1 KORÌTÙT 11 - Ala Ane Wene Ket Mene Warogo Wo'ninapike Wene

¹ An Karìsùt oabùt waganogo hagatì lagì hak, hit en he, an noabùt waganogo hagatì logoino o.

Hìmì inasu inùkùl oba lakùlìk logolìk sapan ìkì logousak wene

² Wene yì hesik tì hesik an noba ebetì logolìk, an yakùlnesukwama hit yakùlhisasigi mene hesogoat welagep atì nen hogothinapì lagì o.

³ Atì'nogo meneat he, wene omakeat aike yì hinelu asusak mene akìkì lagì. Nit ap ninebe lopok, ninoe Etagepogot Karìsùt metek were'ma awe a'ma logousak. Nen, hìmì inebe lopok he, inagonì kain metek were'ma inawe a'ma logousak. At Karìsùt atì re, opase kain Ala metek were'ma awe a'ma welagarek o.

⁴ Ap inebe lopok inùkùlasu salogo nen apùnì atogore'ma sapan ìgìk, wene yogohisìgìk, ìlì'lùgì halok he, ninoe Etagepogot ekalì wasu hagat hagarì'lùgì.

⁵ Nen, hìmì inebe lopok he, inasu inùkùl oba lakùlhì'lek logolìk apùnì atogore'ma sapan ìgìk, wene yogoisìgìk, ìlì'lùgì halok he, inokawerek en inagonì lopok inekalì wasu hagat hagarì'lùgì. Atì'nogo hagarì'lùgì atì re, inesi heleleng hogo pale'ma hagasu hagat hagarì'lùgìat o.

⁶ At he aike nen asu ùkùl oba lakùlusak abìt halok he, esi palumo re. Hìmì inesi inùkùloak oba pelengerogo palhìk, hororogo palhìk, ikenem inekalì halok he, inasu inùkùl oba salumo hano.

^7-8 Ero ba re, ap inebe ero re, hìmì hùk. Hìmì ero re, ap atì nen he, ap inebe re, Ala hogoratarek mene ebe hake, apùnak hake, ìlùk he, inùkùlasu salusak lek. Meneat he, hìmì re, inagonì hogorinaparek mene inapùnak hake.

⁹ Ala nen he, hìmì hesik, ap elalhike hùk. Ap hesik he, hìmì elalhike o.

¹⁰ Atì nen he, it hìmì it malaikat Ala nen yoko pelaksa wagarek mene amanogo ineilhanem logolìk he, inagonì lopok inane holek welago u hak inasu inùkùl oba lakùlogo logousak o.

¹¹ Atì'nogo meneat he, ninoe Etagepogot ninom hutik logolìk he, hìmì re, ap le'ma inalepma welagìk, ap he, hìmì le'ma inalepma welagìk, logousak lek.

¹² Ero ba, Ala nen he, hìmì ap mene waganogo elalhike atì hak, ap inebe hìmì nen taginaparek. Meneat he, ninebe obogat, ero Ala at o.

¹³ Nerùgì nagaiya'lak. Wene yì hinokawerek hina'la ebe'ni. Hìmì inùkùl oba lakùlhì'lek logolìk, apùnì inebe atogore'ma sapan usak nogo?

^14-15 Ap he, inesi uatek were'ma re, inekalì agarek meneat he, it hìmì re, inùkùloak salogo logouagalùk Ala nen inesi uatek wogisasikomo were'ma re, “Inesi hano,” ìlùk apùnì nen hogorinaparek, ìlùk he, hinokawerek hina'la nen akegesep lek nogo?

¹⁶ Mene re, it aike nen he, atì hesik wene palusak werek halok he, nit mel, Ala againapùrì o yì awì tì awì atogotarek mene mel, hùnogoat hagatì'lek, atì'nogoat hagatorek o.

“Ninoe Etagepogot oba eberek logouogolùk eken amusu kolo nìkì'lek, tì'nogo nìkì logousak,” ìlùk yakùlisasike wene

¹⁷ An nen, wene yì hinasuk watì logolìk he, hogothinabusak lek mene aike werek o. Hit hinebe atogotì lagep atì ba, hano arì'logo hùk. Weak arì'logo o.

¹⁸ Hit wene alebagìk yogohisegein akìgì re, yì. Apùnì nen he, “It Ala againapùrì Ala awì wùrì'mo atogothìlìk, it-it inebe hùlì warì'lùgì o,” ìlùk yogonetama wene atì nasuk holhìrìk, ato eberogoat hagarì'lùgìma ìlùk akìgì o.

