ZAKHARIA 7 - KITTA KAREBA MADECENG

Nacellai Puwangnge puwasa iya dé'é natongeng

¹ Ri tanggala seppulona eppa uleng Kisléw, iyanaritu uleng aséra, ri laleng taung maeppaé apparéntanna Arung Darius, mabbérési paseng Puwangnge lao ri iyya.

² Pabbanuwana Bétel pura suroi Sarézer sibawa Régém-Mélék enrengngé ana' buwana lao ri Bolana Puwang Iya Pommakuwasaé untu' méllauwi barakka'-Na.

³ Risuro towi mennang makkutana lao ri imang-ngimangngé sibawa sining nabié, makkuwaé, “Parellu mupi'ga mpatingiwi Bolana Puwangnge sibawa mappuwasa ri tungke' uleng malimaé pada-pada iya puraé ripogau' mattaut-taung ittana?”

⁴ Iyanaé pasenna Puwangnge iya laowé ri iyya.

⁵ Adan-Na, “Palettu'i lao ri sininna pabbanuwana wanuwaéwé sibawa lao risining imangngé, makkedaé puwasaé sibawa awatingeng iya napogau'é mennang ri uleng malimaé sibawa mapitué ri laleng pituppuloé taungngéwé tenniya appakalebbireng untu' alé-Ku.

⁶ Makkuwatoro wettunna mennang manré sibawa ménung, sappai mennang asennangeng riyalé.”

⁷ Iyanro napowada Puwangnge naolai nabi-nabié ri wettu labe'é wettunna Yérusalém riyonroi mupa sibawa madécéng pabbanuwana. Iyaro wettué tauwé dé' na ri désa-désaémmi bawang monro ri seddéna kotaé iyakiya mala ri bagiyang yattang sibawa ri pong bulué ri seddé yajang.

Ateddekeng atié nassabariwi appalirengngé

⁸ Puwang Iya Pommakuwasaé mabbéréyangngi iyaé pasengngé lao ri iyya,

⁹ “Mattaut-taung iya labe'é Uwabbéréyangngi iyaé sining paréntaé lao ri umma'-Ku, ‘Harusu'ko kédo adélé, maressé babuwa sibawa makessing ati lao ri pada-padammu.

¹⁰ Aja' mutenre'i sining jandaé, ana'-ana' béué, sining tau laingngé iya mattette'é ri tengnga-tengngamu, iyaré'ga nigi-nigi ri laleng keadaang masussaé. Sibawa aja'to murancanai majaé lao ri pada-padammu.’

¹¹ Iyakiya matedde atiwi umma'-Ku sibawa dé' sises-siseng namaélo méngkalingai; nalape'i daucculinna mennang kuwammengngi dé' namaréngkalinga.

¹² Napateddekiwi atinna mennang angkanna mancaji sittedde batué. Macai senna'-Ka nasaba dé' naturusiwi sining pappagguruwang iya puraé Uwabbéréyang lao ri mennang naolai nabi-nabié riyolo.

¹³ Dé' ubaliwi sempajanna, nasaba dé'to mennang naéngkalingai wettuk-Ku mabbicara.

¹⁴ Pada-padai anginrajaé, purai Usaring mennang angkanna tarapassai mennang monro ri wanuwa-wanuwa laingngé. Tana iya macommo'éwé mancajini masino-sino dé' monroiwi sibawa makabuttu.”