WAHYU 6 - KITTA KAREBA MADECENG

Ségélé'-ségélé'é

¹ Purairo uwitasi iyaro Ana' Bimbala'é reppa'i ségélé' mammulangngé ri yelle'na iya pitu ségélé'éro. Nainappa uwéngkalinga séddi polé ri yelle'na iya eppa mahluéro makkeda, “Laono mai!” Iyaro oni saddanna pada-padai oni letté.

² Nauwakkita, nainappa paita sikaju anyarang puté. Tau iya tonangiyéngngi makkatenningngi séddi pana, sibawa ri aléna riwéréngngi séddi passigera'. Majui selaku séddi tau pakala iya laowé untu' pakala.

³ Nainappa iyaro Ana' Bimbala'é reppa'i ségélé' iya maduwaé, nauwéngkalingai mahlu' iya maduwaé makkeda, “Laono mai!”

⁴ Nainappa sikaju anyarang iya laingngé massusi. Iyaro anyarangngé macella mabbara bulunna. Tau iya tonangiyéngngi riwéréngngi akuwasang untu' pallennye'i keadaang damé polé ri linoé, kuwammengngi nasisullé siyuno rupa tauwé. Nariwérénna sipeppa peddang iya battowaé.

⁵ Nainappa iyaro Ana' Bimbala'é reppa'i ségélé' iya matellué. Nauwéngkalingai mahlu' iya matellué makkeda, “Laono mai!” Makkitana, napaita sikaju anyarang bolong. Tau iya tonangiyéngngi makkatenning sipasang dacing ri limanna.

⁶ Nauwéngkalinga séuwa iya riyéngkalingaé pada-pada sadda iya goraé polé ri tengnga-tengngana iya eppa mahlu'éro. Iyaro saddaé makkedai, “Sibang gandong ellinna gaji siessoé, sibawa tellubbang gandong laingngé ellinna untu' gaji siessoétto. Iyakiya aja' musolangiwi poppong zaitungngé sibawa dare anggoro'é!”

⁷ Nainappa iyaro Ana' Bimbala'é reppa'i ségélé' iya maeppaé. Nauwéngkalingai mahlu' iya maeppaé makkeda, “Laono mai!”

⁸ Makkitana, napaita sikaju anyarang iya makawiyaé. Tau iya tonangiyéngngi riyasengngi Amaténg. Polé ri munri, riyaccowériwi macawé'-cawé' ri Linona Amaténgngé. Akuwasangngé ri tawa eppana linoéwé riyabbéréyangngi lao ri mennang, kuwammengngi naulléi mabbuno naolai musué, naolai wettu akkadérengngé, naolai saiyé enrengngé naolai olokolo' masekkangngé.

⁹ Purairo iyaro Ana' Bimbala'é reppa'i ségélé' iya malimaé. Nauwitai ri yawana mézbaé engka nyawa-nyawa tau iya maté riyuno nasaba napéwatangiwi mennang paseng polé ri Allataala naolai asabbiyanna mennang.

¹⁰ Gorani mennang sibawa sadda iya battowaé, “Oh Puwang Pommakuwasaé, iya mapaccingngé sibawa tongengngé! Siyagapi ittana nappa-Ko madélékiwi pabbanuwana linoé enrengngé hukkungngi mennang nasaba purani naunoki?”

¹¹ Tungke'-tungke' mennang riwéréngngi silampa waju iya maputé. Nainappa risuro mennang mappésau cinampe'si, narapi sukkuni jumellana sellao-sellao seperjuwanganna enrengngé saudara-saudarana mennang iya maéloé riyuno pada-pada mennang.

¹² Nainappa uwita iyaro Ana' Bimbala'é reppa'i ségélé' iya maennengngé. Kajajiyanni mpéwang tanaé iya maseroé. Mancaji malotonni mata essoé pada-pada kaing lotong iya makassara'é, enrengngé kétengngé mancaji macella pada-pada daraé.

¹³ Madduttungeng sining wéttowingngé polé ri langié nonno ri linoé pada-pada buwa ara iya dé'é namatasa madduttung polé ri ponna ri wettunna rigottang ri anginrajaé.

¹⁴ Teddéngngi matu langié pada-pada karettasa' rilulungngé enrengngé sininna bulué sibawa puloé ripaésu' polé ri onronna.

¹⁵ Nainappa sining arung ri linoé, sining tomarajaé, pallima-pallimaé, sining tau sugié enrengngé sining tau makuwasaé, kuwaéttopa sining tau laingngé, muwi ata iyaré'ga tau maradéka', iya manenna subbui aléna ri laleng gowa-gowaé enrengngé ri selle'-selle'na batu bulué.

¹⁶ Lao risining bulué sibawa batuéro, gorai mennang, “Geppaki! Subbuki polé ri pakkitanna Aléna iya tudangngé ri yasé'na kadéra arajangngé, enrengngé polé ri caina Ana' Bimbala'éro!

¹⁷ Poléni esso maseroé, makkekkuwangngé nabollowanni mennang caina, nadé' muwi séddi tau mulléi tahang ri yolona mennang!”