WAHYU 9 - KITTA KAREBA MADECENG

¹ Nainappa malaéka' malimaé seppungngi tarompé'na, nauwitai séuwa wéttowing sempé' polé ri langié nonno ri linoé. Iyaro wéttowingngé riwéréngngi goncinna balorang amaténgngé.

² Na iyaro wéttowingngé natimpa'ni balorang amaténgngéro, nainappa massuni rumpué polé ri lalenna pada-pada rumpu polé ri dapureng iya battowaé. Mata essoé sibawa bétaraé mapettanni nataro rumpu polé ri peppingngéro.

³ Nainappa polé ri rumpuéro massuni sining incalé iya nonnoé ri linoé. Iyaro sining incalé riwéréngngi akuwasang iya padaé pada-pada iya riwéréngngéngngi dokkéngngé.

⁴ Riyattéyangngi mennang solangiwi wellaé, iyaré'ga aju-kajungngé, iyaré'ga tanet-taneng laingngé. Banna mennang weddingngi nalurui sining tau iya dé'é tanrang ségélé' polé ri Allataala ri linrona.

⁵ Iyaro sining incalé dé' naripalalo mpunoi sining tauwéro, sangadinna nasissai bawang mennang limampuleng ittana. Angéttukeng iya napaompoé passissanna iyaro sining incalé pada-padai angéttukeng iya napaompoé passuina dokkéngngé.

⁶ Ri wettu limampulengngéro, iyaro sining tauwé makkuragai kuwammengngi namaté, iyakiya dé' nawedding mennang maté; macinnai mennang maté, iyakiya amaténgngé mabélai polé ri mennang.

⁷ Tappana iyaro incalé pada-padai riita anyarang iya sadiyaénna untu' mammusu. Ri ulunna engka séuwa iya paitaé pada-pada passigera' ulawengngé. Tappana pada-padai tappa tolinoé.

⁸ Gemme'na pada-padai gemme' makkunraié, sibawa isinna pada-pada isi singaé.

⁹ Arona natongkoi sibawa séuwa iya maéloé pada-pada waju bessié. Oni pannina pada-pada oni karéta anyarang maégaé iya mattengngangngé malluru ri laleng ammusurengngé.

¹⁰ Mappunnaiwi ikko enrengngé passuwi pada-pada dokkéngngé. Na ri laleng ikko'naro monro awatangenna untu' sissai tauwé limampuleng ittana.

¹¹ Mappunnaiwi arung iya paréntaéngngi, sibawa arunna iyanaritu malaéka' iya tanggung jawakiyéngngi balorang amaténgngé. Asenna ri laleng basa Ibrani iyanaritu Abadon; sibawa ri laleng basa Yunani Apolion (iya bettuwannaé “Pakkasolang”).

¹² Acilakang mammulangngé labe'ni. Purairo engka duwa acilakang iya harusu'é polé.

¹³ Nainappa malaéka' iya maennengngé seppungngi tarompé'na. Nauwéngkalingai séuwa sadda polé ri iya eppa sunna mézba ulawengngé iya engkaé ri yolona Allataala.

¹⁴ Iyaro saddaé makkedai lao ri malaéka' ennengngéro, “Leppessangngi iya eppa malaéka' iya tassiyoé ri Salo Efratro!”

¹⁵ Iya eppa malaéka'éro rileppessanni. Purani mennang ripassadiya banna untu' jang, esso, uleng sibawa taungngéro untu' mpunoi tawa tellunna polé ri sininna rupa tauwé.

¹⁶ Ripowadanna makkedaé jumellana sining pasukang makkinnyarangngéro iyanaritu égana duwa ratu juta.

¹⁷ Sibawa ri laleng pakkitangngé, uwitai sining anyarangngéro enrengngé sining tonangiyéngngi. Sining tonangiyéngngi pakéi waju bessi iya macella malluwa'é tappana, magawu pada-pada batu nilangngé, enrengngé maridi balérang. Ulunna sining anyarangngéro pada-padai ulu singaé, sibawa polé ri bawana massui apié, rumpué sibawa balérangngé.

¹⁸ Tawa tellunna polé ri rupa tauwé riyunoi ri iya tellu abalaéro; iyanaritu api, rumpu sibawa balérang iya massué polé ri bawana sining anyarangngéro.

¹⁹ Awatangenna sining anyarangngéro monroi ri bawana kuwaéttopa ri ikko'na. Sining ikko'na pada-padai ula makkulué. Nasibawang sining ikko'naro, iyaro sining anyarangngé nasissai rupa tauwé.

²⁰ Iyakiya sésana polé ri umma' tolinoé iya dé'é nariyuno risining abalaéro, dé'to namaélo salaiwi pangkaukeng limanna muto mennang. Dé' nappésau mennang massompa risining sétangngé, sibawa barahala-barahala ulawengngé, péra'é, tembagaé, batu sibawa ajué iya dé'é naulléi makkita, iyaré'ga maréngkalinga, iyaré'ga joppa.

²¹ Dé'to mennang nasesse'i sining pangkaukenna iya majaé, iyanaritu abbunowangngé, paddissengengngé sibawa mappangaddié enrengngé ménnauwé.