1 KORÌTÙT 10 - Ala Ane Wene Ket Mene Warogo Wo'ninapike Wene

“Hinetaùken tùgì hareken oba hìpìrìk logogùp,” ìlùk yogoisasike wene

¹ Nerùgì nagaiya'lak. Wene yì re, hinokot logousak atì nabìt. Ninopalak obogat he, at Musa nen wogisek ohena atì a'ma kìlìk, i laut yekelek atì oake palogo wùlìbi wagaukwa.

² It en he, Musa opolik nìkì logogun o, ìlùk ima pu hak he, ohena atì a'ma kìgìk, i laut yekelek atì oake palhìk, isukwa atì.

³ Atì'nogo isukwasik, sùpùrùk nekarek hak, at Ala nen omakeat mene elalinat wogisiko kolek, inebe obogat nìkìk,

⁴ i nekarek hak, omakeat mene elalinat wogisiko kolek, inebe obogat nìkìk, ìkì lagaukwa. I atì re, helep Ala nen hesike mene, inom motok nìkì logolìk, a'la nen wùlùpenem nìkì lagaukwa atì. Helep atì ebe re, Karìsùt at o.

⁵ Atì'nogo meneat he, it aike inebe apigat Ala oba lìoksek welagaukwa lek atì nen he, o leimo apùnì le'ma atoma inoasikomo warek ya kapok ta kapok isike atì.

^6-7 Atì'nogo haga'lagaike atì re, it weak mene inamolorogo hagatìk, ap it mene aike inetaùken tùgì hareken oba hìpìrìk logolìk hogoratìk, ìkì lagaukwa atì nen haga'lagaike atì. It atì'nogo hagatì lagaukwa atì hak, nit atì'nogo hagatì logoinogo ìlùk, hùthìkì logolìk ninasuk warìkì logouagalùk wene obogat atì'nogo haga'lagaike atì. It atì'nogo hagatì lagaukwa ìlùk, Ala ane helal yì'nogo waganek werek: “It apùnì inukul etage atì mene nen, sùpùrùk mel, anggur amusu mel, nùogolùk hù'lagaukwasìk, hobuk etaì watìk, pailak haksìgìk, uogolùk melagaukwa,” ìlùk helal waganogo hesukwa.

⁸ Nen, apùnì it mene aike pailak haksìkì lagaukwama, inebe 23.000 nen motok apik omake like heleleng hogoat wa'larìk lagaukwa atì hak, nit atì'nogo ninoasinogo ìlùk, atì'nogo hagatì logousak motok lek o.

⁹ Nen, apùnì it mene aike nen he, “Ninopase Etagepogot a'mage werek nogo?” ìlùk lalogo hagatì lagaukwama, walo aik en palinapì lagaikomo re, wa'larìk lagaukwa atì hak, nit ninoasinogo ìlùk atì'nogo hagasusak motok lek o.

¹⁰ Nen, apùnì it mene aike nen yì anga hù anga palhì lagaukwama re, malaikat pogot oba mene inoaterek mene Ala nen lakhei wagaikomo, apùnì inebe apigat inoasike atì hak, nit ninoasinogo ìlùk, yì anga hù anga palusak motok lek o.

¹¹ It atì'nogo hagarinapikomo inoba haga'lagaike atì obogat he, it apùnì aike hùthìkì logouagalùgat haga'lagaike. Atì'nogo hagarinapike ìlùk helal waganogo hesukwa atì, nit yogotak o wùrep oba asi wago mene yì, ninasuk warìkì logouagalùgat helal waganogo hesukwa.

¹² Atì nen he, hat aike ha'la nen: “An netaùken wurik, metek welagì o,” ìlùk akegen halok he, tukwak hogo lanogo ìlùk hepe hebelogo logoino.

¹³ Hit weak hagasuagalùk hina'la kagaligìlùk waganem aberùgì hegesep atì re, nit apùnì obogat nina'la kagaligìlùk waganem hogorek hagat hìkì lagep o. Meneat he, Ala nen abok yogonisasike higit hogoat hagateresi'mo re, weak hagasuagalùk hina'la kagaligìlùk waganem he, hit en hinetaùken sebelusak mea mene, Ala nen herakhikìgì'lek hakhisek logogin o. Hina'la atì'nogo kagalho kolek, hinetaùken sebeluageip en ìlùk, Ala nen wene higit hogo yogohisegein werek o.

¹⁴ Atì nen he, nerùgì nagaiya'lak. Hinebe netawì e. Tùgì hareken atì wùthìlìk inetaùken oba hìpìrethìlìk hogoratarek atì mene, heraksalùk hese wùlìbi we'ni o.

¹⁵ Wene ìgì atì re, hit hinetaùken werek mene ìlùk yogohisìkì lagì. Halok he, an wene igin yì re, hinokawerek hina'la nen hùthano.

