ULANGENG 4 - KITTA KAREBA MADECENG

Musa sorongngi Israéllié kuwammengngi namapato

¹ Namakkeda Musa lao ri bangsaéro, “Apatoiwi sininna hukkung iya upagguruwangngékko, kuwammengngi weddikko tuwo narapi muwonroi tana iya maéloé nabbéréyang Puwangnge, Allataalana toriyolomu, lao ri iko.

² Aga uwapparéntang, aja' naritamba iyaré'ga narikurangi muwi céddé. Apatoiwi parénta-paréntana Puwang Allataalamu iya uwéréngngékko.

³ Alému mitai aga napogau' Puwang Allataalamu ri Bulu Péor. Tungke' tau iya sompaéngngi Baal Napabbinasai ri onrongngéro,

⁴ na iko iya tette'é matinulu lao ri Puwang Allataalamu tuwo mupi lettu makkekkuwangngé.

⁵ Iya manennaro hukkungngé upagguruwakko pada-pada iya napparéntangngé Puwang Allataalaku. Apatoi manengngiro ri wanuwa iya maéloé muwattamaki sibawa monroiro.

⁶ Pogau'i iyaro sibawa matinulu. Rékko mupogau'i makkuwa, mannessai apanrémmu ri bangsa-bangsa laingngé. Rékko naéngkalingai mennang passalenna hukkung-hukkungngéro, makkedai matu, ‘Temmaka panréna sibawa accana bangsa iya battowaéro!’

⁷ Bangsa battowa nigana mappunnai déwata iya makkuwaémmani cawé'na rékko riyapparelluwangngi pada-pada Puwang Allataalata macawé lao ri idi? Mappébaliwi uppa-uppanna tamangobbi méllau tulung ri Aléna.

⁸ Sibawa bangsa battowa nigana iya mappunnaiyé hukkung-hukkung iya makkuwaémmani adélé'na pada-pada hukkung-hukkung iya upagguruwangngékko essoéwé?

⁹ Pénessaiwi sibawa éngngerangngi madécéd-décéng, kuwammengngi sillampé umuru'mu dé' muwallupaiwi aga pura alému sabbingngi. Curitangngi lao ri ana'-eppomu

¹⁰ passalenna essoéwé, wettummu tettong ri yolona Puwang Allataalamu ri Bulu Sinai. Iyaro wettué Aléna makkeda lao ri iko, ‘Paddeppungengngi bangsaéro. Macinna-Ka mennang méngkalingai aga maélo Upalettu, kuwammengngi nagguru mennang mapato lao ri Iyya sillampe umuru'na, sibawa kuwammengngi mennang napaggurui ana'-ana'na untu' mapato lao ri Iyya.’

¹¹ Curitangngi lao ri ana'-ana'mu pékkugiko polé sibawa tettong ri ponna bulu iya nasalipuriyé rumpu mapettang pada-pada ellung makkumpe'é sibawa apinna malluwa lettu ri langié.

¹² Nappa Puwangnge mabbicara lao ri iko polé ri api sibawa muwéngkalinga saddan-Na, iyakiya dé' muwitai Aléna muwi ri laleng bentu' aga.

¹³ Kuwaniro Nappallebbangngeng lao ri iko aga harusu mupogau' untu' rupaiwi assijancing iya Naébbué sibawa iko. Seppulo parénta iya puraé Naoki ri iya duwa pépeng batuéro harusu'i mupogau'

¹⁴ Puwangnge suroka mappagguruwangngi lao ri iko sininna hukkung iya harusu'é muwapatoi ri wanuwa iya muwattamakiyé matti sibawa monroiro.”

Papparéngngerang kuwammengngi aja' nassompa déwata laing

¹⁵ “Engngerangngi madécéd-décéng! Wettunna mabbicara Puwangnge lao ri iko polé ri laleng apié ri Bulu Sinai, dé' aga-aga muwita.

