YOSUA 3 - KITTA KAREBA MADECENG

Nalléttoinna umma Israélié Salo Yordan

¹ Pappa bajanana, Yosua sibawa sininna umma Israélié maélé senna'ni moto, nanasalaiwi onrong akkémanna mennang ri Sitim, nanalao ri Salo Yordan. Kuwaniro mennang makkéma nanatajeng towi wettunna untu' mallétto.

² Labe'nana tellungngesso, mattulilini sining pamimpingngéro risininna akkémangngé,

³ sibawa mabbéréyangngi paréntaéwé lao ri umma Israélié, “Rékko muwitani sining imangngé mpuléi Petti Assijancinna Puwang Allataalamu, sitinajako joppa tona salaiwi onrong akkémangngéwé. Accowériwi Pettiéro,

⁴ iyakiya aja' mujoppa macawé senna ri Pettiéro; accowéri polé ri munri pallawangenna séddi kilo. Nanallalengi muwissenni matu laleng iya harusu'é muwola, saba' dé'pa naengka mulao ri daéraéwé.”

⁵ Nakkeda Yosua lao ri umma Israélié, “Sitinajako paccingiwi alému, saba' baja maéloi Puwangnge pakangka anu makalallaing ri tengnga-tengngamu.”

⁶ Nainappa Yosua paréntangngi sining imangngé kuwammengngi naakkai Petti Assijancingngéro nanajoppa poddiyoloiwi umma Israélié. Napogau'ni mennang paréntana Yosua.

⁷ Nakkeda Puwangnge lao ri Yosua, “Mappammulai essoéwé maéloka pancajiko tau battowa angkanna sininna umma Israélié pakalebbiko sibawa napahanna makkedaé Iyya ranrekko pada-pada Uranrenna Musa.

⁸ Makkekkuwangngé paréntanni sining imangngé iya mpulééngngi Petti Assijancingngéro kuwammengngi lettu'na mennang ri saloé, muttama'i mennang ri laleng uwaina saloéro sibawa tettong ri seddéna wirinna.”

⁹ Nainappa naobbi Yosua sining tau Israélié, sibawa makkeda, “Laono mai méngkalingai aga naparéntakko Puwang Allataalamu.

^10-11 Rékko malluruko matti, pasti Puwangnge paddésu'i tau Kanaangngé, Hét-é, Héwié, Féris-é, Girgasié, Amorié sibawa Yébus-é. Na wettunna Petti Assijancinna Puwang sininna alangngé malléttoiwi Yordan poddiyoloiko, muwitai matu makkedaé Allataala iya tuwoé engkai ri tengnga-tengngamu.

¹² Makkekkuwangngé sitinajako pilé seppulo duwa tau – séddi tau polé ri tungke suku bangsa Israélié.

¹³ Matti rékko sining imang iya mpulééngngi Petti Assijancinna Puwangnge makkellarengngi ajéna ri laleng uwaina Salo Yordanro, pettui matu uwaina massolo; uwai iya massolo'é polé riyulu tattéppo'i matu riséuwaé onrong.”

^14-15 Iyaro wettué mattengngangngi wettu éngngalang, na abiyasanna uwaina Salo Yordan sapui. Wettunna nasalai tau Israélié akkémanna mennang untu' malléttoiwi Salo Yordan, sining imangngé joppai lebbi riyolo nanatiwi towi Petti Assijancingngé. Na wettunna imang-ngimangngéro makkellarengngi ajéna ri laleng uwaina saloé,

^16-17 iyatoro wettué napettu massolo uwaina saloé. Mabéla ri bagiyang ulunna saloé, maddeppungengngi uwaina ri Adam, séddiwi kota iya monroé ri seddéna kota Sartan. Uwaéna ri bagiyang toddang iya massolo'é lao ri Tasi Maté pettu siseng, angkanna naulléi mallétto umma Israélié ri yasé'na tana rakkoé siyolong kota Yérikho. Sining imang iya mpulééngngi Petti Assijancingngéro tette'i tettong ri tengnga-tengngana saloé narapi lettu maneng umma Israélié ri liweng.