WAHYU 8 - KITTA KAREBA MADECENG

Ségélé' iya mapitué

¹ Wettunna iyaro Ana' Bimbala'é reppa'i ségélé' iya mapitué, masino-sinoi surugaé kira-kira sitengnga jang ittana.

² Nainappa uwita iya pitu malaéka' iya tettongngé ri yolona Allataala, sibawa riwéréngngi mennang pitu tarompé'.

³ Séddi malaéka' laing, iya tiwié séddi addupa-dupang ulaweng, polé sibawa tettong ri yolona mézbaé. Riwérénni maéga senna' kamennyang untu' riyaggugureng risining paddowangenna sininna umma'na Allataala sibawa untu' riyakkasuwiyangeng ri mézba ulawengngé iya engkaé ri yolona kadéra arajangngé.

⁴ Nasibawang sining paddowangenna sining umma'na Allataala, rumpu dupa iya mattengngangngé malluwa'ro mallaso ménré' polé ri limanna malaéka' iya tettongngé ri yolona Allataalaro.

⁵ Nainappa iyaro malaéka'é nala iyaro addupa-dupangngé, nanalisekiwi sibawa api polé ri mézbaé, nainappa naggenrungeng ri yasé'na linoé. Naddalenrunna guttué enrengngé siyanré-anré billa'é, kuwaéttopa mpéwanni tanaé.

Tarompé'-tarompé'é

⁶ Purairo, pitu malaéka' iya makkatenningngé pitu tarompé'ro sadiya-sadiyani untu' masseppung.

⁷ Malaéka' mammulangngé seppungngi tarompé'na, nateppana bosi ése'é sibawa apié iya sikoré dara ri yasé'na linoé sibawa maraja. Cappu tawa tellunna linoé ritunu; makkuwatoro tawa tellunna polé ri aju-kajungngé, enrengngé tungke' wella iya manyilaé.

⁸ Nainappa malaéka' maduwaé seppungngi tarompé'na, nariyaggenrungeng muttama ri tasi'é séuwa iya maloppo senna'é iya paitaé pada-pada bulu iya malluwa'é. Tawa tellunna tasi'é tappinra mancaji dara,

⁹ namaténa tawa tellunna polé ri sininna mahlu'é ri tasi'é; makkuwatoro cappu toni tawa tellunna sining kappala'é.

¹⁰ Nainappa malaéka' matellué seppungngi tarompé'na, naséuwa wéttowing iya battowaé, iya malluwa'-luwa'é pada-pada suloé, sempé' polé ri langié, nanageppai tawa tellunna sining saloé sibawa mata uwai.

¹¹ (Asenna iyaro wéttowingngé “Mapai”.) Natawa tellunna uwai mancaji mapai, namaténa maéga tau nasaba naénungngi uwai iya mapaiénnaro.

¹² Nainappa malaéka' maeppaé seppungngi tarompé'na. Natalleppa'na tawa tellunna mata essoé, tawa tellunna kétengngé, enrengngé tawa tellunna sining wéttowingngé angkanna teddénni tawa tellunna polé ri awatangenna cahayana mennang. Makkuwatoro tawa tellunna polé ri essoé dé'na namacakka sibawa makkuwatoro tawa tellunna polé ri wennié.

¹³ Nainappaka makkita, nauwéngkalingani sikaju manu'-manu' kuwajang iya mattengngangngé luttu ri bétaraé, gora, “Cilaka! Cilaka! Cilakai sininna tauwé ri linoé rékko naéngkalingai iya tellu malaéka' laingngéro seppungngi tarompé'na matti!”