¹⁶ Jaji jagaiwi kuwammengngi aja' narapiko madosa nasaba muwébburengngi alému dato'-dato' untu' risompa ri laleng rupa muwi aga, worowané iyaré'ga makkunrai,

^17-18 manu'-manu' iyaré'ga balé, olokolo makkalolo iyaré'ga olokolo laingngé.

¹⁹ Aja' mumadosa nasaba musompai sibawa mattumani lao ri aga iya muwitaé ri langié: mata essoé, kétengngé sibawa wéttowing-wéttowingngé. Naleppessangngi Puwang Allataalamu bangsa-bangsa laingngé sompai iyaro aga-agaé.

²⁰ Iyakiya iko iyanaritu bangsa iya ripassalama'é polé ri Maséré, onrommu manrasa-rasa sibawa masero. Natiwiko massu polé ri wanuwaéro, kuwammengngi mancajiwi bangsana muto pada-pada keadaammu makkekkuwangngéwé.

²¹ Iyakiya macayii Puwang Allataalamu lao ri iyya nasaba iko, namattanroi makkedaé dé' uwalléttoiwi matu Salo Yordan untu' muttama ri tana iya macommo'é iya maéloé nawérékko.

²² Dé'na namaitta namuwallétto sibawa tudangiwi matu tana iya macommo'éro; iyakiya iyya dé' uwaccowé, saba' matéka matu kuwaé.

²³ Engngerangngi madécéd-décéng! Aja' muwallupaiwi assijancing iya naébbué Puwang Allataalamu sibawa iko. Turusiwi paréntana; aja' sises-siseng muwébburengngi alému dato'-dato' muwi ri laleng tappa aga untu' risompa,

²⁴ saba' Puwang Allataalamu pada-padai api iya paangurengngé. Dé' namaélo ripappada-padai sibawa muwi aga.

²⁵ Makkuwatoro rékko matti maittano monro ri wanuwaéro sibawa makkéana' eppo, aja' mumadosa nasaba muwébburengngi alému dato'-dato' ri laleng muwi tappa aga. Iyaro pangkaukengngé séuwai ja ri matanna Puwang Allataalamu sibawa naébbui matu macai.

²⁶ Memmuwaré langié sibawa linoé iyaé essoé mancaji sabbi makkedaé rékko dé' muturusika, lennye'ko matu masitta polé ri tana iya muwonroiyé ri liwenna Salo Yordanro. Dé' matu mumaitta monro kuwaro; ripaccappu sisekko matu.

²⁷ Napassara-sarakko matu Puwangnge ri yelle'na bangsa-bangsa laingngé na banna céddé bawang matu ri yelle'mu iya tette'é tuwo.

²⁸ Kuwanoro matu massompa lao ri déwata-déwata iya naébbué lima tolino, déwata-déwata polé ri ajué sibawa batué iya dé'é naulléi makkita iyaré'ga maréngkalinga, dé' naulléi manré iyaré'ga marémmau.

²⁹ Namusappai matu Puwang Allataalamu, narékko musappai sibawa sukku atimmu, muruntu'i matu.

³⁰ Rékko nakennako sininna abalaéro namuengka ri laleng asukkarakengngé, lisuko matu paimeng ri Puwang Allataalamu sibawa mapato ri aléna.

³¹ Puwang Allataalamu iyanaritu Allataala iya mamasé senna'é. Dé' matu nasalaiko iyaré'ga pabbinasako, iyaré'ga mallupaiwi assijancing iya naébbué sibawa toriyolomu.

³² Salidikiwi wettu labe'é, mabéla ri wettu dé'napa mujaji, mappammulai polé ri esso wettunna Allataala pancajiwi tolinoé ri linoéwé. Sappai ri sininna tompo'na linoé. Engkaga naengka nakajajiyang gau' masero makkuwaéwé ri yolona? Engkaga tau pura méngkalingai passalenna kajajiyang makkuwaéwé?

