e,” ìlùk it aike yogoisìgì'lek nirat yogonisìkì logoilep o.

²⁰ Atì'nogo meneat he, at Karìsùt wa'lagaikesi'mo, Ala nen eberogoat eluguthesikomo werek o. Atì'nogo eluguthesike atì re, yì mene tì mene emakum lilu mene tak wanharek atì hak, it wa'lagaukwa mene, at Karìsùt tak eluguthesike atì.

²¹ At ap aike nen wa'lagwì ero yakùlhike atì hak, at ap aike nen ineluk agwì ero yakùlhike atì.

²² At Aram ninom hutik logolìk he, ninebe obogat wa'lagorek atì hak, nit Karìsùt ninom hutik were'ma re, Ala nen ninebe obogat ninelugu'ninabiginat o.

²³ Atì'nogo meneat he, Ala nen ninobùlù'mo lopok higit-higit ninelugu'ninabigin. Yì mene tì mene emakum lilu mene tak wanharek hak, at Karìsùt tak eluguthesikesi'mo nogo nen he, at ebe wesigin atì sat, nit Karìsùt agoromì mene hugì ninelugu'ninabigin.

²⁴ Ninelugu'ninabìk he, o elùgùn oba arat haga'lasigin. Atì sat he, at Karìsùt en inebe kain welagaikarek atì mel, esewerek welagaikarek atì mel, inomame welagaikarek atì mel, motogat legetsìlìk he, yì mene tì mene, at awe a'ma werek mene obogat ninopase Ala awe a'ma logouagalùk eki ba hegein.

²⁵ Atì'nogo hegein atì, at Ala nen Karìsùt aselei mene obogat esok en al lebelogo hisoak en awe a'ma hisa wesigin atì oan werek kolek, at Karìsùt ebe kainat motok logogin.

²⁶ Aselei mene ebe hobuk esok en al lebelogo legethegein atì, ebe re, wa'lagaikarek ero atìat o.

²⁷ Ala ane helal yì'nogo waganek werek: “Yì mene tì mene obogat at awe a'ma arat hisa waga o,” ìlùk isukwama helal waganek werek. “Obogat awe a'ma hisa waga o,” isukwama werek meneat he, at Ala hisa wagawerek okawerek ebe Karìsùt awe a'ma kìgì'lek, ìlùk enagat werek o.

²⁸ Yì mene tì mene obogat Ala nen aput awe a'ma hisa waganem he, at Kain Ala aligat etage hesaksek logolìk yì awì tì awì at awe a'ma logouagalùk he, at aput okawerek en he, “Nopase. Hat en yì mene tì mene obogat an nawe a'ma arat hanhen atì re, an yogotak hat hawe a'ma soma ìlìk logogin o,” ìlùk yogosigin.

²⁹ Wene aike re, it apùnì wa'lagaukwa mene hobuk inelugurinabigin motok lek logoilepma re, it hesik it aike ima pelaginapì lago atì re, nìkì'nogo hagasugun akegep. Nenahalok ima pelaginapì logousak.

³⁰ Nen, nit hogo re, likene hùako youkkwe motok nìkì lago atì, nenahalok nìkì logousak akegep. Atì'nogo nìkì logousak legat o.

³¹ Nerùgì nagaiya'lak. Hinetaùken ninoe Etagepogot Karìsùt Yesùt oba hìpìrethìlìk ninom hutik welago atì nen, an hit hesik nalong agì ìlùk akìkì logolìk mel yogohisak. An he, ninhùp-nanhùp nebe noasuogolùk iko kolek nepe morogo welagì o.

³² An o Epesùt yoma logolìk, apùnì wam maro oabùt weak mene inom yaparek hak ninom yapì lagosik atì, apùnì kweangma mene hesik yaparek hak yabilema re, nena mene sabùrele akegep. Apùnì wa'lagaukwa mene inelugurinabigin lek logoilepma re, it aike nen isukwa hak, mel ilo: “Nit o hùen ninebe wa'lasugunmo re, yogotak ya elama hesik nineluk logolìk, sùpùrùk mel, wam mel, eken amusu mel, nina'la hai hakìkì logolìk elama nìkì logouok,” ìlùk isukwa hagat ilo o.

