YUNUS 3 - KITTA KAREBA MADECENG

Naturusinna Yunus Puwangnge

¹ Untu' mabbékkaduwanna mabbicarai Puwangnge lao ri Yunus.

² Adan-Na, “Laono ri Niniwé, kota battowaéro, namupalettukengngi ra'ya'na, paseng iya Uwéréngngékko.”

³ Nanaturusini Yunus Puwangnge sibawa lao ri Niniwé, séuwa kota iya battowa senna'é; angkanna tellungngesopa riyapparellung untu' jokkaiwi.

⁴ Nauttamakini Yunus kotaéro na puranana joppa puppu esso, mappammulani makkatobba, adanna, “Patappulopi essona, nariyancuru matu Niniwé!”

⁵ Mateppe'ni pabbanuwana Niniwé ri pasenna Allataalaro. Napettuini sininna ra'ya'é untu' mappuwasa, sibawa sininna tauwé, battowa iyaré'ga baiccu, pakéi kaing karung untu' mappaitangngi makkedaé nasesse'i mennang dosa-dosana.

⁶ Wettunna naéngkalinga arung Niniwé iyaro karébaé, masitta'ni nonno polé ri kadéra akkarungenna. Naludunni jumba akkarungenna nanapakéi kaing karungngé, nainappa tudang ri tompo'na awué.

⁷ Napallebbang towi iyaé pappallebbangngé, “Iyaé paréntaé ripassui ri Niniwé polé ri apettunna arungngé sibawa sining menterinna: Sininna tauwé, sapingngé, bimbala'é sibawa olokolo piyara laingngé riyattéyang manré sibawa ménung.

⁸ Harusu'i tauwé sibawa olokolo'é paké kaing karung. Selaku tanrang assessekeng sininna tauwé harusu'i massempajang sibawa mattonget-tongeng lao ri Allataala. Harusu'i mennang napédécéngi ampé-ampéna iya majaé sibawa pangkaukenna iya pennoé dosa.

⁹ Naullé napinrai matu niya'na Allataala sibawa dé'na namacai angkanna dé' tajaji binasa!”

¹⁰ Naitani Allataala pangkaukenna mennang; Naitani makkedaé nasalaini mennang ampé-ampéna iya majaé. Nanapinrani apettun-Na, sibawa dé' najaji hukkungngi mennang.