YOSUA 9 - KITTA KAREBA MADECENG

Ribengnguwanna Yosua risining tau Gibéongngé

¹ Karéba passalenna sining apakalanna Israélié tassiyani risininna arungngé ri seddé yajanna Salo Yordan – ri bulué, ri ponna bulué, sibawa ritanété mattuttung wiring Tasi Tengngaé lettu sibbéla Bulu Libanon ri seddé manorang; iyanaritu sining arung Hét, Amori, Kanaan, Féris, Héwi sibawa Yébus.

² Sininna arungngéro sipekke'ni nenniya siyempe untu' musui Yosua sibawa umma Israélié.

³ Iyakiya sining tau Gibéon polé ri bangsa Héwié purani naéngkalinga passalenna aga iya napogau'é Yosua lao ri Yérikho sibawa Ai.

⁴ Nanapettuini mennang untu' bengnguwangngi Yosua ri laleng pattékériwi kaleddé'na mennang: karung-karung malaung, sibawa popang-popang anggoro iya majaénna riyébbué polé ri bingkulangngé. Na selaku bokong, napassadiyani mennang banna roti iya marakkoénna sibawa keddi-keddingngé.

⁵ Pakéi mennang pakéyang iya sapé-sapé'é nenniya sapatu iya malaungngénna sibawa ritéppang-teppang.

⁶ Ri laleng keadaang makkuwaéro laoni mennang méwai sita Yosua ri akkémangngé ri Gilgal nainappa makkeda lao ri Yosua sibawa tau Israélié, “Poléki ri wanuwa iya mabélaé maélo mébbu assijancing sibawa Bapa'-bapa'.”

⁷ Iyakiya makkedai sining tau Israélié, “Untu' aga mébbuki assijancing sibawa iko? Naullé onrommu macawé'mi bawang kuwaé?”

⁸ Makkedani mennang, “Macennikki pogau'i agi-agi iya tapparéntangngé Pa'.” Nakkutana Yosua lao ri mennang, “Nigako? Sibawa polé ri wanuwa niga?”

⁹ Nappébali mennang, “Poléki ri wanuwa iya mabéla senna'é, Pa', nasaba riyéngkalingai passalenna Puwang Allataala iya nasompaé Bapa'-bapa'. Riyéngkalingai sininna iya Napogau'é ri Maséré,

¹⁰ sibawa passalenna aga iya Napogau'é lao ri iya duwa arung Amorié ri seddé alauna Yordan, iyanaritu Sihon arung Hésybon sibawa Og arung Basan iya monroé ri Asytarot.

¹¹ Sining pamimpingngé sibawa sininna pabbanuwana wanuwatta suroki passadiya bokong untu' joppa lao mai méwai sita Bapa'-bapa', sibawa powadai makkedaé tunru'ki lao ri Bapa'-bapa'. Rimakkuwannanaro, riyéllauwi asémpoatinna Bapa'-bapa' mébbu assijancing sibawa idi.

¹² Coba Bapa'-bapa' mitai, roti bokottaé. Wettutta joppa, iyaé rotié mapella mupa. Iyakiya makkekkuwangngé, itani! Marakkoni sibawa keddi-keddinni.

¹³ Sibawa iyaé sining popang anggoro'é mabaru mupa wettutta lisekiwi; iyakiya makkekkuwangngé, itani! Sapé'-sapé'ni. Muwi pakéyatta sibawa sapatutta masolang toni nasaba allalengeng iya mabélaéwé.”

¹⁴ Nanatarimani céddé sining tau Israélié inanréna sining tau Gibéongngéro, sibawa temmakkutana ri Puwangnge passalenna gau'éro.

¹⁵ Mébbuni Yosua assijancing assisellaong sibawa sining tau Gibéongngéro, sibawa majjanci untu' dé' naunoi mennang. Mattanro toni sining pamimpinna umma Israélié untu' rupaiwi iyaro assijancingngé.

^16-17 Iyakiya annessana, ri esso matellué purana assijancingngéro riyébbu, narapini tau Israélié kota Gibéon, Kefira, Beerot sibawa Kiryat-Yéarim ri daérana sining tauwéro. Nainappa kaissengeng makkedaé onronna mennang dé' namabéla polé ri Gilgal.

¹⁸ Iyakiya tau Israélié dé' nawedding mpunoi mennang, saba' sining pamimpinna Israélié pura mattanroni lao ri mennang ri laleng asenna Puwang Allataalana Israélié. Mannoko-noko'ni sininna umma Israélié passalenna gau'éro lao risining pamimpinna mennang.

¹⁹ Iyakiya mappébaliwi iyaro sining pamimpingngé, “Aga maélo ripogau'! Purani majjanci lao ri mennang sibawa mattanro ri laleng asenna Puwang Allataalana Israélié. Makkekkuwangngé dé'na weddikki pogau'i majaé lao ri mennang.

²⁰ Dé' naweddiki mpunoi mennang saba' purani majjanci; narékko riyassakkarengngi iyaro jancié nahukkukki matu Allataala.

²¹ Jaji, leppessanni mennang tuwo, iyakiya idi manengngé pancajiwi mennang pappuwé aju sibawa pallémpa uwaita.” Makkuwaniro nappétangngareng iyaro sining pamimpingngé.

²² Nainappa riyobbi sining tau Gibéongngé mangolo ri Yosua. Makkedai Yosua, “Magi mubelléki sibawa makkeda makkedaé mabéla senna wanuwammu, padahal kuwaé bawang?

²³ Nasaba kédo makkuwakoro, Allataala hukkukko. Tuli mancaji atai matu bangsamu, pappuwé aju sibawa pallémpa uwai untu' Bolana Allataalaku.”

²⁴ Nappébali mennang, “Kédo makkuwaki'ro nasaba riyéngkalingai makkedaé Puwang Allataala iya nasompaé Bapa' pura nasuroi Musa, atan-Naro, mpéréngngi Bapa' sininna wanuwaéwé enrengngé mpunoi sininna pabbanuwana ri wettunna Bapa' malai iyaro tanaé. Métau senna'ki rékko riyunoki, iyanaro saba'na tapogau'i iya manennaé.

²⁵ Makkekkuwangngé ri lalekki akuwasanna Bapa'. Gaukenni situru iya naitaé Bapa' makessing.”

²⁶ Na iyanaé napogau' Yosua: nalinrungiwi sining tauwéro sibawa dé' napalaloi tau Israélié mpunoi mennang.

²⁷ Iyakiya ripancajiwi mennang ata – iyanaritu pappuwé aju sibawa pallémpa uwai untu' tau Israélié sibawa untu' mézbana Puwangnge. Lettu makkekkuwangngé napogau' mupi mennang iyaro pallaungngé ri onrong iya napilé Puwangnge mancaji onrong assompanna.