ZEFANYA 3 - KITTA KAREBA MADECENG

Rihukkunna Yérusalém sibawa ripassalama'na

¹ Tattanroi Yérusalém, kota solang iya pojiyéngngi maronta lao ri Puwangnge sibawa iya tenre'éngngi pabbanuwana muto!

² Macilakai kota iya dé'é namaélo tarimai papparéngngeranna Puwangnge, sibawa dé'to nabati-batiwi pakkamparen-Na, iya dé'é nabbéréyangngi totona lao ri Puwangnge, sibawa dé' naéllau tulung ri Aléna.

³ Sining tomarajana kotaéro padai singa iya mangngaungngé. Sining hakinna padai serigala iya malupué; mangowa senna angkanna muwi séddi buku dé'to gaga nasalai untu' bajana.

⁴ Nabi-nabinna dé' nappunnai rasa tanggung jawa' sibawa dé' nawedding riyatepperi; sining imangngé napanajisi'i aga ripallaing untu' Puwangnge sibawa napasibalékengngi hukkung-hukkunna Allataala untu' asaronna mennang.

⁵ Iyakiya engka mupi Puwangnge ri kotaéro; tuli Napogau'i iya tongengngé sibawa dé' naengka iya salaé. Tungke' élé pasti mabbéréi adélékeng lao ri umma'-Na. Iyakiya tau iya dé'é naissengngi adélékengngé ri kotaéro tette'i pogau'i majaé tennaisseng masirié.

⁶ Makkedai Puwangnge, “Purani Upallennye maéga bangsa; Uwancuru'i kota-kotana mennang, sibawa Upancajiwi sésa-sésa ruttungeng témbo'-témbo'na sibawa manara-manarana mennang. Masino-sinoi kota-kotana mennang dé' monroiwi sibawa masino-sinoi sining lalenna lalenna.

⁷ Pikkiri'-Ku, ‘Makkekkuwangngé pasti napakalebbi-Ka matu umma'-Ku sibawa jampangiwi sininna pakkamparek-Ku. Tentu maréngngerangngi mennang pappagguruwang iya Uwabbéréyangngé lao ri mennang.’ Iyakiya annessana, lebbi mapatoi mennang pogau'i majaé naiya ri yolona.

⁸ Iyakiya jagako! Tajeng bawanni essona tokkok-Ka matu selaku papparape. Saba' purani Upettui untu' paddeppungengngi bangsa-bangsaé sibawa akkarungeng-akkarungengngé untu' pateppai cai-Ku ri yasé'na mennang. Cappui matu sininna linoé nanré api cai-Ku.

⁹ Iyakiya ri munri Upinrai matu atinna bangsa-bangsaéro, angkanna massempajangngi mennang lao ri Iyya bawang, na tenniya lao ri déwata-déwata laingngé. Iyaro bangsa-bangsaé naturusi manek-Ka matu.

¹⁰ Mala polé ri Sudan iya mabélaé, umma'-Ku iya massara-sarangngéro poléi matu sibawa makkasuwiyangeng akkarobangeng lao ri Iyya.

¹¹ Iyaro wettué, éh umma'-Ku, dé' naparelluko masirina nasaba purako maronta lao ri Iyya. Upaddésu'i matu tungke' tau iya matempoé sibawa matanré atié, sibawa dé'na mumaronta'na matu lao ri Iyya ri bulu-bulu-Ku iya mapaccingngé.

¹² Uleppessangngi matu kuwaro mattette séuwaé bangsa iya mariyawa atié, iya mattuwangngéngngi pattuluk-Ku. Weddingngi mennang monro kuwaro.

¹³ Tau Israél iya risésaé mupa, dé'na matu napogau'i majaé muwi lao ri niga; dé'na matu nabbelléna sibawa dé'tona napabengnguwang. Madécéngngi matu mennang sibawa saléwangeng, sibawa dé' namétau lao ri nigi-nigi.”

Elong mariyo-riyo

¹⁴ Eh Israélié, gora-gorano sibawa makkélong! Eh Yérusalém, akkérennuno sibawa sukku ati!

¹⁵ Saba' mappésauwi Puwangnge hukkukko; purai napaddésu sininna balimmu. Rilinrungiko ri arunna Israélié, Puwam-mu muto. Makkekkuwangngé dé'na naparelluko métauna.

¹⁶ Narapii matu wettunna makkedai matti sining tauwé, “Eh Yérusalém, aja' mumétau sibawa makawa atimmu.

¹⁷ Rilinrungiko ri Puwang Allataalamu iya baranié. Pakalako nasaba akuwasan-Na. Marennui sibawa mariyo-riyoi Puwangnge nasaba iko, ri laleng pammasé-Na Nawérékko atuwong mabaru.

¹⁸ Nasaba iko, Aléna makkélongngi marennu pada-pada tau iya mattengngangngé mappésta.” Makkedai Puwangnge, “Abala iya mancangngékko Upaddéi. Atunammu purani Uledda.

¹⁹ Poléi matu wettunna Uwancuru'i tau tenre'ékko, sibawa tau képpangngé Upassalama'i; sininna tau ripalié Upimpingngi lisu. Atunanna mennang Upinrai mancaji alebbireng; kégi-kégi, mala ri sininna linoé, ripakalebbii matu mennang sibawa ripoji.

²⁰ Poléi matu wettunna, pabbanuwamu iya tassiya-siyaé Upimpingngi lisu. Uwébbuko tarompo ri sininna linoé, sibawa adécéngemmu Upalisui matu paimeng.” Puwangnge pura mabbicara.