YOSUA 4 - KITTA KAREBA MADECENG

Patettonna seppulo duwa batu papparéngngerang

¹ Lettu manennana iyaro bangsaé ri liweng, makkedani Puwangnge lao ri Yosua,

² “Piléno seppulo duwa tau, séddi tau polé ri tungke suku.

³ Paréntangngi mennang untu' mala seppulo duwa batu polé ri tengnga-tengngana Salo Yordan, persis ri onronna tettong sining imangngé. Suroi mennang méssangngi iyaro batu-batué lettu ri onrong muwakkémaiyé ri wennié matti.”

⁴ Nanaobbini Yosua iya seppulo duwa tau iya ripiléro,

⁵ nainappa makkeda, “Laono ri tengngana Salo Yordan, ri yolona Petti Assijancinna Puwang Allataalamu. Tungke-tungke harusu'i makka séddi batu polé kuwaro – jumellana seppulo duwa batu situru sibawa jumellana suku-sukué ri laleng bangsa Israélié.

⁶ Iyaro batu-batué naparéngngerangiwi matu bangsaéwé lao ri aga iya puraé napogau' Puwangnge. Ri munri rékko makkutanai ana'-ana'mu aga bettuwanna iyaé batu-batué untu' alému,

⁷ sitinajako paissengiwi mennang makkedaé uwaina Salo Yordan pettui wettunna Petti Assijancinna Puwangnge ritiwi malléttoiwi saloéro. Iyaro batu-batué tuli naparéngngerangiwi matu bangsa Israélié lao ri aga iya kajajiyangngé kuwaé.”

⁸ Napogau'ni iya seppulo duwa tauwéro paréntana Yosua. Situru sibawa panunju'na Puwangnge lao ri Yosua, malani mennang seppulo duwa batu polé ri tengnga-tengngana Yordan – jumellana situru sibawa jumellana suku-sukué ri laleng bangsa Israélié – nainappa natiwi ri onrong akkémanna mennang.

⁹ Ri tengnga-tengnganato Yordanro, lappo toni Yosua seppulo duwa batu persis ri onrong natettongiyé sining imang iya mpulééngngi Petti Assijancingngéro. (Iyaro batu-batué engka mupi kuwaro lettu makkekkuwangngé.)

¹⁰ Sining imangngé tette'i tettong ri tengnga-tengngana Yordan narapi iyaro sining tauwé pura napogau' sininna iya riparéntangngéngngi ri Puwangnge naolai Yosua. Iyaro siturui panunju-panunju polé ri Musa lao ri Yosua. Masitta'i umma Israélié malléttoiwi Salo Yordan.

¹¹ Lettu manennana ri liweng, sining imang iya mpulééngngi Petti Assijancingngéro joppani ri yolona mennang.

¹² Situru sibawa iya napparéntangngé Musa, sining pejuwang polé ri suku Rubén, Gad sibawa sitengngana suku Manasyé, lebbi riyoloni malléttoiwi saloé.

¹³ Iya manenna 40.000 tau worowané iya massenjataé sibawa sadiya untu' mammusu. Ri yolona Puwangnge, malléttoi mennang mattuju ri tanété mariyawaé ri seddéna Yérikho.

¹⁴ Iyaro essoé napogau'i Puwangnge gau'-gau' iya mébbuéngngi bangsa Israélié pakalebbii Yosua selaku tau maraja. Gangka tuwona napakalebbii mennang pada-pada napakalebbina Musa.

¹⁵ Nainappa Puwangnge suroi Yosua

¹⁶ paréntangngi sining imang iya mpulééngngi Petti Assijancingngéro kuwammengngi namassu polé ri Yordan.

¹⁷ Napogau'ni Yosua aga iya riparéntangngéngngi ri Puwangnge.

¹⁸ Lettu'na muwa iyaro sining imangngé ri wirinna saloé, iyaro uwaina saloé mammulani massolo paimeng sibawa sapu pada-pada pammulanna.

¹⁹ Lettu'ni umma Israélié ri liwenna Yordan sibawa ri tanggala seppulona uleng mammulangngé, sibawa makkémai mennang ri Gilgal seddé alauna Yérikho.

²⁰ Kuwaniro nalappo Yosua iya seppulo duwa batu iya nalaé polé ri laleng Yordan.

²¹ Nainappa makkeda Yosua lao ri umma Israélié, “Ri munri rékko ana'-ana'mu nakkutanangngi bettuwanna iyaé batu-batué,

²² powadangngi mennang makkedaé nalléttoiwi umma Israélié iyaé Salo Yordan ri yasé'na tana iya marakkoé.

²³ Curitangngi mennang makkedaé Puwang Allataalamu rakkoingekko uwaina iyaro Salo Yordan narapi lettu manekko ri liweng, pada-pada narakkoingetta Tasi Gelaga,

²⁴ kuwammengngi naissengngi sininna tauwé ri linoé pékkugi rajanna akuwasanna Puwangnge. Nanallalengiwi mupakalebbii matu Puwang Allataalamu untu' mannennungeng.”