WAHYU 12 - KITTA KAREBA MADECENG

Makkunraié sibawa nagaé

¹ Nainappa paita ri langié séuwa iya makalallaingngé enrengngé dé'gaga padanna. Séddi makkunrai iya pakééngngi mata essoé selaku pakéyanna, mattengngang tettong ri yasé'na kétengngé. Ri ulunna engka séuwa passigera' iya polé riseppulo duwa wéttowing.

² Iyaro makkunraié mattengngangngi mattampu, nasaba narapini wettunna untu' mémmana', nakelli'na nataro peddi.

³ Nainappa paita toni ri langié séuwa iya makalallaingngé. Engka sikaju naga cella iya battowa senna'é iya mappunnaiyé pitu ulu sibawa seppulo tanru'. Tungke' ulunna pakéi séddi passigera'.

⁴ Nasibawang ikko'na nassarénréngengngi tawa tellunna polé risining wéttowingngé ri langié nanaggenrungengngi lao ri linoé. Iyaro nagaé tettongngi siyolong makkunrai iya maéloé mémmana'ro sibawa akkattana memme'i ana'na, ri wettu jajinna muwa.

⁵ Nainappa iyaro makkunraié jajiyanni séddi ana' worowané iya maéloé paréntai sininna bangsaé sibawa tekkeng bessi. Iyakiya iyaro ana'é rirampasa'i polé ri makkunraiéro, nainappa ritiwi lao ri Allataala sibawa ri yolona kadéra arajan-Na.

⁶ Nalarina iyaro makkunraié lao ri padang kessi'é, ri onrong iya puraé ripassadiyangengngi ri Allataala. Ri onrongngéro ripiyarai matu 1.260 esso ittana.

⁷ Nainappa ri surugaé kajajiyanni musué. Mikhaél silaong malaéka-malaéka'na mammusu méwai iyaro nagaé. Na iyaro nagaé ribantui ri malaéka-malaéka'na, méwai Mikhaél.

⁸ Iyakiya ricaui iyaro nagaé. Aléna sibawa sining malaéka'na dé'na naripalalo monro ri surugaé.

⁹ Iyaro naga battowaé riyabbéyanni massu! Aléna ritu iyaro ula macowaé iya riyasengngé Ibillisi' iyaré'ga Sétang, iya bellééngngi sininna linoé. Ribuwanni ri linoé silaong sininna malaéka'na.

¹⁰ Nainappa uwéngkalinga sadda battowaé ri surugaé makkeda, “Makkekkuwangngénna wettunna Allataala passalama'i umma'-Na! Makkekkuwangngénna wettunna Allataala mappaitangngi akuwasan-Na selaku Arung! Makkekkuwangngé Arung Pappassalama' iya najjanciyangngéro nappaitang toni akuwasan-Na! Saba' iya teppuéngngi saudara-saudarata ri yolona Allataala esso wenni, purani ripassu polé ri surugaé.

¹¹ Saudara-saudarata purani nacau iyaro sibawa darana iyaro Ana' Bimbala'é, enrengngé nasibawang biritta tongengngé iya polé ri Allataala iya nabbirittangngé mennang. Macenning atinna makkarobangengngi nyawana narapi maté.

¹² Rimakkuwannanaro, sitinajai surugaé enrengngé sininna iya monroé ri lalenna, mariyo-riyo! Iyakiya cilakai linoé sibawa tasi'é, saba' nonnoni Ibillisi' ri iko sibawa cai iya battowa senna'é, nasaba naissengngi makkedaé céddé mani wettunna monro.”

¹³ Wettunna namaingeki iyaro nagaé makkedaé purani ribuwang ri linoé, mammulani nalellung makkunrai iya puraénna jajiyang ana' worowanéro.

¹⁴ Iyakiya iyaro makkunraié purani riwéréng duwa panni kuwajang iya battowaé, kuwammengngi naluttu lao ri onronna ri padang kessi'é, ri onronna matu ripiyara tellu sitengnga taung ittana, massala polé ri nagaé.

¹⁵ Na iyaro nagaé napporokenni polé ri bawana maéga senna' uwai lao ri makkunraiéro, untu' malirengngi.

¹⁶ Iyakiya tanaé bantui iyaro makkunraié; natimpa'i bawana linoé nanaemme'i uwai iya massué polé ri bawana nagaéro.

¹⁷ Namacai senna'na iyaro nagaé lao ri makkunraiéro, angkanna lao gasai wijanna lainna iyaro makkunraié, iyanaritu sininna tau iya turusiyéngngi sining paréntana Allataala, enrengngé iya mabbéré asabbiyang passalenna Yésus sibawa akuwasan-Na.

¹⁸ Natettong iyaro nagaé ri wiring tasi'é.