1 KORÌTÙT 1 - Ala Ane Wene Ket Mene Warogo Wo'ninapike Wene

Hai warinapike wene

^1-2 Hit Ala againapùrì o Korìtùt atogotì lagep mene, nerùgì nagaiya'lak. An Paùlùt Ala a'la akasike ba, Karìsùt Yesùt en nayoko hìlìk lakhani wagaike mene a'nogo, ninagaiyak Sosetenet neperak en, wene yì helal waganogo hinoba lakhei wago atì. Hit o Korìtùt mene Ala nen hinayoko hesikomo ninoe Karìsùt Yesùt hinom hutik were'ma, Ala nen, “It yì an nagainapùrì o,” ìlùk hinebe at okawerek hakasikomo welagep. Atì'nogo logolìk, apùnì o yì awì tì awì atoma nen, it mel, nit mel, ninoe Etagepogot Yesùt Karìsùt etage palì'lùgì mene hinom obogat wene yì helal waganogo hinoba lakhei wago atì o.

³ Ninopase Ala, ninoe Etagepogot Yesùt Karìsùt eperak inoabùt hano a'nogo nen, hano mene wokhisìgìk, hinetaùken hapuguthinapìk, ìkì logouak o.

Ala nen Yesùt alisik hogo hano haga'ninaperek wene

⁴ Ala oabùt hano nen, Karìsùt Yesùt alisik hogo, hano mene wokhisikerek atì nen, ninhùp-nanhùp hai wato motok welagìrek o.

⁵ Hit Karìsùt hinom hutik were'ma Ala nen hinebe kainethinapomo welagep. Atì'nogo logolìk, yì wene tì wene Ala ane atì ero hinelu motok agasip he, wene hano motok yakulìsìkì lagep o.

⁶ Wene atì re, Karìsùt hagasike wene yogohisasigi mene, hina'la wanhigisip hinetaùken wurigethegep o.

⁷ Hinetaùken atì'nogo wurigethìlìk, ninoe Etagepogot Yesùt Karìsùt weinam hogo wesigin ìlùk, serogo logolìk he, Ala nen wo'nisikerek mene atì, aike wanhì'lek welagep hùk. We, obogat wanhigisip welagep o.

⁸ Hobuk warep oba ninoe Etagepogot Yesùt Karìsùt wesigin atì like, hit weak were'ma hisa wesinogo ìlùk, at Karìsùt enat hinetaùken wurigethinapi logogin o.

⁹ At Ala nen aput ninoe Etagepogot Yesùt Karìsùt hinom hutik logouageip ìlùk hinayoko hesike atì. Atì'nogo, at oabùt hùpùn mene nen hinayoko hesike atì nen he, ebe asigin ìlùk hinetaùken menenù sikip hogo logousak o.

“Ala againapùrì mene inebe mìkìlusak lek,” ìlùk yogoisasike wene

¹⁰ Atì'nogo meneat he, nerùgì nagaiya'lak. Ninoe Etagepogot Yesùt Karìsùt etage ba, wene aike hinasuk wasik. Hit obogat hinebe mìkìlhì'lek hai warek logolìk he, hinane omakeat mene ìgìk, hinetaùken omakeat welagìk, hina'la nen wene omakeat mene ebetìk, ìkì logoino.

¹¹ Nerùgì, nagaiya'lak. Wene atì'nogo ìgì atì re, apùnì he Keloe were'ma nen wagaikasik he, mel egama nen: “It-irat wene palì'lùgì o,” ìlùk pak hogoat yogonesi wagaikama nen yogohisìgì o.

¹² Wene ebe re, mel ìkì lagep atì hesik ìgì. Hat aike nen he, “An Paùlùt akìt,” ikenem he, hat aike nen he, “An Apolot akìt,” ìgìk, hat aike nen he: “An Kepat akìt,” ìgìk, hat aike nen he: “An Karìsùt akìt,” ìgìk, hinane hùnogo tomok ìkì lagep atì nen ìgì o.

¹³ At Karìsùt atì ebe mìkìlogo aleketek haga'lagama nen a? Ì a, at he, hit hesik an Paùlùt nebe e ba menhanìlìk noasukwama nen a? Ì a, at he, an Paùlùt netage palogo nen ima pelakhinapukwama nen a.

¹⁴ Lek o. An nen he, hit aike ima pelakhinapì'lek akìgì. We, at Kerìsìpùt ho, Kayùt ho, eperak atem enek ima pelaginapigi ìlùk, Ala hai watì lagì o.

¹⁵ Apùnì nen he, “Paùlùt okawerek etage palogo ima pelaginapike,” ìlùk inogo ìlùk he, inebe atem enek pelaginapigi atì.

¹⁶ Ì! O o. An nen Sitepanùt againapùrì inom ima pelaginapigimoat hìgì, Atì'nogo meneat he, it aike pelaginapigi he a? Lek he a. An nokot.

¹⁷ At Karìsùt en he, an nen apùnì ima pelaginapì logouagalùk lakhani wagaike hùk. Lek o. We, Ala ane hano wene atì yogoisìlìk nìkì logouagalùk lakhani wagaike o. At ebe e ba menhìlìk wasukwa a'nogo alema'lasi nogo ìlùk he, an apùnì inawene mene kagauk hogo egarek atì hake ìkì logouagalùk lakhani wagaike lek o.

