WAHYU 11 - KITTA KAREBA MADECENG

Duwa tau sabbi

¹ Purairo riwérékka sipolo aju iya maéloé pada sipeppa tekkeng pangukkuru', nainappa riparéntang, “Laono muukkuru'i Bolana Allataala sibawa mézbana. Bilangngi siyaga tau iya massompaé ri lalenna.

² Iyakiya aja' muukkuru'i seddéna iya ri seddé saliwenna Bolana Allataalaro, saba' iyaro bagiyangngé purani riyabbéréyang lao risining tau iya dé'é naissengngi Puwangngé. Naléjja'-léjja'i matu mennang kota iya mapaccingngéro patappulo duwa uleng ittana.

³ Maélo-Ka suroi duwa tau sabbik-Ku iya mappaké pakéyang mabbarata, sibawa nappallebbangengngi matu mennang birittanna Allataala 1.260 esso ittana.”

⁴ Iyaro duwaé sabbi iyanaritu duwappong zaitun sibawa duwa ajé lampu iya engkaé ri yolona Puwangngé sininna alangngé.

⁵ Rékko nacobai tauwé pogau'i séuwa iya dé'é namakessing lao ri mennang, napolé ri bawana mennang massui api iya paccappuéngngi sining balinna. Nallalengi caraéro, sininna tau iya maéloé peddiriwi mennang riyunoi matu.

⁶ Mappunnaiwi mennang akuwasang untu' tongkoi langié kuwammengngi aja' nateppa bosié ri wettu nappallebbangenna mennang biritta polé ri Allataala. Mappunnai towi akuwasang ri sininna mata uwai, untu' pinrai uwai mancaji dara. Sibawa mappunnai towi mennang akuwasang untu' munrui linoé sibawa sininna rupanna abalaé, uppa-uppanna mennang maéloi pogau'i.

⁷ Puranana mennang nappallebbangeng birittanna, olokolo' iya massué polé ri pepping amaténgngé méwai matu mennang. Nacaui matu mennang sibawa naunoi mennang.

⁸ Na ujuna tattale'i matu ri watattanana kota battowaé, ri onronna Puwanna risalli. Aseng ébara'na iyaro kotaé iyanaritu Sodom iyaré'ga Maséré'.

⁹ Sining tau polé ri sininna bangsaé, sukué, basaé, enrengngé wanuwaé naitai matu ujuna tellungngesso sitengnga ittana, sibawa dé' napalaloi iyaro sining ujué rikuburu'.

¹⁰ Marennui matu pabbanuwana linoé nasaba maténana iya duwa sabbiéro. Naramé-raméiwi matu mennang enrengngé sisulléi matu sikiringeng hadiya, nasaba iya duwa tau nabiéro purani mappapolé maéga passissang lao ri sininna tauwé ri linoé.

¹¹ Labe'nana tellungngesso sitengnga, poléni nappase' atuwong polé ri Allataala sibawa muttama'si ri laleng iya duwa tau nabiéro. Tokkong toni mennang tellong, angkanna sininna tauwé iya mitaéngngi mennang mancaji métau senna'.

¹² Nainappa iya duwa tau nabiéro maréngkalinga sadda battowa iya mobbiéngngi mennang polé ri surugaé, “Laono mai ménré' kuwaé!” Nainappa ri yolona matanna sining balinna, ménré' toni mennang ri surugaé, risalipuri ri ellungngé.

¹³ Na iyaro wettué kajajiyanni mpéwang tanaé iya maseroé. Tawa seppulona bagiyanna polé ri kotaéro ancuru', sibawa pitussebbu tau maté nasaba iyaro mpéwang tanaé. Sining tau laingngé métau senna'ni, nainappa mennang napoji arajanna Allataala ri surugaé.

¹⁴ Acilakang maduwaé labe'ni. Iyakiya itai! Cilaka iya matellué dé'na namaitta naccinrola matu.

Tarompé' mapitué

¹⁵ Nainappa malaéka' mapitué naseppung tarompé'na, nariyéngkalingana ri surugaé sadda battowa senna'é iya makkedaé, “Akuwasang untu' paréntai linoé engkani makkekkuwangngé ri laleng limanna Puwatta enrengngé Arung Pappassalama' iya najjanciyangngé. Mapparéntai matu lettu mannennungeng!”

¹⁶ Na iya duwappulo eppa pamimping iya tudangngé ri kadéra arajanna ri yolona Allataala, tassulunni sibawa sompai Allataala.

¹⁷ Makkedai mennang, “Puwang, Allataala Pommakuwasaé, iya engkaé, sibawa iya engkaénna! Mattarima kasi'ki ri Idi saba' purani Mupaké akuwasam-Mu iya battowaé, enrengngé purani Mupammulai mapparénta!

¹⁸ Sining tau iya dé'é naissengngi Puwangngé, majjallo saba' wettunna Mupatabbollong cai-Mu, enrengngé wettunna tona Muwadéléki sining tau maté. Iyanaé wettunna untu' mpéréngngi saro ata-atam-Mu, sining nabié, sibawa lao ri sininna umma'-Mu, iyanaritu sininna tauwé iya massompaé ri Iko, battowa iyaré'ga baiccu. Iyanaé wettunna untu' mancuru'i sining tau iya mancuru'éngngi linoé!”

¹⁹ Natattimpa'na Bolana Allataala ri surugaé, enrengngé paitani Petti Assijancingengngé ri lalenna. Nasiyanré-anré billa'é enrengngé sadda guttué maddalenrung sibawa mango, kuwaéttopa mpéwang tanaé sibawa bosi ése' iya maseroé.