¹⁶ Amusu nìkì logolìk he, Ala hai warogo nìkì lago atì, Karìsùt amep wulagasogo wasukwa atì ninom hutik welago ìlùk nìkì lago lek nogo? Nen, sùpùrùk kurogo nìkì lago atì, Karìsùt ebe ninom hutik logolìk ninebe omakeat welago, ìlùk, kùrogo nìkì lago lek nogo?

¹⁷ Nit ninebe obogat en he, sùpùrùk omakeat mene kùrogo nokorek atì hake ninebe apik meneat he, omakeat o.

¹⁸ Hit en he, it apùnì inùkùl etage Yahuri mene nen hagatarek mene, hùthani o. It en he, Ala ako warerìk heta it nìkì logolìk, heta etu loletarek oba loletì logolìk, Ala inom hutik welagaikarek ìlùk, hinokot nogo?

¹⁹ Halok he, nena igin. Tùgì hareken atì ebe mene igin? At ako waretarek mene kùrìk atì ebe mene igin? Lek o.

²⁰ Wene atì re, ebe yì hesik ìgì. It atì Ala hesik waretarek hùk. We, mokareke oabùt weak mene hesik waretarek. Halok he, hit mokareke oabùt weak mene atì hinom hutik logousak he, an nabìt.

²¹ Hit he, ninoe Etagepogot agei amusu hinago nìkìk, mokareke oabùt weak mene agei hinago nìkìk, usak motok lek o. Nen, ninoe Etagepogot apùrùk nekarek oba nìkìk, mokareke oabùt weak mene apùrùk nekarek oba nìkìk, usak motok legat o.

²² Ninoe Etagepogot a'mage lagauagalùk hagatì lago atì nayùk. At ninom walhamo re, nit ninomame werek nogo? Mea o.

“Hit yì mene tì mene hagatì logolìk, at Ala hogorasuagalùk hagatì logoino,” ìlùk yogoisasike wene

²³ Hit aike nen he, “Yì mene tì mene obogat he, wesa lek. Hano nek,” ìlùk egep atì, eberogoat meneat he, yì mene tì mene atì obogat en ninebe hano asugun hùk. “Yì mene tì mene obogat wesa lek. Hano nek,” ìlùk elok usak meneat he, obogat atì nen he, ninetaùken wurik asigin hùk.

²⁴ Yì mene tì mene hinokawerek hesik esinethìkì logogùp. At he, it apùnì aike hesik esinethìkì logoino.

^25-26 Ala ane helal waganogo hìkì logolìk he: “Kweang yì mel, yì mene tì mene kweangma welagarek mene mel, esewerek he, ninoe Etagepogot o,” ìlùk helal waganogo hesukwa atì nen he, yì wam tì wam kùrìk oko wanharek oba were'ma, Tì'nogo hagata mene, ìlùk hinok wokhìlìk hinetaùken ekin asinogo ìlùk hinoake yùgùn elok oko palogo nasak o.

²⁷ Nen, it apùnì aike inetaùken Ala oba hìpìrethìgì'lek mene nen sùpùrùk isago nùogolùk hinayoko hikenem, hit hina'la nen lasak ìlùk lagep halok he, yì mene tì mene isago hogoin mene wokhisiko halok, hinetaùken ekin asinogo nen he, “Yì an nasak mene a? Lek mene a,” ìlùk hinok inoba wokhìgì'lek nasagat o.

²⁸ Atì'nogo meneat he, it aike nen he: “Yì tùgì hareken ako wata mene kùrìk,” ìlùk yogohisiko halok he, at yogohisike mene atì ebe hesik, etaùken hesik, nagùp o.

²⁹ Atì'nogo ìgì atì re, hit hinokawerek hinetaùken ekin asusak mene hesik ìgì hùk. At aike yogohisegein mene atì etaùken ekin asusak mene hesik ìgì o. Mene re, hit aike nen he, “An yùgùnat nasak werek kolegat he, at atì etaùken ekin asinogo ìlùk an nìkì'lek kamo usak atì nahalok.

³⁰ An Ala hai warogo nikenem he, atì hesik nabok nahalok palusak nogo,” ìlùk ìkì lagep atì,

³¹ an mel yogohisak. Sùpùrùk mel, i mel, nìkìk, yì mene tì mene hagatìk, atì'nogo obogat ìkì logolìk he, apùnì nen Ala hogorasuagalùgat hagatì logoino o.

³² Apùnì Ala againapùrì mene mel, nen, it Yahuri mene lek, Yunani mene lek, inetaùken Yesùt oba hìpìrethìgì'lek mene mel, weak asinogo ìlùk hinoabùt higit hogo hagatì logoino o.

³³ Hit hinoabùt he, an hagatìrek hak hagatì logoino o. An he, yì mene tì mene hagatì logolìk he, nokawerek hanorakagalùk hagatìrek lek. We, apùnì inebe apigat Ala nen telinapenem hano asuagalùk hagatìrek o.