ZAKHARIA 6 - KITTA KAREBA MADECENG

Pakkitang passalenna eppa karéta musu

¹ Lolongekka pakkitang iya laingngé. Iyaé sisengngé mitaka eppa karéta musu massu polé ri pallawangenna duwa bulu gessa.

² Iyaro sining karétaé nagettengngi anyarang mappasangngé, iya mammulangngé anyarang cella, iya maduwaé anyarang bolong,

³ iya matellué anyarang tembaga sibawa iya maeppaé anyarang balo.

⁴ Makkutanaka lao ri malaéka'éro, “Puwang, aga bettuwanna iyaé sining karétaé?”

⁵ Mappébaliwi, “Joppai mennang lao ri iya eppa sulapa'é puranana mennang mangolo ri Puwang sininna alangngé.

⁶ Karéta musu iya nagettengngé anyarang bolong mattujui ri Babél ri manorang. Anyarang tembagaé mattujui ri yajang sibawa anyarang iya baloé mattujui ri wanuwaé ri yattang.”

⁷ Wettunna massu iyaro anyarang baloé, paitai mennang dé' nasabbara untu' lao paréssai linoé. Makkedai iyaro malaéka'é, “Laono untu' paréssai linoé!” Nanalaona mennang.

⁸ Nainappa mangobbi iyaro malaéka'é lao ri iyya, “Anyarang iya laowé ri Babélro purani napasoro caina Puwangnge.”

Parénta untu' passigera'i Yosua

⁹ Puwangnge mabbéréyangngi iyaé pasengngé lao ri iyya.

¹⁰ Adan-Na, “Alani pakkasuwiyang iya nabbéréyangngé Héldai, Tobia sibawa Yédaya, iyanaritu sining tau iya nappa lisué polé ri appalirengngé ri Babél. Tiwini masitta pakkasuwiyanna mennanro ri bolana Yosia ana' Zéfanya.

¹¹ Polé ri ulaweng sibawa péra' pabbéréna mennanro, ébbuno séddi passigera namupasangngi ri ulunna Imang Lompo Yosua ana' Yozadak.

¹² Palettukengngi makkedaé Iyya Puwang Iya Pommakuwasaé makkeda, ‘Tau iya riyasengngé Cura', mallolongengngi matu ri onrong iya naonroiyé sibawa napatettongngi matu paimeng Bolana Puwangnge.

¹³ Aléna ritu patettongngi matu Bola-Ku sibawa tarima pappakalebbi pada-pada séddié arung, sibawa mapparéntai matu ri yasé'na ra'ya'na. Séddi imang ranrengngi matu sibawa sisamai matu mennang majjama sibawa sipammasé-masé.’

¹⁴ Iyaro passigera'é ritaroi matu ri Bola-Ku untu' paréngngerangiwi Héldai, Tobia, Yédaya, sibawa Yosia.

¹⁵ Poléi matu sining tauwé polé ri onrong iya mabélaé sibawa tulungngi patettongngi Bola-Ku. Narékko tépuni iyaro appatettongengngé, naissengngi matu mennang makkedaé Iyya Puwang Iya Pommakuwasaé pura suroko lao ri mennang. Iya manennaro kajajiyangngi matu rékko tonget-tongengngi mennang pennoiwi parénta-parénta-Ku, Puwang Allataalana mennang.”