ZAKHARIA 4 - KITTA KAREBA MADECENG

Pakkitang passalenna ajé pajjennangengngé

¹ Malaéka' iya puraé mabbicara lao ri iyya'ro polési sibawa tedduka pada-pada teddué tau matinro.

² Makkutanani, “Aga muwita?” Mappébalika, “Séddi ajé lampu polé ri ulawengngé. Ri cappa yasé'na engka onrong minnya'na, sibawa ri mattulilinna engka pitu lampu, iya tungke'-tungke'é mappunnai pitu onrong sumbung.

³ Ri seddé atau sibawa abéyona ajé lampuéro engka duwa pong zaitun.”

⁴ Nainappaka makkutana lao ri malaéka'éro, “Aga iya ripulambangngé ri barab-barangngéro, Puwang?”

⁵ “Dé'ga muwissengngi?” pakkutanana lao ri iyya. Pappébalikku, “Dé' Puwang.”

^10b Makkedai iyaro malaéka'é lao ri iyya, “Iya pitu lampuéro iyanaritu iya pitu matanna Puwangnge iya jagaiyéngngi sininna tompo'na linoé.”

¹¹ Nainappaka makkutanasi ri aléna, “Aga bettuwanna iya duwa pong zaitungngé ri atau abéyona lampuéro?

¹² Aga topa bettuwanna takké zaitun ri benrénna iya duwa pipa ulaweng iya passolo'éngngi minnya zaitungngéro?”

¹³ Pappébalinna ri iyya, “Dé'ga muwissengngi?” “Dé' Puwang.” pappébalikku.

¹⁴ Makkedani, “Iyaro iyanaritu duwa tau iya puraé napilé Puwangnge sininna alangngé sibawa rijello untu' Tumaningiwi.”

Jancinna Puwangnge lao ri Zérubabél

⁶ Iyaro malaéka'é nasuroka palettu'i lao ri Zérubabél pasenna Puwang-ngéwé, “Tenniya nasibawang awatangeng tentara sibawa tenniyato nasibawang awatangeng riyalé mumallolongeng matu, sangadinna nasibawang Roh-Ku.

⁷ Muwi pallawa silloppoé bulué maddésu'to matu polé ri yolomu. Mupatettongngi matu paimeng Bola-Ku, na wettunna mupalénne batu iya mapongngé ri onronna, gorai matu sining tauwé, ‘Anengka makkuwa gellona!’ ”

⁸ Nainappa polési paseng iya laingngé polé ri Puwangnge.

⁹ Adan-Na, “Purani napalénne Zérubabél pandaménna Bola-Ku, sibawa napattépui matu sininna bolaéro. Rékko kajajiyangngi iyaro, naissengngi matu umma'-Ku makkedaé Iyya ritu pura suroko Zakharia lao ri mennang.

^10a Engka dé' nabati-batiwi iyaé kajajiyangngé. Iyakiya naitai matu mennang Zérubabél patterui appatettongenna Bola-Ku, sibawa marennui matu mennang.”