1 KORÌTÙT 13 - Ala Ane Wene Ket Mene Warogo Wo'ninapike Wene

“Apùnì inebe hinetawìrogo logousak,” ìlùk yogoisasike wene

¹ An nen apùnì inùkùl etage lopok aike inane ba ìgìk, malaikat Ala nen yoko pelaksa wagarek mene amanogo inane ba ìgìk, ìkì logolìk meneat he, apùnì inebe netawìrogo logogin lek halok he, an we, sogoloak hùko mene hamùlùk mene i a'la hinago le'ma ane pak ìgìk, telang ìgìk, ikerek hak ìkì logousak o.

² Nen, Ala ane hano motok yogoisìgìk, wene apùnì inamùn elema hinago welagarek mene atì obogat nelu agìk, yì wene tì wene aike obogat neluat welagìk, netaùken Ala ba motok hìpìrethìlìk he, tom aike obùlù'mo nen tukwak hogo wele'ma wo'laka loagalùk yogosusak elok welagìk, ìkì logolìk meneat he, apùnì aike inebe netawìrogo logogin lek halok he, we tùlemat ìkì logousak o.

³ Yì mene tì mene an nekim mene obogat apùnì inagarok lek mene sùpùrisìgìk, nebe motok warogo halì noagalùk neram enat ìgìk, ìkì logolìk meneat he, apùnì aike inebe netawìrogo logogin lek halok he, we, tùlemat alemarogo ìkì logousak o.

⁴ Apùnì aike inebe inetawìrogo logolìk he, inepe morogo welagaikarek atì. Atì'nogo inetawìrogo logolìk he, inoabùt hano, inabuage lek logolìk, inokawerek en sebirakìgìk, hogorakìgìk, egarek lek atì.

⁵ Atì'nogo logolìk he, inekalì lek hagatìk, yì mene tì mene inokawerek hesik esinethìgìk, ina'mage hakoksek welagìk, it aike nen weak hagarinapenem he, wene eken hìlìk welagìk, egarek lek.

⁶ Atì'nogo inetawìrogo logolìk he, it aike nen higit hogo hagatì'lek kolo hagatenem ina'la hai hakìgì'lek logolìk, higit hagatenem enek ina'la hai hakagarek.

⁷ Inetawìrogo logolìk, yì wene tì wene inoba aganem he, inepe morogo welagìk, inetaùken Ala oba hìpìrìk welagìk, hano asigin ìlùk ina'la hai hakìgìk, inetaùken hapuk hogo welagìk, egarek atì.

⁸ Atì'nogo ìkì logopik he, ineki aike sapùl he, Ala ane yogoisagarek atì mene hobuk yogoisasak lek agìk, apùnì inane inokot mene elalinat egarek atì mene hobuk usak lek agìk, yì wene tì wene inelu welagaikarek mene atì hobuk inelu asusak lek agìk, ugun meneat he, apùnì inebe inetawìrogo welagaikarek atì mene nek, lek agì'lek motok logogin o.

⁹ Atì re, o yogotak he, wene ato he'na nek ninelu welagìk, Ala ane ato he'na nek yogoisìgìk, ìkì lago atì.

¹⁰ Mene re, hobuk ebe abit mene haga'laganem en, yogotak he'nakwe nek werek mene atì lek asigin o.

¹¹ An nebe yekerek oba re, nane yekerùgì inane mene ìgìk, netaùken yekerùgì inetaùken mene welagìk, na'la yekerùgì ina'la ebetarek mene ebetìk, ìkì lagagi meneat he, yogotak nebe nalùge agagisik he, noabùt yekerùgì inoabùt mene atì arat heraksasigi o.

¹² Yogotak ya re, inapùnak mùm werek kolek ineileken lakhagarek hak, agasabeke mene lakhìkì lago. Meneat he, hobuk ebe mene tùkùm hogo lakhogoin o. Yogotak he, wene ato he'na nek ninelu welago. Meneat he, hobuk at Ala nen an nebe tùkùm hogo elu atì hak, an nen at Ebe tùkùm hogo nelu asigin o.

¹³ Motok logogin he, ninetaùken Ala ba hìpìrìk welagorek atì inom, hano asigin ìlùk nina'la hai hakogorek atì inom, apùnì inebe ninetawìrogo welagorek atì inom, wene ebe hìnagan atemat logogin. Meneat he, ebe esin hake re, apùnì inebe ninetawìrogo logousak atìat o.