YUNUS 2 - KITTA KAREBA MADECENG

Sempajanna Yunus

¹ Polé ri lalenna babuwana baléro, massempajanni Yunus lao ri Puwang Allataala. Adanna,

² “Oh Puwang, ri laleng asussakku mangobbika lao ri Iko na mubalika. Polé ri linona tau maté méllauka pattulung, Muwéngkalingai paréllaukku sibawa Mujampangiwi.

³ Muwaggenrungekka lao ri onrong iya maliyungngé, lettu ri borina tasi'é. Kuwaniro nattulilingika solo' uwai, naggeppuwakka bombangngé.

⁴ Makkedaka ri laleng atikku: Purana napaddésu Puwangnge polé ri yolo-Na. Dé'na uwitai matu paimeng bola onron-Na iya mapaccingngé.

⁵ Ménré'ni uwaina tasi'é lettu ri témukku, nasalipurini dolangeng malowang sininna tubukku, nabebbe'ni ulukku lumu-lumu tasi.

^6-7 Luppe'ka lettu ri borina bulué, ri lino iya gerbannaé taggoncing lettu ri paccappurenna linoé. Poso nyawaku ri laleng aléku, nainappa maréngngerakka sibawa mangobbi lao ri Iko. Nalettu'na sempajakku ri alé-Mu, ri laleng Bola-Mu iya mapaccingngé. Nainappa Mupaénré'ka polé ri laleng tasi'é, oh Puwang Allataalaku!

⁸ Sining passompa barahala iya siya-siyaé, nasalai-Ko sibawa dé'na namatinuluna.

⁹ Iyakiya makkélokka matu pappoji-pojiyang untu' alé-Mu sibawa makkasuwiyangekka akkarobangeng untu' alé-Mu. Sininna jancikku upogau'i matu. Iko ritu Puwang iya mappassalama'é.”

¹⁰ Nainappa, nasaba paréntana Puwangnge, iyaro balé naluwani Yunus ri pottanangngé.