YOHANES 9 - KITTA KAREBA MADECENG

Yésus mébbui tau butaé paimeng makkita

¹ Wettunna Yésus joppa, mitani tau iya butaé sipongenna jaji.

² Nakkutanana ana'-ana' gurunna Yésus lao ri Yésus, “Bapa' Guru, magi iyaé tauwé narijajiyang buta? Nasaba alénaga madosa iyaré'ga nasaba indo' ambo'na madosa?”

³ Nappébali Yésus, “Butai tenniya nasaba dosa aléna iyaré'ga dosa tomatowanna, iyakiya kuwammengngi naweddingngi naita tauwé akuwasanna Allataala iya majjamaé ri laleng aléna.

⁴ Ri wettu essona mupa, harusu'ki pogau'i jama-jaman-Na iya suroék-Ka. Poléi matu wennié, namuwi séddi tau dé'to naulléi majjama matu.

⁵ Ri wettu engka-Ku mupa ri linoéwé, Iyya'na tajanna linoé.”

⁶ Puranana makkeda makkuwaro mamméccuni Yésus ri tanaé, nainappa napasigaru iyaro méccun-Na tanaé. Nainappa nasapungengngi matanna tauwéro,

⁷ nakkeda lao ri tauwéro, “Laono mupaccingiwi rupammu ri Kolang Siloam.” (Siloam bettuwanna ‘Risuro’.) Nalaona iyaro tauwé paccingiwi rupanna. Wettunna lisu, naulléni makkita.

⁸ Sining balibolana enrengngé sining tau iya puraé mitai maréllau-réllau, makkeda manenni, “Tenniyaga iyaé tauwé biyasa tudang maréllau-réllau?”

⁹ Engka makkeda, “Mémeng aléna.” Iyakiya engkato makkeda, “Tenniya, maélomi bawang pada iyaro tauwé.” Iyakiya aléna iyaro tauwé makkeda, “Iyya'na.”

¹⁰ Nakkeda mennang lao ri tauwéro, “Pékkugi ammulanna naweddikko makkita?”

¹¹ Nappébali, “Iyaro tau riyasengngé Yésus mébbui céddé bungka, nappa nasapuingeng matakku sibawa makkeda, ‘Laono mupaccingiwi rupammu ri Kolang Siloam.’ Nalaona. Na wettunna upaccingi rupakku, weddinna makkita.”

¹² Nakkutana mennang, “Kégani iyaro tauwé?” Nappébali, “Dé' uwissengngi.”

Nasalidikinna tau Farisié lao-laona ajjappangengngéro

^13-14 Iyaro essoé, esso Saba'i wettunna Yésus pasigarui tanaé sibawa méccun-Na untu' mébbui tau butaéro naweddingngi makkita. Na iyaro tauwé, ritiwini ri tau Farisié.

¹⁵ Makkutana towi mennang lao ri tauwéro pékkugi naulléi makkita. Nappébali, “Nataroiwi bungka matakku, nainappa upaccingi naweddinna makkita.”

¹⁶ Engka siyagangngaré ri yelle'na sining tau Farisiéro makkeda, “Dé' nakkullé tau iya pogau'éngngi iyaé assalenna poléi ri Allataala, saba' dé' najampangiwi esso Saba'é.” Iyakiya makkedai tau laingngé, “Masa' naullé tau madosaé pogau'i anu makalallaing pada-padaéwé?” Namompona assisalang pallolongeng ri yelle'na mennang.

¹⁷ Nakkutanasi sining tau Farisiéro lao ri tauwéro, “Aga pallolongemmu passalenna tau iya mébbuékko makkita?” Nappébali iyaro tauwé, “Nabiwi.”

¹⁸ Iyakiya sining panguwasana Yahudié dé' namaélo mateppe' makkedaé iyaro tauwé mémeng butai riyolo namakkekkuwangngé weddinni makkita. Rimakkuwannanaro naobbii mennang tomatowanna,

¹⁹ nanakkutana, “Tongegga iyaé ana'mu iya muwasengngé buta simula jaji? Pékkugi naulléi makkita makkekkuwangngé?”

²⁰ Nappébali indo' ambo'na iyaro tauwé, “Mémeng iyaé ana'ta, sibawa mémeng butai simula jaji.

