WAHYU 19 - KITTA KAREBA MADECENG

¹ Purairo uwéngkalingani séuwa sadda iya pada-padaé sadda merunna tau maégaé polé ri surugaé iya gora-goraé, “Pojiwi Allataala! Allataalata iyanaritu Allataala iya mappassalama'é; Allataala iya marajaé sibawa makuwasaé!

² Adélé'i pangadéléken-Na sibawa mapanréi! Purani napatakkenna pahukkungengngé ri yasé'na cakkuribang iya battowaé, iya solangiyéngngi linoé sibawa appangaddinna. Allataala pura hukkungngi iyaro cakkuribangngé, saba' naunoi ata-atanna Allataala.”

³ Nainappa iyaro saddanna tau maégaé gorasi, “Pojiwi Allataala! Rumpunna api iya mangurengngengngi kota battowaéro maddumpuni matu dé' nappésau!”

⁴ Na iya duwappulo eppa pamimpingngé sibawa iya eppa mahlu' iya mattulilingiyéngngi kadéra arajangngéro tassulunni sibawa sompai Allataala iya tudangngé ri yasé'na kadéra arajangngé. Makkedai mennang, “Aming! Pojiwi Allataala!”

Pésta abottingenna Ana' Bimbala'é

⁵ Nainappa riyéngkalingani polé ri kadéra arajangngéro oni sadda iya makkedaé, “Pojiwi Allataala, éh sininna atanna Allataala, sibawa sininna tauwé – baiccu battowa – iya sompaéngngi Allataala!”

⁶ Purairo uwéngkalingani séuwa pada-pada sadda sikonrong tau iya maéga senna'é; oninna pada-pada bombang iya mangappo'é sibawa pada-pada guttu iya maddalenrungngé. Uwéngkalingai mennang makkeda, “Pojiwi Allataala! Saba' Puwang, Allataalata Iya Pommakuwasaéro mapparéntani makkekkuwangngé!

⁷ Laono mai tamariyo-riyo sibawa marennu; laono mai tapojiwi arajan-Na! Saba' narapini esso abottingenna iyaro Ana' Bimbala'é, sibawa bottin-Na sadiyani untu' akawingen-Na.

⁸ Purani riwéréng pakéyang lénang iya lala'-lala'é untu' napaké.” (Iyaro pakéyang lénangngé iyanaritu sining pangkaukeng makessingngé iya napogau'é umma'na Allataala.)

⁹ Nainappa makkeda iyaro malaéka'é lao ri iyya, “Okii iyaé: ‘Masennangngi tau iya riundangngé lao ri pésta akawingenna iyaro Ana' Bimbala'é.’ ” Nainappa iyaro malaéka'é tambai towi, “Iyanaé biritta tongeng polé ri Allataala.”

¹⁰ Tassulunna ri yolona iyaro malaéka'é maélo sompai, iyakiya makkedai lao ri iyya, “Aja'! Aja' musompaka, sompai Allataala! Saba' iyya atato pada-pada iko enrengngé pada-pada sininna saudaramu iya makkatenning masse'é ri asabbiyanna Yésus!” Saba' asabbiyanna Yésusnaro iya panurungengngéngngi tau iya mabbotoé.

Pakkinnyarang anyarang puté

¹¹ Nainappa uwita tattimpa surugaé, nainappa paita sikaju anyarang puté. Pakkinnyaran-Na riyasengngi Iya Matinulué sibawa Iya Tongengngé. Adélé'i ri laleng pettuiwi pahukkungengngé sibawa ri laleng musu iya Napogau'é.

¹² Matan-Na pada-pada luwa' apié sibawa ri ulun-Na pakéi maéga passigera'. Ri Aléna tarokii séuwa aseng; na banna Aléna bawang missengngi iyaro asengngé.

¹³ Jumba iya Napaké purani riremmé ri laleng daraé. Sibawa riyasengngi “Saddanna Allataala”.

¹⁴ Tentarana surugaé maccowériwi sibawa makkinnyarangiwi sining anyarang puté, sibawa mappakéyang lénang iya maputé mapaccingngé.

¹⁵ Polé ri bawa-Na massui sipeppa peddang iya matarengngé nasibawang iyaro peddangngé nacaui matu bangsa-bangsaé, sibawa mapparéntai matu mennang sibawa tekkeng bessi. Napara'i matu anggoro'é ri laleng apparakeng anggoro caina Allataala Iya Pommakuwasaé.

¹⁶ Ri jumbana sibawa ri poppan-Na tarokii asengngéwé, “Arunna sininna arungngé, sibawa Puwanna sininna puwangngé.”

¹⁷ Nainappa uwita séddi malaéka' tettong ri yasé'na matanna essoé. Nasibawang sadda iya battowaé gorai lao ri sininna manu'-manu' iya luttué ri yelle'é, “Laono mai maddeppungeng untu' hadérékiwi pésta battowaé iya naramé-raméiyé Allataala!

¹⁸ Laono mai manréi jukuna sining arungngé, jukuna sining pallimaé, sibawa jukuna sining pahlawangngé; laono mai manréi jukuna sining pakkinnyarang anyarangngé sibawa jukuna sining anyaranna enrengngé jukuna sininna rupa tauwé, battowa sibawa baiccu, ata sibawa tau maradéka'!”

¹⁹ Nainappa uwita iyaro olokolo'é, sibawa sining arung linoé enrengngé tentarana mennang, maddeppungengngi untu' mammusu méwai iya tonangiyéngngi anyarang putéro sibawa tentara-Na.

²⁰ Na iyaro olokolo'é ritikkenni silaong nabi palsué iya mébbuéngngi sining anu makalallaingngé ri yolona olokolo'éro. (Nasibawang sining anu makalallaingngéro iyaro olokolo'é bengnguwangngi sining tau iya mappunnaiyé tanrang olokolo'éro, sibawa sining tau iya sompaéngngi dato'-dato'na olokolo'éro.) Nainappa iyaro olokolo'é sibawa nabi palsuéro riyabbéyang tuwo-tuwo ri laleng tasi apié iya malluwa'-luwa'é sibawa balérang.

²¹ Sibawa riyunoi tentarana sibawa peddang iya massué polé ri bawana pakkinnyarang anyarang putéro. Napolé tona sining manu'-manu'é manréi sibawa mallaku-laku jukuna mennang iya riyunoéro.