³³ Engkaga naengka bangsa iya tette'é tuwo purana naéngkalinga séuwa déwata mabbicara lao ri mennang polé ri apié, pada-pada iya mupéneddingiyé?

³⁴ Engkaga naengka séuwa déwata iya baraniyé malai séddié bangsa polé ri bangsa-bangsa iya engkaé nainappa napancaji mennang umma ri aléna, pada-pada iya napogau'é Puwang Allataalamu untu' iko ri Maséré? Alému mitai pékkugi Allataala sibawa awatangeng iya battowaé papolé abala sibawa musu, pogau'i sining anu makalallaingngé sibawa pogau'i gau'-gau' iya maseroé.

³⁵ Iya manennaro najellokekko Puwangnge untu' pabuttiwi makkedaé banna iyaro Puwangnge Allataala, sibawa dé'gaga laingngé.

³⁶ Polé ri langié napparéngkalingangngi saddanna lao ri iko untu' pagguruko; ri linoéwé purani nappaitang lao ri iko apinna iya maseroé, sibawa polé ri apiéro mabbicarai lao ri iko.

³⁷ Nasaba napojiwi toriyolomu, napurako napilé; nasibawang akuwasanna iya battowaé purano natiwi massu polé ri Maséré.

³⁸ Bangsa-bangsa iya lebbi battowaé sibawa lebbi watangngé napaddésu'i polé ri yolomu, untu' mantara'ko lao ri wanuwanna mennang iya nawéréngngékko, wanuwa iya makkekkuwangngé mancaji appunnangemmu.

³⁹ Rimakkuwannanaro amaingekini iyaé essoé sibawa aja' muwallupaiwi: Puwangnge alé-aléna Allataala ri langié sibawa ri linoé; dé'gaga laingngé.

⁴⁰ Turusiwi sininna hukkung iya uwéréngngékko iyaé essoé, na iko sibawa wija-wijammu saléwangengngi matu sibawa matteru tuwo ri wanuwa iya nabbéréyangngé Puwang Allataalamu mancaji appunnangemmu untu' mannennungeng.”

Kota-kota allinrungengngé ri seddé alauna Salo Yordan

⁴¹ Nainappa Musa jello tellu kota ri seddé alauna Salo Yordan

⁴² mancaji kota allinrungeng, onronna tauwé naulléi passalama'i aléna rékko dé' nattungkaiwi mpunoi tau iya tenniyaé balinna. Weddingngi lari lao ri salaséddinna kotaéro kuwammengngi dé' nariyunoto.

⁴³ Untu' suku Rubén ripassadiyangengngi kota Bézer ri tanété tanréna padang kessi'é; untu' suku Gad kota Ramot ri daéra Giléad, sibawa untu' tau Manasyé kota Golan ri daéra buluna Basan.

Riwérénna bangsa Israélié hukkunna Allataala

⁴⁴ Nainappa Musa mabbéréyangngi hukkung-hukkunna sibawa peraturang-peraturanna Allataala lao ri bangsa Israélié.

^45-46 Iyaro gau'é napogau'i puranana mennang massu polé ri Maséré sibawa engka ri lompo seddé alauna Salo Yordan, siyolong sibawa kota Bét-Péor. Iyaro daéraé, daérana riyolo Sihon, arunna tau Amorié, iya mapparéntaé riyolo ri kota Hésybon. Nacaui Musa sibawa bangsa Israélié wettunna mennang massu polé ri Maséré.

⁴⁷ Natudangini mennang iyaro tanana Arung Sihon, makkuwatoro tanana Arung Og polé ri Basan, séddiwi arung Amori laing iya monroé ri seddé alauna Salo Yordan.

⁴⁸ Iyaro tanaé mallebba'i polé ri kota Aroér ri wirinna Salo Arnon, matteru limanorang lettu ri Bulu Siryon, iyanaritu Bulu Hérmon,

⁴⁹ sibawa sininna daéraé ri seddé alauna Salo Yordan liyattang narapi Tasi Maté ri ponna Bulu Pisga.