WAHYU 16 - KITTA KAREBA MADECENG

Onrong caina Allataala

¹ Nainappa méngkalingaka sadda loppo polé ri laleng Bolana Allataala makkeda lao ri iya pitu malaéka'éro, “Laono sibawa tiri'i lise'na iya pitu onrong caina Allataalaro ri yasé'na linoé!”

² Laoni malaéka' mammulangngé sibawa tiri'i lise' onronna ri linoé. Naompona sining lettang iya maseroé sibawa maseroé angéttukenna ri sininna tauwé iya mappunnangiyé tanranna olokolo'éro, sibawa sining tau iya sompaéngngi dato'-dato'na.

³ Purairo malaéka' maduwaé tiri'i lise' onronna ri tasi'é. Nancajina uwai ri tasi'é pada-pada darana tau maté, angkanna maténi sininna mahlu' iya tuwoé ri lalenna tasi'é.

⁴ Nainappa malaéka' iya matellué tiri'i lise' onronna risining saloé sibawa risining mata uwai, namancaji darana sininna uwaina.

⁵ Uwéngkalingani malaéka' iya makuwasaiyéngngi uwai makkeda, “Pahukkungeng iya Mupatakkennaé iyanaritu adélé'i, oh Pommapaccingngé, Allataala iya engkaé, sibawa iya engkaénna!

⁶ Purani mennang napatabbollong darana umma'na Allataala sibawa darana nabi-nabié; makkekkuwangngé Muwébbui mennang ménung dara. Mémeng sitinajai iyaro untu' mennang!”

⁷ Nainappa uwéngkalinga séuwa sadda polé ri mézbaé makkeda, “Puwang, Allataala Pommakuwasaé, tongeng sibawa adélé'i sining pahukkungeng Mupatakkennaé!”

⁸ Purairo malaéka' maeppaé tiri'i lise' onronna ri mata essoé, naripalalona mata essoé mangurengngi tolinoé sibawa pellana iya maseroéro.

⁹ Riyangurenni tolinoé ri pellana matire'é, angkanna natanroiwi asenna Allataala, iya makuwasaiyéngngi sining abalaéro. Namuni makkuwaro, dé' namaélo mennang toba' polé ri dosa-dosana sibawa dé' namaélo pojiwi arajanna Allataala.

¹⁰ Nainappa malaéka' malimaé tiri'i lise' onronna ri kadéra arajanna olokolo'éro. Nasininna akkarungeng olokolo'éro mapettanni, naokkoni tauwé lilana nataro peddi.

¹¹ Nainappa natanroiwi mennang Allataala ri surugaé nasaba mapeddii mennang sibawa nasaba sining lettanna. Iyakiya dé'topa mennang natoba' polé risining pangkaukenna iya majaé.

¹² Purairo malaéka' maennengngé tiri'i lise' onronna ri Salo Efrat iya battowaéro. Namarakkona iyaro saloé angkanna sining arung polé alaué naullé joppa molai.

¹³ Nainappa uwita tellu roh maja iya tappanaé pada-pada cuppangngé. Tungke'-tungke' iyaro cuppangngé massui polé ri bawana nagaé, polé ri bawana olokolo'é, enrengngé polé ri bawana nabi palsué.

¹⁴ Mennang ritu sining roh-roh maja iya mébbué sining anu makalallaingngé. Iya telluro roh-é laowi ri sininna arungngé ri sininna linoé sibawa paddeppungengngi mennang untu' mammusu ri Esso iya battowaé, iyanaritu Esso polé ri Allataala Pommakuwasaé.

¹⁵ “Engkalingai! Polé-Ka pada-pada pangaé! Masennangngi tau iya tette'é sadiya sibawa jagaiwi pakéyanna, angkanna dé' najoppa sibawa mallusu-lusu sibawa mancaji masiri ri yolona tau maégaé!”

¹⁶ Nainappa iyaro sining roh-é paddeppungengngi iyaro sining arungngé ri onrong iya riyasengngé Harmagedon ri laleng basa Ibrani.

¹⁷ Purairo malaéka' mapitué tiri'i lise' onronna ri yelle'é. Nariyéngkalingana sadda iya maloppoé polé ri kadéra arajangngé ri Bolana Allataala, iya makkedaé, “Tépuni!”

¹⁸ Nakajajiyanna billa'é siyanré-anré sibawa oni guttué maddalenrung enrengngé marung, kuwaéttopa mpéwang tanaé iya maseroé. Dé' naengka nakajajiyang mpéwang tana pada-padaéro sipongenna ripancaji rupa tauwé. Iyanaé mpéwang tana iya kaminang maseroé!

¹⁹ Kota iya battowaéro mareppa'ni mancaji tellu bagiyang, naancuru' tona kota-kotana sininna wanuwaé ri linoé. Nainappa naéngngeranni Allataala matu Babél iya battowaéro. Na Allataala mébbui ménung anggoro polé ri onrong anggoro'na Allataala – iyanaritu anggoro cai-Na iya malluwa'-luwa'é.

²⁰ Teddéng manengngi puloé, sibawa sininna bulué lennye toni.

²¹ Bosi ése' battowaé, iya tungke'-tungke'é sittane limappulo kilo, sempé' polé ri langié geppai sining tauwé. Nanatanroini mennang Allataala nasaba abala bosi ése' masero senna'éro.