1 KORÌTÙT 14 - Ala Ane Wene Ket Mene Warogo Wo'ninapike Wene

Ala Areagùn nen wogisikenem inane inokot mene elalinat ìgìk, wene pak hogo yogoisìgìk, egarek wene

¹ Hinoabùt he, apùnì inebe inetawì welagaikarek atì mene hinomamerogo yakùlhì logoino. Yakùlhì logolìk he, Ala Areagùn nen inoabùt lopok wogisikerek wene atì ese asuageip en, hina'la agaken hogo hagatì logoino. Hagatì logolìk, Ala ane pak hogo yogoisagarek mene atì mene wokhisoagalùk, esinetheino o.

² Sa nen inane inokot mene elalinat ikerek atì, Ala Areagùn a'la logolìk wene hinagoma mene ikerek atì nen he, apùnì yogoisìlì'logo lek meneat he, at Ala yogotenem, apùnì aike nen hùthagarek lek o.

³ Atì'nogo meneat he, at sa nen Ala ane apùnìat pak hogo yogoisikenem he, inetaùken ago watìk, inasuk watìk, inetaùken sebelhìk, ikerek atì.

⁴ Mene re, at inane inokot mene elalinat ikerek mene atì, at okawerek etaùken ago warikerek o. Meneat he, at aike Ala ane apùnì pak hogo yogoisikerek mene atì nek he, Ala againapùrì atogotarek mene obogat inetaùken ago warisikerek o.

⁵ Apùnì inane inokot mene elalinat egarek atì hamùlùk mea negen meneat he, Ala ane apùnìpak hogo yogoisagarek atì nek he, hùko esin negen. Atì nen he, hit hinebe obogat apùnì inane hinokot mene elalinat umo re, an walok meneat he, ebe hano motok he, hit en Ala ane pak hogo yogoisìkì logousak atìat walok o. Mene re, inane hinokot mene elalinat ugun halok he, hobuk Ala againapùrì aike inetaùken ago warisùogolùk he, hit hinane ba higit hogo umo nek he, hano.

⁶ Nerùgì nagaiya'lak. An hobuk he, inane ninokot menu elalinat yogohisa wagì halok he, atì ba hanothinabusak nogo? Wene Ala aman elema mene pak hogo ìgì'legat, wene nelu mane yogohisìgì'legat, Ala ane yogohisìgì'legat, wene sekek hogo yakùlhisìgì'legat, halok he hanothinabusak nogo?

⁷ Yì pikon tì pikon etaùken lek mene anethikenem, ane ikerek meneat he, akùp hùnogo tomok ìgì'lek halok he, apùnì nen he, “Ì, ane atì mene ike,” ìlùk kì'nogo hùthasak nogo. Mea o.

⁸ Apùnì weim lùogolùk a'mìt sup egarek hak, pìkon aike ane hùko ikerek mene atì, ane okut nong-hong hogo ike halok, “Yogo, yogotak weim yabuogolùk hìgì,” ìlùk sekek hogo hùthìgì'lek sa nen hibik-hebek hogo hagasusak nogo. Mea o.

⁹ Atì hagat he, hit en inane hinokot mene elalinat ìkì logolìk, hinape ba nen wene sekek hogo ìgì'le'ma re, wene atì nìkì'nogo inelu asusak nogo. Mea o. We, eka heleka yogotì logousak o.

¹⁰ Kweangma yì apùnì tì apùnì inane lopok apigat werek akìgì. Mene re, inane atì tùlemat egarek hùk. Sekek hogo ikenem hùthasak enek o.

¹¹ Atì'nogo meneat he, it inane okut pale'ma an nokot halok he, at aike nen ikenem, an nen nasuk nìkì'nogo holusak. Nen, an nane ikenem, nane okut pale'ma re, at en nane nìkì'nogo asuk holusak. Mea o.

¹² Halok he, Ala Areagùn nen inoabùt lopok wogisikerek mene atì wokhisoagalùk hina'la agaken hogo hagatì lagep meneat he, Ala againapùrì inetaùken ago warisasak mene halok hùkorogo wokhisoak en, atìat esinetheino.

