ZAKHARIA 8 - KITTA KAREBA MADECENG

Majjancinna Puwangnge maélo patettongngi paimeng kota Yérusalém

¹ Puwang Iya Pommakuwasaé mabbéréyangngi iyaé pasengngé lao ri iyya,

² “Macinna senna'ka tulungngi Yérusalém nasaba Uwamaséi senna'i pabbanuwana, nasaba pammasé-Kuro, mapellai atik-Ku lao risining balinna kotaéro.

³ Maélo-Ka lisu lao ri Yérusalém, kota-Ku iya mapaccingngéro, sibawa monro kuwaro. Riissengngi matu kota Yérusalém selaku kota iya matinulué, sibawa Bulu-buluna Puwang Iya Pommakuwasaé riteppui matu Bulu-bulu Mapaccing.

⁴ Ri tana lapanna Yérusalém, tudassi matu paimeng sining néné worowané sibawa makkunraié iya macowa senna'énna angkanna harusu'i joppa sibawa tekkeng.

⁵ Lalel-lalengngé ri kotaé pennosi matu sibawa ana'-ana' iya macculé-culé.

⁶ Iyaro gau'é paitai mustahélé untu' sining iya tuwoé mupa polé ri bangsaéwé, iyakiya dé' namustahélé lao ri Iyya.

⁷ Upassalama'i matu umma'-Ku polé ri wanuwa-wanuwa onronna mennang pura ritiwi,

⁸ sibawa tiwii mennang lisu polé alau sibawa polé ri yajang, angkanna monroi mennang ri Yérusalém paimeng. Mancajiwi matu mennang umma'-Ku na Iyya Allataalana. Uparéntai matu mennang sibawa matinulu nenniya adélé.”

⁹ Makkedai Puwangnge lao ri umma'-Na, “Péwatangiwi atim-Mu! Makkekkuwangngé muwéngkalinga towi ada-ada iya puraé napowada sining nabié wettunna ripasang pandaménna, untu' patettongngi paimeng Bola-Ku.

¹⁰ Ri yolona wettuéro dé'gaga mulléi séwai awatangeng tolinoé iyaré'ga olokolo'é, sibawa dé'to gaga iya amangngé polé ri pagganggunna balié. Purani upattanru bimbala'na séddié tau sibawa laingngé.

¹¹ Iyakiya makkekkuwangngé sining tau iya tuwoé mupa polé ri bangsaéwé Ugaukengngi sisala sibawa riyolo.

¹² Mampoi matu biné sibawa damé. Mabbuwai matu sining pong anggoro'na mennang, mabbéréi matu wassélé tanaé, sibawa teppai matu bosié sibawa maona. Sininna barakka'éro Uwabbéréyangngi lao risining tau iya tuwoé mupa polé ri bangsaéwé.

¹³ Eh pabbanuwana Yéhuda sibawa Israélié! Ri wettu iya labe'é, rékko sining tau laingngé sisulléi sitanro, makkedai mennang, ‘Tennapodo abala iya kennaéngngi Yéhuda sibawa Israélié kenna tokko!’ Iyakiya Upassalama'ko matu, angkanna sining tau laingngéro makkedai matu lao ri pada-padanna, ‘Tennapodo barakka iya nonnoé ri yasé'na Yéhuda sibawa Israélié, nonno towi ri alému!’ Rimakkuwannanaro péwatangini atimmu sibawa aja'na mumétau!”

¹⁴ Makkedai Puwang Iya Pommakuwasaé, “Wettunna néné-nénému mébbu-Ka macai, Upettuiwi untu' hukkungngi mennang sibawa masero. Dé' upinrai iyaro apettuk-Ku, sangadinna pajoppai.

¹⁵ Iyakiya makkekkuwangngé maélo-Ka barakkakiwi pabbanuwana Yérusalém sibawa pabbanuwana Yéhuda. Jaji, aja' mumétau.

¹⁶ Iyanaé parénta-parénta iya harusu'é mupogau': Rékko mabbicarako, powadai iya tongengngé lao ri pada-padammu. Abbéréko apettung pengadilang iya adélé'é sibawa iya tiwié adaméngeng.

¹⁷ Aja' murancanai iya majaé lao ri pada-padammu. Aja' mupowada tanro bellé. Ucéccé bellé sibawa dé'é naadélé nenniya ateddekengngé.”

¹⁸ Puwang Iya Pommakuwasaé mabbéréyangngi iyaé pasengngéwé lao ri iyya untu' umma'-Na,

¹⁹ “Puwasa iya ripogau'é ri laleng uleng iya maeppaé, malimaé, mapitué, sibawa maseppuloé mancajiwi matu ramé-ramé iya pennoé arennuwang sibawa asennangeng untu' pabbanuwana Yéhuda. Eloriwi atongengengngé sibawa adaméngengngé!”

²⁰ Makkedai Puwang Iya Pommakuwasaé, “Narapii matu wettunna pabbanuwa polé ri maéga kota laowi matu ri Yérusalém.

²¹ Pabbanuwa polé ri kota iya séddié makkedai matu lao ri pabbanuwa kota laingngé, ‘Laono mai talao sompai Puwang Iya Pommakuwasaé sibawa méllauwi barakka'-Na. Accowéno ri idi!’

²² Namaéga tau sibawa maéga bangsa iya mawatangngé lao matu ri Yérusalém untu' sompa-Ka Puwang Iya Pommakuwasaé sibawa méllauwi barakka'-Ku.

²³ Ri esso-essoéro seppulo tau laing laowi matu ri séddié tau Yahudi sibawa makkeda, ‘Macinna tokki maupe pada-pada iko; saba' riyéngkalingai makkedaé Allataala barakkakiko.’ ” Puwang Iya Pommakuwasaé pura mabbicara.