ULANGENG 5 - KITTA KAREBA MADECENG

Seppulo Paréntana Allataala

¹ Napaddeppungenni Musa sininna bangsa Israélié, nainappa makkeda lao ri mennang, “Saudara-saudara, éngkalingai hukkung-hukkung iya uwéréngngékko essoéwé. Agguruiwi iyaro hukkung-hukkungngé, enrengngé turusiwi sibawa matinulu.

² Ri Bulu Sinai Puwang Allataalata mébbu séuwa assijancing,

³ tenniya bawang sibawa toriyolota, iyakiya sibawa idi maneng kuwaé.

⁴ Polé ri apié ri yasé'na buluéro Puwangnge maélo mabbicara sibawa iko.

⁵ Iyakiya nasaba métauko lao ri apié sibawa dé' mubarani tuppuiwi bulué, nautettong iyaro wettué ri pallawangemmu sibawa Puwangnge untu' palettukekko ada-adanna Puwangnge.

⁶ Puwangnge mappallebbangengngi, ‘Iyya'na Puwang Allataalamu iya tiwiékko massu polé ri Maséré, onrommu ripowata.

⁷ Aja' mumassompa déwata-déwata laing. Iyya'na bawang musompa.

⁸ Aja' muwébburengngi alému dato-dato iya pappadaiyéngngi agi-agi iya engkaé ri langié, ri linoé iyaré'ga ri laleng uwai ri yawana linoé.

⁹ Aja' musompai dato'-dato' makkuwaéro, nasaba Iyya Puwang Allataalamu na dé' umaélo ripappadai sibawa muwi aga. Sining tau iya benciyékka Uhukkungngi narapi ri wija-wijanna iya matellué sibawa maeppaé.

¹⁰ Iyakiya Uwappaitangngi pammasé-Ku lao ri massebbu-sebbu assossoreng polé risining tau iya pojiyékka sibawa turusiwi parénta-Ku.

¹¹ Aja' muteppui asek-Ku sibawa sembarangang, saba' Iyya, Puwang Allataalamu, hukkungngi nigi-nigi iya makkégunang salaéngngi asek-Ku.

¹² Pakarajai esso Saba'é sibawa pakalebbii selaku esso iya mapaccingngé, saba' Iyya'na Puwang Allataalamu iya mapparéntangngéngngi lao ri iko.

¹³ Uwérékko enneng esso untu' mappallaung,

¹⁴ iyakiya esso mapitué iyanaritu esso appésaungeng iya ripallaingngé untu' Iyya, Puwang Allataalamu. Iyaro essoé dé' muwi séddi tau wedding mappallaung, muwi iko, ana'-ana'mu, ata-atammu, olokolo'mu iyaré'ga tau laing iya monroé ri wanuwammu. Harusu'i mappésau ata-atammu pada-pada muto alému.

¹⁵ Engngerangngi, makkedaé iko riyolo ripowatato ri Maséré, nainappa ripamaradéka ri Puwang Allataalamu sibawa awatangeng iya battowaé. Rimakkuwannanaro Uparéntakko untu' pakarajai esso Saba'é.

¹⁶ Pakalebbii sibawa piyarai ambo' sibawa indo'mu; iyanaro paréntaku, Puwang Allataalamu, kuwammengngi musaléwangeng sibawa malampé umuru ri wanuwa iya Uwéréngngékko matu.

¹⁷ Aja' muwabbuno.

¹⁸ Aja' mumalaweng.

¹⁹ Aja' muwénnau.

²⁰ Aja' muwabbéré asabbing bellé-bellé lao ri tau laingngé.

²¹ Aja' muwacinnaiwi appunnangenna tau laingngé: bolana, tanana, bainéna, ata-atanna, olokolo'na, kaleddé'na iyaré'ga agi-agi iya nappunnaiyé.’

²² Iyanaro parénta-parénta iya nabbéréyangngé Puwangnge lao ri iko wettummu maddeppungeng ri bulué. Wettunna mabbicara sibawa sadda maddalenrungngé polé ri apié sibawa ellung makkompe'é, nabbéréyangngi sining paréntaéro, sibawa tenniya laingngé. Nainappa naoki ri iya duwa pépeng batué nanawérékka.”

Métauna tau Israélié

²³ “Wettunna malluwa maneng bulué sibawa méngkalingako sadda polé ri pettangngé, sininna pamimping sukummu sibawa tomariyolona masyaraka'é laoni ri iyya.

²⁴ Makkedai mennang, ‘Puwang Allataalata pura mappaitangngi arajan-Na sibawa alebbiren-Na wettunna riyéngkalingai mabbicara polé ri apié. Iyaé essoé purani risabbing makkedaé mémeng makkulléi rupatauwé tette'i tuwo, namuni purai Allataala mabbicara lao ri aléna.

²⁵ Iyakiya magi naharusu'ki mappésonangngi nyawatasi? Iyaro api maseroé napaccappuki matu! Mateppe'ki makkedaé matéki matu rékko riyéngkalingai Puwang Allataala mabbicarasi.

²⁶ Engkaga naengka tolinoé tette tuwo purana naéngkalinga Allataala iya tuwoé mabbicara polé ri apié.

²⁷ Rimakkuwannanaro obbii Musa, éngkalingai sininna iya napowadaé Puwang Allataalata, nainappa palettukekki aga iya Napowadaé lao ri alému. Maéloki méngkalingai sibawa turusiwi.’

²⁸ Naéngkalinganaro, makkedani Puwangnge lao ri iyya, ‘Purani uwéngkalinga aga iya napowadaé bangsaéro, sibawa tongengngi adanna mennang.

²⁹ Coba rékko mennang tuli mappérasa makkuwairo! Coba rékko mennang tuli napakalebbika sibawa turusiwi sininna parénta-Ku, angkanna mennang sibawa wija-wijanna saléwangengngi untu' mannennungeng!

³⁰ Laono makkekkuwangngé sibawa suroi bangsaéro lisu ri kémana tungke'-tungke'.

³¹ Iyakiya iko, Musa, lisuno sibawa onrono kuwaé silaong Iyya. Maélo-Ka mpérékko sininna hukkuk-Ku sibawa parénta-Ku. Pagguruwangngi mennang, kuwammengngi naturusiwi ri wanuwa iya Uwéréngngéngngi mennang.’

³² Saudara-saudara, turusiwi sibawa matinulu sininna iya napparéntangngé Puwang Allataalamu lao ri iko. Aja' muwajjalékkaiwi muwi séddi polé ri parénta-paréntaéro.

³³ Pogau'ni sininna napparéntangngé Puwang Allataalamu lao ri iko kuwammengngi musaléwangeng sibawa mulléi mattette ri wanuwa iya maéloé muwonroi.”