¹⁹ Atì'nogo hagatì lagep atì re, at Ala nen, “It atì an nagainapùrì,” ìlùk akìlì'logo mene, enagat asuak en, hinebe hùlì wasusagat o.

^20-21 Meneat he, hit ninoe Etagepogot oba eberek logolìk, eken amusu nùogolùk omakìma atogothìlìk he, hinapùrùk lopok, hinagei lopok, helìlìk, “An tak negein,” ìlùk nìlìk laganem he, it aike lek mene neleat kamo ìgìk, it aike amusu apigat nalùk lùgùlùgì palhìk, ìkì lagep atì re, ninoe Etagepogot apùrùk nìkìk, agei hinago nìkìk, nìkì lagep hùk.

²² Hit atì'nogo hagatì lagep atì nenahalok. Sùpùrùk nìkìk, i nikìk, usak he, hinawì wùrìk le'ma a? Ì a, Ala againapùrì hinom atogotì lagep mene hina'la nen meatsìgìk, inekim lek mene inekalì asuagalùk hagatìk, ìkì lagep a. An wene kì'nogo mene yogohisegein. Hogothinabigin a? Lek o. An wene yì hesik hogothinabigin lek o.

²³ Wene atì'nogo hagatì logousak hesik, ninoe Etagepogot en yakùlnesikomo re, an nen hit yakùlhisasigi atì.

²⁴ Ninoe Etagepogot Yesùt ap inoabùt weak mene nen wasuagalùk, ap aike nen hùako yoko lagaike atì sat, at Yesùt en he, sùpùrùk horoti mene ekim wanhikesik he, Ala hai warogo re, eki nen kùrogo hìlìk he mel yogoisasike: “Sùpùrùk yì an nebeat o. An hit hesigat noasugun atì, noba eberek logouageip en he, yì'nogoat hagatì logoino,” ìlùk agoromì wogisasike.

²⁵ Atì'nogo wogisasikomo arat nasukwama nen he, isoak eken amusu hinago atì'nogoat ekim wanhikesik he, mel yogoisasike: “Namep wulagasogo wa'lasigin atì ba Ala nen wene ket mene warogo wokhinabigin ìlùk isike atì, namep hinago ebe yìat o. Halok, yì'nogo nìkì logolìk he, hobuk an noba eberek logouageip en, yì'nogoat nìkì logoino. 2

²⁶ Sùpùrùk horoti mene yì'nogo nìkìk, eken amusu hinago yì'nogoat nìkìk, ìkì logolìk he, hit en he: Ninoe Etagepogot atì'nogo wasukwa o, ìlùk wene atì it aike yogoisa hak he, yì'nogo at nìkì logoino. Atì'nogo niko were'ma, hùlì, an wesigin atì hùlì lek asigin a,” ìlùk yogoisasike.

²⁷ Hat aike nen ninoe Etagepogot oba eberek logolìk, apùrùk nìkìk, agei hinago nìkìk, nasak lek logolìk neken halok he, ninoe Etagepogot ebe hesik, amep hesik, ùkùm hoba hegein werek o.

^28-29 It aike nen, at Ebe hùthìgì'lek logolìk, sùpùrùk atì mene nìkìk, eken amusu atì mene nìkìk, nìkì logolìk he, inokawerek en ùkùm inoba hakìlì'lùgì atì nen he, hit hinebe lopok he, hinokawerek en hinoabùt palano. Atì'nogo palalùk en, sùpùrùk atì mene nìkìk, eken amusu atì mene nìkìk, usak o.

³⁰ Atì'nogo inoabùt palìgì'lek nìlì'lùgì atì nen, inebe apigat ou wanhìk, maben agìk, iko kolek he, it aike wa'larì'lùgì atì.

³¹ Meneat he, ninokawerek en ninoabùt palogo noko halok he, Ala nen ùkùm ninoba hegein lek o.

³² Atì'nogo meneat he, at Ala nen he, “It atì apùnì etakwe mene inom lapuk hogo ùkùm inoba hìlìk weagarinabusak atì mea o,” ìlùk, at en ninoabùt palogo nen, ninasuk waterek.

³³ Atì nenat, nerùgì nagaiya'lak. Eken amusu atìnogo nùogolùk halok he, apùnì hit mene aike inebe oan werek halok he, serisek logoino.

³⁴ Hit hinebe atogorek were'ma, ùkùm hinoba asinogo nen he, hit aike sùpùrùak nele halok he, hinaua nalùk en wesusak o. Nen, wene aike re, an nebe wagì halok en higirethegein o.