“Ala awene kagauksek wene re, Yesùt ebe atìat o,” ìlùk yogoisasike wene

^18-19 It apùnì nong asugun mene nen he, mel egarek: “Yesùt wasukwa wene atì re, apùnì kepù mene nen egarek hake ìlì'lùgì o,” ìlùk egarek atì. Atì'nogo meneat he, at Ala nen he: “Apùnì ina'la kagalek mene nen wene kagauk hogo egarek atì, an nen nong-hongotsegein o. Nen, apùnì inapùgùnweak mene nen inapùgùweak hagatarek mene atì, an nen legetsegein o,” ìlùk isikomo re, helal waganogo hesukwama werek atì nen he, nit telninabì'logo mene nen he, “Wene atì re, Ala omame atìat o,” ìlùk ogorek.

²⁰ Apùnì ina'la kagalek mene atì mel, apùnì yì wene tì wene ero inelu mene atì mel, apùnì wene serep aga logolìk inane omame agaikarek mene atì mel, we, tùlemat werek o. At Ala nen he, “Apùnì inawene ina'la kagauk hogo egarek mene atì re, apùnì inetaùken abit mene nen egarek hak ìlì'lùgi o,” ìlùk isike lek nogo?

²¹ At Ala a'la motok kagalek atì nen he, mel isike: “Apùnì kweangma mene nen, inokawerek inawene kagauk hogo egarek atì nen he, an nebe inelu asusak mea o. We, it aike nen wene ebe wene yogoisìlìk nikenem, it apùnì kweangma mene nen akìkì logolìk he, Wene ati apùnì kepù mene nen egarek hake ìlì'lùgì, ìlùk iko kolegat he, it aike nen, Wene ati eberogoat, ìlùk akogoin mene halok, an nen telinabiginat o,” ìlùk oba lìok ìlìk okawerek enat isike.

²² It apùnì Yahuri mene nen ìkì logolìk he: “Wene hùthùgùkwe re, elalin mene aike haga'ni o,” ìgìk, it apùnì Yunani mene nen he: “Wene hina'la kagauk hogo aike yogonisani o,” ìgìk, egarek meneat he,

²³ nit enek he, Karìsùt e ba menhìlìk wasukwa wene a'nogoat yogoisìkì lago. Yogoisikenem he, it apùnì Yahuri mene nen, “Wene atì weak,” ìlùk kobologo heraksìgìk, nen, it apùnì etakwe mene nen he: “Wene atì, apùnì kepù mene nen egarek hake ìlì'lùgì,” ìlùk hebisìgìk, ìlì'lùgì o.

²⁴ Atì'nogo meneat he, it apùnì Yahuri mene lek, Yunani mene lek, Ala nen inayoko hesike mene hùgì nen he: “Ala omame Karìsùt ebe atìat o. Nen, Ala awene kagauksek wene, Karìsùt ebe atìat o,” ìlùk hùthìlì'lùgì.

²⁵ At Ala awene meneat be, it apùnì kweangma mene nen he: “Wene atì, apùnì kepù mene nen egarek hake,” ìlùk egarek meneat he, at Ala a'la motok kagalek o. Nit apùnì ninawene mene nina'la kagauksek ogorek atì, nina'la abit mene nen ogorek o. It apùnì kweangma mene nen he, “At Ala maben,” akagarek meneat he, at omame apik o. Nen, nit apùnì nen he, “Ninomame apik,” akogorek meneat he, maben o.

²⁶ Nerùgì nagaiya'lak. Hinebe nìkì'nogo were'ma Ala nen hinayoko hesike nogo. Hina'la ebe'ni. Apùnì hit mene ina'la kagalek mene mel, inomame werek mene mel, kaintek inetagewerek mene mel, inebe apigat inayoko hesike hùk. Lek o.

²⁷ At Ala a'la nenat he, it apùnì kweangma mene ina'la kagalek mene atì, inekalì wasigìlùk he, apùnì nong-hongsek meneat wenagasogo inayoko hesike. Apùnì inomame werek mene atì, inekalì wasigìlùk he, it maben mene wenagasogo inayoko hesike atì.

²⁸ At Ala a'la nenat he apùnì kweangma mene nen hogoratì logolìk esinethagarek mene atì, legetsagalùk he, it apùnì kweangma mene ina'la nen he, “It atì inebe re, kepù mene, inapsìrì mene, inetage lek mene,” ìlùk akagarek mene atì, Ala nen wenagasogo inayoko hesike.

²⁹ Atì nen he, nit apùnì ninokawerek en Ala eilhanem hogorakasak lek o.

³⁰ At Ala nenat hit Karìsùt Yesùt hinom hutik logouageip ìlùk hikikomo welagep atì. Wene nina'la kagauk hogo logou hak he, Yesùt ebeat wo'nisasike. Atì'nogo wo'nisasikomo, at en he, Ala ninom hobuk ninapotkwe lapulogo hinìgìk, ninebe Ala hesik hinìgìk, telninapìk, ikerek.

³¹ Atì nenat he, Ala ane helal waganogo hìkì logolìk he: “Apùnì nen yì hesik tì hesik hogorakùogolùkk halok he, ninoe Etagepogot hagasike atì hesik hogorasusak o,” i ìlùk isukwama helal waganogo hesukwa.