YOEL 3 - KITTA KAREBA MADECENG

Nadélékiwi matu Allataala bangsa-bangsaé

¹ Makkedai Puwangnge, “Iyaro wettué Upalisui matu adécéngenna Yérusalém sibawa Yéhuda.

² Upaddeppungengngi matu sininna bangsaé na-Utiwii lao ri Lompo Angadélékengngé. Nainappa Uwadéléki mennang kuwaro nasaba jana lao ri umma'-Ku nasaba purai mennang natawa-tawa tanana Israélié sibawa napalii umma'-Ku lao ri maddupa-rupang wanuwa.

³ Naundiwi mennang untu' pattette'i niga lolongengngi matu sining tawangengngé. Nabalu'i mennang ana'daraé sibawa kalloloé untu' ripancaji ata. Na ellinna napakéi mennang untu' maccakkuribang sibawa untu' ménung anggoro.

⁴ Maéloko maga-Ka, éh Tirus, Sidon sibawa sininna daéarana Filistin? Macinnakoga makkabale lao ri Iyya? Nah, tarimani pakkabale'-Ku sibawa masitta.

⁵ Purani murampo ulawekku sibawa péra'-Ku, sibawa waramparakku iya mangke'é mutiwii lao ri bola-bola déwatamu.

⁶ Pabbanuwana Yéhuda sibawa Yérusalém mutiwii mabéla polé ri wanuwanna; nainappa mubalu lao ri bangsa Yunanié.

⁷ Makkekkuwangngé Utiwini mennang massu polé ri onrong-ngonronna mubalu, na-Uwale'i matu jamu lao ri mennang.

⁸ Ana' worowanému sibawa makkunraimmu Ubalu'i matu lao ri pabbanuwana Yéhuda, iya balu'éssi matu lao ri Syéba, wanuwa iya mabéla senna'é. Iyya, Puwang, pura mabbicara.

⁹ Appallebbangengngi iyaé pappallebbangengngé lao ri bangsa-bangsaé: Sadiyano untu' mammusu sibawa mappasicoba awatangeng! Pangarai sining pabbaranié sibawa pahlawangngé; paddeppungengngi sininna prajuri'é, namumalluru!

¹⁰ Lanroni mata rakkalamu mancaji peddang, sibawa piso pabbéle'mu mancaji paggajang. Makkuwatoro tau malemmaé harusu'i makkeda, ‘Weddikka mammusu pada-pada tentaraé!’

¹¹ Ayo, poléno sibawa masitta, éh bangsa-bangsa polé ri sininna sulapa'é! Addeppungenno ri lompo kuwaro.” Oh, Puwang, suroi tentara-Mu gasai mennang!

¹² Makkedasi Puwangnge, “Harusu'i sadiya-sadiya bangsa-bangsaé sibawa lao ri Lompo Angadélékengngé. Kuwaniro Iyya Puwang madélékiwi matu bangsa-bangsa sideppéna umma'-Ku.

¹³ Maja senna'i mennang; wéle'i mennang pada-pada gandong matasa'é ri dare'é. Léjja'-léjja'i mennang pada-pada anggoro'é ri laleng apparakeng anggoro iya pennoé narapi tuppa.

¹⁴ Massebbu-sebbu tau engka ri Lompo Angadélékengngé. Saba' kuwaro masitta'i polé Essona Puwangnge.

¹⁵ Mata essoé sibawa kétengngé mancaji mapettangngi, sibawa sining wéttowingngé dé'na nattappa.”

Nabarakkakiwi matu Allataala umma'-Na

¹⁶ Mangngaungngi Puwangnge polé ri Sion, bulu-Na; polé ri Yérusalém magguttui saddan-Na. Taggottang langié sibawa linoé nasaba Aléna. Iyakiya tette'i matu Puwangnge méwaiwi sibawa linrungiwi Israélié, umma'-Na.

¹⁷ “Eh Israélié, makkekkuwangngé muwissenni matu, makkedaé Iyya ritu Puwang Allataalamu. Monroka ri Sion, bulu-Ku iya mapaccingngé. Namancaji kota mapaccing toni Yérusalém, tau laingngé dé'na nauttamakini matu.

¹⁸ Iyaro wettué pennoi matu sining bulué sibawa palla anggoro. Olokolo piyaraé manréi matu wella ri bulu-bulu iya macommo'é. Sining saloé ri Yéhuda dé' matu naengka nacappu uwaina. Engka séddi salo massolo matu polé ri Bolana Puwangnge, sibawa rica'i Lompo Akasia sibawa uwai manyameng.

¹⁹ Mancajiwi matu Maséré padang kessi marakkoé, sibawa Edom mancaji makabuttu, dé' naonroiwi tauwé. Saba' purai mennang nagasa tau Yéhudaé, sibawa mpunoi pabbanuwana wanuwa iya dé'é gaga asalanna.

^20-21 Utuntu'i matu pamale'na darana mennang, tau mpunoéngngi matéi matu Uwéle. Iyakiya Yéhuda sibawa Yérusalém tuli mappangarui matu, sibawa Bulu Sion tette'i matu Uwonroi.”