YOSUA 16 - KITTA KAREBA MADECENG

Daéra iya rijello'é untu' Efraim sibawa Manasyé Yajang

¹ Jori-jori pakkasésénna tana iya rijello'é untu' wija-wijanna Yusuf, mappammulai ri Salo Yordan seddéna Yérikho, seddé alauna mata-mata uwaina Yérikho lettu ri padang kessi'é. Polé ri Yérikho, iyaro jorié ménré'i lettu ri Bétel ri daéra bulué.

² Polé ri Bétel, iyaro jorié mattujui ri Lus, lalo Atarot, iyanaritu onronna tau Arkié.

³ Polé kuwaro iyaro jorié mattujui lao ri yajang daérana appanna Yaflét, lettu ri Bét-Horon-Toddang, matteru ri Gézer, nainappa maccappa ri Tasi Tengngaé.

⁴ Iyanaro daéra iya riwéréngngéngngi suku Manasyé sibawa Efraim, wija-wijanna Yusuf, untu' mancaji tana appunnangenna mennang.

Suku Efraim

⁵ Mangoloéwé iyanaritu pakkasésénna tana iya riyabbéréyangngé lao ri kaluwarga-kaluwargaé ri laleng suku Efraim. Ri seddé alauna, jori pakkaséséng tanana mennang mappammulai ri Atarot-Adar lettu ri Bét-Horon-Yulu,

⁶ nainappa matteru ri Tasi Tengngaé. Mikhmétat engkai ri seddé manoranna. Ri seddé alauna, iyaro jori pakkaséséngngé bélo'i mattuju ri Taanat-Silo, nainappa nalaloi polé ri seddé alau mattuju ri Yanoah.

⁷ Polé kuwaro iyaro jorié nonno ri Atarot sibawa Naharat, nainappa matteru natuttung Yérikho sibawa maccappa ri Salo Yordan.

⁸ Ri seddé yajang, jori pakkasésénna iyaro Efraim mappammulai ri Tapuah lettu ri ana' Salo Kana, nainappa maccappa ri Tasi Tengngaé. Iyanaro tana iya riwéréngngéngngi kaluwarga-kaluwarga polé ri suku Efraim, untu' mancaji appunnangenna mennang,

⁹ muttama'ni siyagangngaré kota-kota baiccu sibawa désa iya monroé ri laleng daérana Manasyé.

¹⁰ Iyakiya suku Efraim dé' napaddésu'i tau Kanaangngé polé ri daéra Gézer. Iyanaro saba'na lettu makkekkuwangngé monro mupi tau Kanaangngé ri Gézer silaong tau Efraingngé, iyakiya ripassai mennang majjama selaku ata untu' tau Efraingngé.