^13-14 It aike inane an nokot mene ba elalinat sapan ìkì logolìk he, netaùken oba nen ìkì lagì meneat he, ebe hùthìkì lagì motok lek atì nen he, at aike nen it aike inane okot mene ba elalinat ikerek mene atì nen ìkì logolìk he, “Ala Nopase. Inane inokot mene atì an nokawerek nane ba higit hogo yogoisìkì logoik en he, hat Hareagùn nen inoabùt wogisikerek a'nogo mene aike wo'nesuak o,” ìlùk sapan ìkì logouak o.

¹⁵ Halok he, an nìkì'nogo hagasik. Yì'nogo hagasigin. Sapan atì re, Ala Areagùn nen yogoneto kolek inane nokot mene ba elalinat ìgìk, ninokawerek ninane ba netaùken hùthìlìk en ìgìk, igin o. Nen, wùni atì re, Ala Areagùn nen yogoneto kolek inane nokot mene ba elalinat watìk, ninokawerek ninane ba netaùken hùthìlìk en watìk, iginat o.

¹⁶ Atì hagat he, hat aike nen Ala Areagùn nen yogoheto kolek inane hokot mene elalinat ìkì logolìk, “Ala nopase,” ìlùk hai wasigin halok he, at aike okot mene nen hùthìgì'lek logolìk, “Wene ike atì ebe asuak,” ìlùk u hak, “Amin,” ìlùk usak nogo? Wene hat igin atì re, at okot en, atì'nogo usak mea atì o.

¹⁷ Halok he, hat en atì'nogo Ala hai lorogo wasigin meneat he, at atì etaùken ago wathegein nogo? Lek o.

¹⁸ Inane inokot mene elalinat egarek atì re, hit en he, hamùlùgat egesep. An enek he, apigat ìgìrek ìlùk, “Ala nopase,” ìlùk hai watìrek o.

¹⁹ Mene re, an Ala againapùrì ninom atogorek logolìk wene yakùlisagalùk he, inane nokot mene elalinat apik hogo ìgì'lek, we, hùthasak mene nane hamùlùgat 5 ba nek umo hano ìlùk yogoisìgìrek.

²⁰ Nerùgì nagaiya'lak. Wene hina'la ebetì lagep atì re, yekerùgì ina'la ebetarek hak ebetì logogùp. We, omalik ketago mene nen weak hagato inokot welagaikarek hak logolìk, hinetaùken inalùge inetaùken hake wurik hogo logoino.

²¹ At ninopase Ala Etagepogot en ninasuk wasike wene ba wene aike mel isikomo helal waganek werek: “An nen apùnì yoma, wene it aike inane okut palek mene inane ba elalinat yogoisìgìk, it aike ap pok mene inape ba yogoisìgìk, igin o. Atì'nogo yogoisegein meneat he, inasuk holugun lek o,” ìlùk isikomo helal waganogo hesukwa.

²² Wene Ala Areagùn nen yogoisikenem inane inokot mene ba elalinat egarek atì re, apùnì inetaùken Ala oba hìpìrethìlì'lùgì mene atì hùthoagalùk egarek hùk. We, it aike inetaùken Ala oba hìpìrethìgì'lek mene atì nen hùthoagalùk atì'nogo egarek o. Meneat he, Ala Areagùn nen wogisikenem, Ala ane pak hogo yogoisagarek atì re, inetaùken Ala oba hìpìrethìgì'lek mene hesik hùk. We, it inetaùken Ala oba hìpìrethìlì'lùgì mene nen hùthoagalùk yogoisagarek o.

²³ Hit Ala againapùrì omakìma atogorek logolìk, hinebe obogat en inane hinokot mene ba elalinat ikenem, it wene inokot mene mel, inetaùken Ala oba hìpìrethìgì'lek mene mel, hinoba ki wìrìk, it en he: “Yoma re, lùgùlùgì palhasik ìlì'lùgì o,” ìlùk yogohisogoin lek nogo? Yogohisogoinat o.

²⁴ Atì'nogo meneat he, hit hinebe obogat en, Ala ane pak hogo ikenem, at aike etaùken Ala oba hìpìrethìgì'lek mene mel, wene okot mene mel, hinoba ki wìrìk, at en he, mel usak: “Eigo. An weak hagatìma ùkùm noba werek hìgì o,” ìlùk a'la akikenem he,

²⁵ at a'la hinago mene hukalasigin. Hukalaganem he, oabùt isong hogo at ebe soma ìlìk Ala hogoratì logolìk he, mel igin: “Eberogoat Ala hinom welagep o,” ìlùk yogohisegein o.

