ULANGENG 7 - KITTA KAREBA MADECENG

Umma napiléna Allataala

¹ “Puwang Allataalamu tiwiko matu ri wanuwa iya maéloé muwonroi, sibawa maéga bangsa ripaddésu matu polé kuwaro. Ri yolona matammu Napaddésu'i matu pitu bangsa iya lebbi battowaé sibawa lebbi mawatangngé naiya iko, iyanaritu sining tau Hét-é, Girgasié, Amorié, Kanaangngé, Féris-é, Héwié sibawa Yébus-é.

² Rékko nabbéréyangngi Puwang Allataalamu iyaro bangsa-bangsaé ri laleng akuwasammu sibawa mucaui mennang, uno manengngi mennang. Aja' muwamaséiwi mennang iyaré'ga mébbu assijancing sibawa mennang.

³ Dé' naweddikko kawing sibawa mennang, sibawa aja' mupalaloi ana'-ana'mu kawing sibawa mennang,

⁴ kuwammengngi dé' mennang napabélaiwi ana'-ana'mu polé ri Puwangnge untu' massompa déwata-déwata laing, macayii Puwangnge Nanapaccappuko matu masitta.

⁵ Rimakkuwannanaro, ruttungngi sining mézbana iyaro bangsa-bangsaé, ancuru'i alliri-alliri batu iya naangga'é mennang makare', léttungngi lambang-lambang Asyéra, sibawa tunui dato'-dato' barahala iya nasompaé mennang.

⁶ Pogau'i iya manennaro nasaba appunnangennako Puwang Allataalamu. Polé risininna bangsaé ri tompo'na linoé iko ritu napilé Puwang Allataalamu untu' mancaji umma'na iya dé'é padanna.

⁷ Napojiko sibawa napiléko Puwangnge, tenniya nasaba lebbi battowako naiya bangsa-bangsa laingngé; sitongenna iko iyanaritu bangsa iya kaminang baiccu'é ri tompo'na linoé.

⁸ Iyakiya Puwangnge piléko nasaba namaséiko sibawa macinnai rupaiwi janci iya Naébbué sibawa néné-nénému. Iyanaro saba'na purako Napassalama sibawa akuwasang iya battowaé sibawa paleppe'ko polé ri angatangenna arung Maséré.

⁹ Engngerangngi makkedaé Puwang Allataalamu iyanaritu séddi-séddinna Allataala, na Aléna Allataala iya matinulué. Puwangnge pennoiwi jancin-Na sibawa mappaitangngi pammasé-Na iya tette'é narapi sisebbu assossoreng lao ri tau iya pojiyéngngi sibawa turusiwi parénta-parénta-Na.

¹⁰ Iyakiya dé' nabata-bata hukkungngi mennang iya benciyéngngi.

¹¹ Jaji, turusini sininna hukkung iya upalettukengngékko essoéwé.”

Barakka lao ri tau iya turué

¹² “Rékko mupuriyatiwi iyaro parénta-paréntaé, sibawa pogau'i sibawa matinulu, matinulu towi matu Puwang Allataalamu lao ri assijancing iya Naébbué sibawa iko. Nappaitangngi matu pammasé-Na iya tette'é ri iko, pada-pada iya Najjanciyangngé lao ri toriyolomu.

¹³ Maéloi mamaséiko sibawa barakkakiko, angkanna maéga ana'mu sibawa tattamba-tamba jumellamu. Maéloi barakkakiwi sining dare'mu, angkanna powassélé gandong, anggoro sibawa minnya zaitun. Maéloi barakkakiko angkanna maéga saping sibawa bémbé bimbala'mu. Sininna barakka'éro mutarimai matu ri wanuwa iya nawéréngngékko Puwangnge, situru sibawa jancin-Na lao ri néné-nénému.

¹⁴ Polé risininna bangsaé ri linoé, dé' muwi séddi lolongeng barakka makkuwamani tabbollompollonna pada-pada iko. Polé ri iko maneng sibawa polé ri olokolo'mu dé' muwi séddi manang.

¹⁵ Nalinrungiko matu Puwangnge polé ri sininna lasaé sibawa ripabélai polé ri sininna abalaé iya musabbingngé ri Maséré, iyakiya iyaro sining abalaé Napatakkennai matu lao risining balimmu.

¹⁶ Tungke' bangsa iya nabbéréyangngé Puwang Allataalamu ri laleng akuwasammu harusu'i mupabbinasa; aja' muwappaitang paressé babuwa lao ri mennang. Aja' musompai déwata-déwatana mennang, nasaba iyaro pangkaukengngé mappapoléi acilakang lao ri iko.

¹⁷ Naullé mappikkiri'ko iyaro bangsa-bangsaé lebbi battowai jumellana angkanna dé' mulléi paddésu'i mennang.

¹⁸ Iyakiya aja' mumétau lao ri mennang; éngngerangngi aga napogau' Puwang Allataalamu lao ri arung Maséré sibawa sininna ra'ya'na.

¹⁹ Engngerangngi sining abala maseroé iya alémué sabbingngi, sining anu makalallaingngé, sibawa awatangeng battowaé iya nakkégunangngé Puwang Allataalamu untu' paleppe'ko. Makkuwatoro Puwang Allataalamu tinda matu lao ri sininna bangsaé iya muwétauriyé.

²⁰ Mala Puwang Allataalamu paompo matu alippung ri yelle'na mennang, angkanna sining tau iya mullééngngi lari sibawa mallekke'é cappu towi matu.

²¹ Jaji aja' mumétau lao ri bangsa-bangsaéro. Puwang Allataalamu linrungiko. Aléna iyanaritu Allataala iya marajaé sibawa maseroé.

²² Iyaro bangsa-bangsaé Napaddésu'i taccéddé-céddé ri yolomu. Dé' nawedding mupaccappu mennang masitta, kuwammengngi aja' natattamba olokolo masekkangngé namancaji ancamang lao ri alému.

²³ Makkuwaniro Puwang Allataalamu mabbéréyangngi matu sining balimmu lao ri iko. Napakacaui matu mennang angkanna binasa.

²⁴ Nabbéréyangngi matu sining arunna mennang lao ri iko. Muwunoi matu mennang, nariyallupai matu asenna mennang. Dé' muwi séddi tau mulléi tahang moloiko; mupaccappu manengngi matu.

²⁵ Tunui dato'-dato' barahala iya nasompaé mennang. Aja' muwacinnaiwi péra' iyaré'ga ulaweng iya maddeppéé ri aléna sibawa aja' muwalai untu' alému. Rékko muwajjalékkaiwi iyaro paréntaé matéko matu, saba' Puwang Allataalamu nabenci assompang dato'-dato' barahalaé.

²⁶ Aja' mutaro séuwa dato'-dato' barahala ri lalempolamu, kuwammengngi tanro iya kennaéngngi aja' nakenna tokko. Iyaro gau'é harusu'i mubenci sibawa muwita mariyawa, nasaba natanroi Puwangnge.”