²¹ Iyakiya pékkugi naulléi makkita makkekkuwangngé, dé' nirisseng. Sibawa niga mébbui naulléi makkita, iyaro dé'to nirisseng. Tanai bawanni aléna, battowani sibawa naullé muto aléna mappébali.”

²² Makkeda makkuwairo indo' ambo'na iyaro tauwé saba' métaui risining panguwasana Yahudié; saba' masséddini mennang, makkedaé tau iya mangakuiyéngngi Yésus selaku Arung Pappassalama'é, dé'na nawedding muttama' ri bola assompangngé.

²³ Iyanaro saba'na nakkeda indo' ambo'na iyaro tauwé, “Battowani, tanai bawanni aléna.”

²⁴ Nainappa naobbisi tau iya butaé onna'ro, nakkeda ri tauwéro, “Attanroko makkedaé makkedako matu iya tongengngé. Riisseng iyaro tauwé tau madosa.”

²⁵ Nappébali iyaro tauwé, “Madosa iyaré'ga dé', dé' uwissengngi. Séddi gau' bawang uwisseng; riyolo butaka, makkekkuwangngé makkitana.”

²⁶ Makkedani mennang ri tauwéro, “Aga napogau' lao ri iko? Pékkugi nagaurekko namuwakkita?”

²⁷ Nappébali iyaro tauwé, “Purani ucuritakko, iyakiya dé' mumaélo méngkalingai. Magi mumaélo méngkalingai? Naullé kapang maélo tokko mancaji ana'-ana' gurun-Na?”

²⁸ Nainappa nakkeda-kedaini sibawa makkeda, “Iko ana' gurun-Nako; idi tenniya! Idi ana' gurunnaki Musa.

²⁹ Riissengngi makkedaé Allataala pura mabbicara lao ri Musa. Iyakiya passalenna tauwéro, dé' riissengngi polé kégi assalen-Na.”

³⁰ Nappébali iyaro tauwé, “Mappahérang senna' makkedaé dé' muwissengngi polé kégi assalen-Na, padahal puraka naébbu wedding makkita.

³¹ Riissengngi makkedaé Allataala dé' naéngkalingai tau madosaé, sangadinna tau iya pakalebbiéngngi Allataala, sibawa pogau'éngngi élo-Na.

³² Sipongenna linoé dé'pa naengka nariyéngkalinga engka tau mébbui tauwé makkita iya butaé simula jaji.

³³ Rékko iyaro tauwé dé' napolé ri Allataala, dé' nakkullé pogau'i agi-agi.”

³⁴ Nappébali mennang, “Aga? Iko pennoé dosa simula jaji, maéloko pagguruki?” Mappammulai iyaro wettué riyattéyanni muttama' ri bola assompangngé.

Buta secara baténg

³⁵ Naéngkalingani Yésus makkedaé purai mennang nattéyang iyaro tauwé muttama' ri bola assompangngé. Nasappani iyaro tauwé nainappa makkeda lao ri aléna, “Mateppe'koga ri Ana'na Tolinoé?”

³⁶ Nappébali iyaro tauwé, “Niga iyaro Puwang? Tulukka tapaissengika kuwammengngi mateppe'ka ri Aléna.”

³⁷ Nappébali Yésus, “Purani muwita, Aléna ritu mabbicara ri iko makkekkuwangngé.”

³⁸ Nakkeda iyaro tauwé, “Mateppe'ka, Puwang.” Nasuju'na ri yolona Yésus.

³⁹ Nakkeda Yésus, “Polé-Ka ri linoéwé untu' madélékiwi; kuwammengngi naulléi makkita tau butaé, na tau iya mulléngngi makkita mancaji butai.”

⁴⁰ Engka siyagangngaré tau Farisi iya engkaé kuwaro naéngkalingai Yésus makkeda makkuwaro, nanakkutana mennang lao ri Yésus, “Akkatta-Mu idi'é buta tokki?”

⁴¹ Nappébali Yésus, “Akkalarapanna butako, dé' mumadosa. Iyakiya saba' makkedako ‘Makkitaki’, bettuwanna iyaro madosa mupo.”