³³ Apùnì nen ìkì logolìk: “It aike inoabùt weak mene hinom hùnesugun halok he, hit hinoabùt hano mene weak asigin o,” ìlùk egarek atì eberogoat ìlùk, hinokawerek en hinebe lalagùp o.

³⁴ Weak hagatì lagep mene atì heraksìlìk he, yogotak hinepe hebela'ni o. Hit aike Ala ebe hinokot welagep atì nen, hinekalì wasigìlùk yogohisìgì atì.

“Apùnì warek mene Ala nen inebe tì hake inelugurinabigin,” ìlùk yogoisasike wene

³⁵ Atì'nogo meneat he, hat aike nen wene hinok wo'nììkì logolìk he, “Apùnì wa'lagaukwa mene atì Ala nen nìkì'nogo inelugurinabigin. Inelugurinabìk he, inebe nìkìnìk mene inelugurinabigin,” ìlùk egen atì re,

³⁶ hetaùken lek en egen o. Yì mene tì mene awì heik kweangma lakhegetek mene atì re, apùnì wa'lagaikarek hak, awì atì ogat hili agì'lek halok he, ebe hulelusak mea o.

³⁷ Awì heik kweangma lakhegetek atì re, ebe hobuk hulelik haga'lasigin mene lakhegetek hùk. We, gandum eken he a? At he, yì mene tì mene eken he a, eken enek heik lakhegetek.

³⁸ Heik lakhikenem he, at Ala a'la akalùk enat ebe agauak hagaterek. Yì mene awì, tì mene awì ebe lopok hùnogo tomok agauak hagateregat.

³⁹ Yì mene tì mene eluk mene obogat he, ebe omakeat mene hùk. We, apùnì ninebe hùnogoat, wam ebe hùnogoat, sùe ebe hùnogoat, ikan ebe hùnogoat.

⁴⁰ Nen, yì mene tì mene pogot oba mene weregat, kweangma mene weregat. Mene re, pogot oba mene atì elokoken lopok hano ìlùk egarek atì hùnogoat. Nen, kweangma mene elokoken lopok hano ìlùk egarek atì hùnogoat o.

⁴¹ Mo hano yaterek atì hùnogoat, tugi hano yaterek atì hùnogoat, hesagal hano tilelherek atì hùnogoat. Atì'nogo meneat he, hesagal atì ebe lopok hùnogo tomogat tilelherek o.

⁴² Atì hak, Ala nen apùnì warek mene atì'nogoat inelugurinabigin o. Ninebe warek hili agarek mene atì, awì kweangma heik lakhagarek hak, kweangma salninabì'mo re, hobuk ninebe hili asigin lek mene ninelugu'ninabigin o.

⁴³ Ninebe warek ninomame lek inapsìrì hagarek mene atì, kweang'ma salninabì'mo re, hobuk ninebe ninomame werek hogo'ninabusak mene ninelugu'ninabigin o.

⁴⁴ Ninebe wa'laganem ninagasabeke kweang meneat kweangma salninaparek. Mene re, hobuk Ala Areagùn nen ninebe nineluk motok logogun mene ninelugu'ninabigin o. Ninagasabeke mene welago yì re, Ala Areagùn nen ninelugu'ninapenem ninebe mene logogun o.

⁴⁵ Wene atì'nogo ìlùk, Ala ane helal wanhì logolìk he: “Ap Aram emakum mene atì, ebe eluk mene elalhike,” ìlùk helal waganogo hesukwa. Meneat he, ap Aram hobuk mene atì, Areagùn nen inelugurinaperek mene wagaike.