Ala againapùrì atogorek logolìk hagatì logousak wene

²⁶ Halok he, nerùgì nagaiya'lak. Nìkì'nogo hagatì logousak. Yì'nogo hagatì logousak o. Hit hinebe atogothìlìk he, at aike nen Ala awfmi isa igik, at aike nen wene sekek hogo yakùlhisìgìk, at aike nen Ala amùn elema wene yogohisìgìk, at aike nen wene inane hinokot mene ba elalinat ikenem, at aike nen hit hinane ba higit hogo yogohisìgìk, ìkì logolìk he, Ala againapùrì inetaùken ago warogo yì wene tì wene atì obogat elok atì'nogo ìkì logousak o.

²⁷ It aike nen, inane inokot mene ba elalinat uogolùk halok he, inebe pìre he a? Hìnagan he a, umo re, hano. Ekaminogo lek. Mene re, hobugalep ikenem he, at aike nen hit hinane ba higit hogo yogohisìkì logousak hano.

²⁸ Meneat he, at aike hit hinane ba higit hogo yogohisasak mene ebe lek halok he, it inane inokot mene elalinat egarek mene atì, Ala againapùrì atogorek were'ma atoma inane legat logousak. Inane legat logolìk he, Ala at yogotì logouak o.

²⁹ Nen, Ala ane yogoisagarek mene atì inebe pìre nen a? Hìnagan nen a, yogohisasak. Atì'nogo yogohisiko kolek he, hit aike nen, wene higit ìlì'logo ìgìk, kolo ìlì'logo igik, oabùt palhì logousak o.

³⁰ Atì'nogo meneat he, Ala nen at aike hùrek welaga mene wene a'la kagalhe halok he, yogohisoak en he, at alep yogohisìkì laga mene atì re, ane lek kamo usak o.

³¹ Atì hagat he, hinebe obogat en wene yakùlogo hinelu agìk, hinetaùken kagauk ìgìk, uogolùk he, hinebe obogat omakìtek omakìtek hobugalep Ala ane pak hogo yogoisìkì logousak o.

^32-34 At Ala re, yùgùneke-yùgùneke hagaterek mene hùk. At he, we, higit hogo nek hagaterek atì nen he, it ap Ala ane yogoisagarek mene atì, wene yogoisìkì logouagalùk at Areagùn nen inoabùt wogisikerek mene atì ese arìk logolìk, inokawerek enat, “An yì'nogo yogoisak, tì'nogo yogoisak,” ìlùk ìkì logousak o. Wene Ala nen ninasuk wasike wene a'nogo ba helal waganogo hìkì logolìk he: “Hìmì re, inane legat inawe a'ma logousak,” ìlùk isike atì nen he, Ala againapùrì o yì awì tì awì atogothìlìk welagaikarek hak, hit hinebe atogorek logolìk he, hìmì inane legat logousak o. Inane sagalhì logousak lek.

³⁵ Mene re, it hìmì nen wene aike yakùluogolùk halok he, Ala againapùrì atogorek were'ma, inane sagalusak lek atì nen he, inaua lìlìk inokawerek inagonì inoba hinok wanusak o.

³⁶ Ala ane o yì awì tì awì lìlì'logo atì re, ero hit nogo? Ì a, at he, hit hesik enek hinoba yogohisa wagaukwa nogo a.

³⁷ At aike nen he: “An nen Ala ane yogohisoagalùk, Ala Areagùn nen noabùt atì wo'netomo,” ìgìk, i a, at he, “Hùnogo mene hagasuagalùk wo'netomo,” ìgìk, ike halok he, at en he, “Wene Paùlùt en ike atì re, ninoe Etagepogot en ninasuk wasike mene, helal waganogo ninoba lakhei waga atì,” ìlùk at hùthìlìk wanuak o.

³⁸ Meneat; he, wene atì wanhì'lek heraksike halok he, hit en ap atì ebe wanhì'lek heraksìkì logoino.

³⁹ Yogo. Nerùgì nagaiya'lak. Ala ane pak hogo yogoisìkì logouogolùk esinethìlìk hinomamerogo hagatì logoino. Mene re, it aike nen inane inokot mene elalinat uogolùk ega halok he, wene palusak lek o.

⁴⁰ Mene re, yì wene tì wene higit hogo ìgìk, sekek hogo ìgìk, ìkì logoino.