YUNUS 4 - KITTA KAREBA MADECENG

Macaina Yunus sibawa paddampenna Allataala

¹ Dé' sises-siseng namasennang Yunus lao ri gau'éro; mala mancaji macayii.

² Nainappa massempajang, “Oh Puwang, dé'ga napura mémeng upowada ri wettu dé'napa ujoppa polé ri bolaku riyolo, makkedaé pasti napogau'i matu makkuwaé? Iyanaro saba'na umatteru lari lao ri Spanyol! Uwisseng makkedaé idi Allataala iya makacuwaé sibawa mamasé, maraja sabbara, malemma sibawa tuli sadiya untu' pinrai rancana pahukkungenna.

³ Makkekkuwangngé, oh Puwang, leppessakka siya maté, saba' lebbi kessing muwi matéka naiya tuwoé.”

⁴ Nappébali Puwangnge, “Dé' muwappunnai alasang untu' mancaji macai.”

⁵ Nainappa lao Yunus ri seddé alauna kotaé, nanatudang kuwaro. Mébbuni séuwa kalampang sibawa maccinaung ri lalenna, nanatajeng towi aga kajajiyang matu ri kota Niniwé.

⁶ Nanapatuwona Puwang Allataala séuwa tanet-taneng makkalolo iya cinaungiyéngngi Yunus angkanna masennang. Mémeng, masennang senna'i Yunus sibawa tanet-tanengngéro.

⁷ Iyakiya bajanana ri subué, mébbui Allataala sikaju lati manréi ure'na iyaro tanet-tanengngé, angkanna makelle.

⁸ Momponana essoé, papoléni Allataala anging pella iya mangirié polé alau. Céddé'i Yunus marenne nasaba nakennai tappa esso iya samannaé tunui ulunna. Pettu paddennuwanni sibawa macinna maté. Adanna, “Lebbi kessing muwi matéka bawang naiya tuwoé!”

⁹ Iyakiya makkedai Allataala lao ri aléna, “Dé' nasipato'ko messé makkuwaro nasaba iyaro tanet-tanengngé!” Nappébali Yunus, “Magi na dé'? Sipato'ka mancaji macai senna gangka maté.”

¹⁰ Nainappa makkeda Puwangnge lao ri aléna, “Iyaé tanet-tanengngé tuwoi ri lalenna siwennié bawang, namakelle'i ri esso rappina; dé' sises-siseng na iko patuwoi iyaré'ga piyarai. Namuni makkuwaro messéko nasaba makelle'i.

¹¹ Masa dé' Umessé pikkiri'i Niniwé, kota iya battowaéro. Saba' ri lainnaé sining olokolo'na iya dé'é naribilanro, kuwaro engkato lebbi 120.000 ana' iya dé'éppa naulléi pasilaingengngi aga iya makessingngé sibawa aga iya majaé.”