⁴⁶ Ala nen, ap emakum elalhike atì re, at hobuk aike mene atì Areagùn nen ninelugu'ninabigin atì mene elalhike hùk. Ninagasabeke kweang mene tak elalhikesi'mo nen, Areagùn nen ninelugu'ninabigin atì hobuk wagaike.

⁴⁷ Ala nen emakum ap Aram atì ebe kweang lobulongeke mene elalhikesi'mo re, oabùt kweang meneat o. Meneat he, ap Aram hobuk mene atì pogot oba nenat wagaike.

⁴⁸ It apùnì aike inebe kweangma mene agaika mene hùgì inebe re, at Ala nen emakum Aram ebe kweang lobulongeke mene elalhike mene atì hakeat werek o. Meneat he, it aike inebe pogot oba mane agaika mene hùgì inebe re, at hobuk pogot oba nen wagaike mane atì hakeat werek o.

⁴⁹ Nit yogotak, at Ala nen Aram ebe kweang lobulong mena elalhike mene atì ninom higit welago hak, hobuk at pogot oba mene atì ninom higirat logogun o.

⁵⁰ Nerùgì nagaiya'lak. Wene yì yogohisak. Ninebe ninagasabeke wa'lagorek mene yì inom he, Ala awe a'ma hinegeinmo atoma esewerek asugun motok lek o. Nen, ninebe hili agarek mene yì inom hobuk ninebe esok motok logogun mene esewerek asugun motok legat o.

⁵¹ Meneat he, wene Ala amùn elema mene yì yogohisak. Nit ninebe obogat wa'lasugun lek meneat he, ninebe lopok hùnogoat haga'ninabigin o, ìlùk eberogoat yogohisìgì.

⁵² Omake hesik, ineileken sapùn ìlìk hekenagaikarek hak, pìkon ane elùgùn kopok pak igin o. Atì'nogo pak ikenem he, apùnì wa'lagaukwa mene inebe hili agì'lek esok motok logogin mene agauak hagarogo inelugurinabìk he, nit obogat ninebe hùnogoat haga'ninabigin o.

⁵³ Ninebe hili agorek mene yì, hili asugun lek mene su labetarek hak labetìk, ninebe wa'lagorek mene yì, wa'lasugun lek mene labetìk, ugun o.

⁵⁴ Ninebe hili agorek mene yì, hili asigin lek mene labetìk, nen wa'lagorek mene yì, wa'lasugun lek mene labetìk, ugun. Atì'nogo labesugun atì ba, wene mel ìlùk helal waganogo hesukwa mene atì ebe asigin: “Yì mene tì mene haum hogo nekarek hak, At Ala omame arìk he, wa'lagaikarek ero atì, legetsegein o.”

⁵⁵ Atì'nogo legetsìlìk, ane sagan wokhìkì logolìk, “Wa'lagaikarek mene ero yì, homame kì. Haik en lìbìlinapì lagen a'nogo haik anini kì,” ìlùk isikomo wene helal waganogo hesukwa mene atì ebe asigin o.

⁵⁶ Wa'lagaikarek mene ero aik en lìbìlninaperek atì ebe re, nit weak hagatorek atì ba aik en lìbìlninapenem wa'lagorek atìat o. Nen, weak hagatorek mene omame agaike atì ebe re, wene Ala nen ninasuk wasike atì ba omame agaike o.

⁵⁷ Mene re, ninoe Etagepogot Yesùt Karìsùt hagasike atì ba, Ala nen ninomame'ninapenem ninomame agorek ìlùk, ninopase Ala hai watì logouok o.

⁵⁸ Atì nenat, nerùgì nagaiya'lak. Hinebe netawì. Hinetaùken wurik hogo, hapuk hogo logoino. Ninoe Etagepogot ninom hutik logolìk he, at hesik yì mene tì mene hagatenem alema'lasigin lek o, ìlùk, hùkorogo hagato motok logoino o.