ZAKHARIA 9 - KITTA KAREBA MADECENG

Riyadélékinna wanuwa-wanuwa sideppéna Israélié

¹ Iyanaé pasenna Puwangnge. Purani Napettui untu' hukkungngi wanuwa Hadrakh sibawa kota Damsyik. Tenniya bawang suku-suku Israélié, iyakiya ibukotanato Siria iyanaritu appunnangenna Puwangnge.

² Hamat iya sipakkaséséngngé sibawa Hadrakh appunnangen-Nato, makkuwatoro kota-kota Tirus nenniya Sidon nasibawang sininna apanrénna pabbanuwana.

³ Purani Tirus patettong sining bénténg untu' aléna sibawa goppo maéga senna ulaweng nenniya péra' angkanna mancaji pada-pada barang biyasaé, pada-pada kessi'é sibawa bungkaé ri lalengngé.

⁴ Iyakiya Puwangnge mébbui matu kasiyasi. Sininna asugirenna kotaéro Nabuwangngi matu ri laleng tasi'é sibawa iyaro kotaé cappui matu nanré api.

⁵ Kota Askélon sibawa Gaza naitai matu sibawa métauna. Naita towi matu Ekron sibawa ateddéngeng sininna paddennuwanna. Ateddéngengngi matu Gaza arunna, sibawa Askélon masino-sinoi matu dé' monroiwi.

⁶ Asdod naonroiwi matu sining tau polé ri bangsa campurangngé. Makkedai Puwangnge, “Tau Filistin iya matempoéro Upaccappui matu.

⁷ Dé'na matu mennang nanré juku iya maddaraé mupa iyaré'ga inanré laing iya riyattéyangngé. Sininna tau iya risalaiyé mancajiwi matu umma'-Ku sibawa riyangga'i selaku bagiyang polé ri suku Yéhuda. Ekron mancajiwi matu anggota umma'-Ku pada-pada tau Yébus-é riyolo.

⁸ Ujagaiwi matu tana-Ku sibawa lawa-lawaiwi sining pasukang laingngé iya maéloé limbangngi. Dé'na Upalaloni matu sining pattenre'é jajai umma'-Ku. Saba' Uwitani anrasa-rasanna mennang.”

Arung iya maéloé polé

⁹ Eh pabbanuwana Sion, arennuno! Eh pabbanuwana Yérusalém, gorano! Itani! Poléi arummu sibawa apakalang! Aléna arung adélé iya tiwié asalamakeng. Iyakiya lettu'i sibawa penno ariyawang ati tonangi kaleddé, sikaju kaleddé lolo.

¹⁰ Makkkedai Puwangnge, “Uwabbéyangngi karéta-karéta musu polé ri Efraim, sininna anyarangngé ri Yérusalém Upallennye'i matu sibawa sininna panaé Uwancuru'i matu. Nappallebbangengngi matu arummu adaméngengngé ri yelle'na bangsa-bangsaé. Polé ri tasi'é lao ri tasi'é makuwasai matu, polé ri Salo Efrat lettu ri cappa'na linoé.”

Ripalisunna keadaanna umma'na Allataala

¹¹ Makkedai Puwangnge lao ri umma'-Na, “Nasaba assijancing iya Uwébbué sibawa iko, assijancing iya ripaessaé sibawa dara akkarobangeng pakkasuwiyang, Upaleppe'i matu ra'ya'mu iya manrasa-rasaé ri laleng appalirengngé pada-pada tau iya riyurungngé ri laleng bujung marakkoé.

¹² Lisuno éh sining tau ripalié, mappunnaino makkekkuwangngé paddennuwang. Lisuno ri onrong allinrungemmu, tette'-Ka matu barakkakiko. Engkalingai: Leppi wékkaduwa Ubarakkakiko matu nasaba sininna anrasa-rasang iya puraé mupéneddingi.

¹³ Upakéi matu Yéhuda selaku panana pabbaranié, sibawa Israélié selaku ana' pana iya sadiyaénna riyattémbakeng. Pabbanuwana Sion Upaké selaku peddang; nasibawang iyaro peddangngé Ugasai matu sining tau Yunanié.”

¹⁴ Nappaitangngi matu aléna Puwangnge lao ri umma'-Na, pada-pada billa'é Nattémbakengngi ana'-ana' pana-Na. Naseppungngi matu Puwangnge tarompé'é tanrang maggasa nainappa joppa malluru ri laleng anginraja polé yattangngé.

¹⁵ Pasti Nawéréngngi allinrungeng umma'-Na, angkanna naulléi mennang caui sininna balié. Pada-pada kelli'na tau iya mabo' ménungngé, makkuwaniro kelli'na mennang ri laleng ammusurengngé. Samanna dara akkarobangeng iya ritiri'é ri yasé'na mézbaé, makkuwaniro darana balinna mennang tuppa.

¹⁶ Rékko narapini iyaro essoé, napassalama'i matu Puwangnge umma'-Na, pada-pada pakkampié passalama'i bimbala'na polé ri abalaé. Mattappai matu mennang ri tanana Puwangnge, pada-pada paramata passigera iya millakkillangngé.

¹⁷ Temmaka kessinna tanana Puwangnge matti, temmaka kessinna sibawa gellona! Kuwaniro tuwo makkompe anggoro'é sibawa gandongngé, mébbui kalloloé sibawa ana'daraé tattamba mawatang.