ZAKHARIA 3 - KITTA KAREBA MADECENG

Pakkitang passalenna Imang Lompoé

¹ Ri laleng pakkitang iya laingngéssi, nappaitangngi Puwangnge lao ri iyya Imang Lompo Yosua mattengngang tettong ri yolona malaéka'na Puwangnge. Ri seddéna Yosua, tettonni Sétangngé iya sadiyaénna untu' tenre'i.

² Makkedai malaéka'na Puwangnge lao ri Sétangngé, “Tennapodo Puwangnge hukkukko éh Sétang! Tennapodo iya méloriyéngngi Yérusalém hukkukko. Iyaé tauwé padai appulu iya rigettengngé polé ri luwa' apié.”

³ Tettongngi Yosua kuwaro paké pakéyang macarépa senna.

⁴ Namakkedana iyaro malaéka'é lao ri pabbantu-pabbantué ri surugaé, “Abbéyanni pakéyang carépa iya napaké tauwéwé.” Sibawa lao ri Yosua makkedai, “Purani uwabbéyang dosamu, uwérékko matu pakéyang iya mabarué.”

⁵ Naparéntanni pabbantu-pabbantunna untu' mappasang passapu iya mapaccingngé ri ulunna Yosua. Turuni mennang sibawa puranaro mennang pappakéiwi pakéyang iya mabarué sibawa rijagai ri malaéka'na Puwangnge.

⁶ Nainappa iyaro malaéka'na napalettu adanna Puwangnge lao ri Yosua,

⁷ “Rékko mupatoiwi hukkung-hukkuk-Ku nenniya pogau'i jama-jamang iya uwéréngngékko, untu' matteru weddikko mancaji pamimping ri laleng Bola-Ku sibawa murusu'i seddéna. Uwéngkalingai matu sining sempajammu, pada-pada uwéngkalingai sempajanna sining malaéka iya engkaé ri seddé-Ku.

⁸ Engkalingai éh Imang Lompo Yosua, makkuwatoro iko imang-ngimang iya mancajiyé sellao-sellaona, iko maneng iyanaritu lambanna wettu mangolo iya makessingngé. Iyaro wettué Usuroi matu atak-Ku iya riyasengngé ‘Cura'’.

⁹ Upalénne'i matu ri yolona Yosua séddi batu massulapa pitu iya Usobbi'é matu sibawa oki-oki. Ri laleng si essoé Uwabbéyangngi matu dosaé polé ri wanuwaéwé.

¹⁰ Rékko narapini iyaro essoé, tungke' tau naobbii matu balibolana untu' polé sibawa péneddingiwi adaméngengngé nenniya asaléwangengngé ri tengnga-tengngana palla-palla anggoro'mu sibawa ajukajung aramu.”