ULANGENG 34 - KITTA KAREBA MADECENG

Amaténna Musa

¹ Nanasalaini Musa tanéténa Moab nanatuppuiwi Bulu Nébo, lao ri coppo'na Pisga ri seddé alauna Yérikho. Kuwaniro Puwangnge mappaitangngi ri aléna sininna wanuwaéro, iyanaritu: Daérana Giléad limanorang sibbéla kota Dan;

² sininna daérana Naftali; daérana Efraim sibawa Manasyé, daérana Yéhuda liyajang sibbéla Tasi Tengngaé;

³ bagiyang yattanna Yéhuda sibawa tanété iya mallebbangngé polé ri Zoar lao ri Yérikho, kota iya pennoé pong karoma.

⁴ Nainappa makkeda Puwangnge lao ri Musa, “Iyanaro wanuwa Uwajjanciyangngé lao ri Abraham, Ishak sibawa Yakub untu' riyabbéréyang lao ri wijanna mennang. Upaitakko, Musa, iyakiya dé' upalaloko lao kuwaro.”

⁵ Namaténa Musa atanna Puwangnge ri tana Moab, pada-pada napowadaé Puwangnge riyolona.

⁶ Puwangnge kuburu'i riséuwaé lompo ri Moab ri liwenna kota Bét-Péor, iyakiya lettu essoéwé dé' muwi séddi tau missengngi sibawa persis kégi tampunna.

⁷ Matéi Musa ri umuru sératu duwappulo taung. Dé' natappinra awatangenna sibawa pakkitanna macakka mupa.

⁸ Nateringini bangsa Israélié Musa ri tanéténa Moab sibawa mabbarata telluppulo esso ittana.

⁹ Puwangnge pateppaiwi Yosua ana' Nun apanréng nasaba purani najello Musa mancaji passulléna. Mapatoi bangsa Israélié ri Yosua sibawa pajoppai sining parénta iya riwéréngngéngngi ri Puwangnge naolai Musa.

¹⁰ Ri Israélié dé'na gaga nabi pada-pada Musa iya mabbicaraé siyolong tappa Puwangnge.

¹¹ Dé' gaga pogau' sining mujiza'é sibawa sining makalallaingngé padanna iya napogau'é Musa lao ri wanuwa Maséré, arunna sibawa sining pejaba'na situru sibawa paréntana Puwangnge.

¹² Dé' gaga pogau' sining pangkaukeng héba'é sibawa maseroé pada-pada iya napogau'é Musa ri yolona sininna bangsa Israélié.