ULANGENG 30 - KITTA KAREBA MADECENG

Barakka'na Puwangnge untu' umma'-Na iya toba'é

¹ “Makkekkuwangngé weddikko piléi ri yelle'na barakka'é sibawa tanroé pada-pada iya upakatajangengngékko. Rékko purani mupéneddingi sininna anrasa-rasangngéro sibawa tuwo ri yelle'na bangsa-bangsa laing onrommu ripassara-sarang ri Puwang Allataalamu, muwéngngeranni matu lao ri appiléng iya uwéréngngékko.

² Rékko iko sibawa wija-wijammu maélo lisu ri Puwang Allataalamu, sibawa sukku atimmu turusiwi sining parénta-Na iya uwéréngngékko essoéwé,

³ Puwang Allataalamu mamaséiko matu. Natiwiko matu lisu polé ri bangsa-bangsa kégiko ripapassara-sarang, sibawa ripancaji madécéng paimeng.

⁴ Namuni massara-sarakko lao kégi-kégi risininna linoé, Puwang Allataalamu paddeppungekko matu sibawa tiwiko lisu.

⁵ Namuwappunnaiwi matu paimeng tana naonroiyé riyolo néné-nénému. Sibawa ripancajiko lebbi madécéng, sibawa jumellamu mabéla lebbi battowa naiya toriyolomu.

⁶ Iko sibawa wija-wijammu riwéréng matu ati iya mapatoé, angkanna muéloriwi Puwang Allataalamu sibawa sukku atimmu namulléi matteru monro ri wanuwaéro.

⁷ Sininna tanroéro Napatakkennai matu ri yasé'na sining balimmu iya benciyéngngékko sibawa tenre'ko.

⁸ Lisuko matu turusiwi Puwangnge sibawa pajoppai sininna parénta-Na iya uwéréngngékko essoéwé.

⁹ Puwang Allataalamu mébbui matu sininna usahamu papolé wassélé; mappunnaiko matu maéga ana' sibawa maéga olokolo; sining dare'mu mabbéréi matu wassélé maonaé. Masennangngi atinna Puwangnge pancajiko madécéng, pada-padato masennangngi mpéréngngi adécéngeng néné-nénému.

¹⁰ Iyakiya harusu'ko mapato lao ri Puwang Allataalamu sibawa turusiwi sininna hukkun-Na iya tarokié ri laleng kitta'éwé, kitta Hukkunna Puwangnge. Harusu'ko lisu ri Aléna sibawa sukku atimmu.

¹¹ Parénta iya uwéréngngékko dé' namawatang senna sibawa dé'to namabéla.

¹² Onronna tenniya ri langié, angkammu makkeda, ‘Nigana maélo ménré kuwaro untu' malangekki, kuwammengngi riyulléi méngkalingai sibawa turusiwi?’

¹³ Onronna tenniyato ri liweng tasi, angkammu makkutana, ‘Niga maélo lao ri liweng tasi untu' malangekki, kuwammengngi riyulléi méngkalingai sibawa turusiwi?’

¹⁴ Aja' mumakkutana makkuwaro, nasaba iyaro paréntaé macawé senna ri iko. Muwissenni sibawa muwullé mapala'i, jaji mupogau' mani bawang.

¹⁵ Iyaé essoé weddingngi mupilé ri yelle'na makessingngé sibawa majaé, atuwongngé sibawa amaténgngé.

¹⁶ Iyaé essoé uparéntakko untu' méloriwi Puwang Allataalamu sibawa mapato ri Aléna nenniya pogau'i sininna hukkung sibawa parénta-Na kuwammengngi mumadécéng sibawa mancaji bangsa iya battowaé. Puwang Allataalamu barakkakiko matu ri wanuwa iya dé'énna namaitta mutudangiwi.

¹⁷ Iyakiya rékko dé' mumapato sibawa dé' mumaélo méngkalingai, sibawa leppessangngi alému ripapusa untu' massompa déwata-déwata laing,

¹⁸ pasti ripaccappuko, sibawa umuru'mu dé' namalampé matu ri wanuwa iya dé'énna namaitta mutudangiwi. Engngerangngi! Iyaro gau'é purano upaissengi essoéwé.

¹⁹ Makkekkuwangngé weddingngi mupilé ri yelle'na atuwongngé sibawa amaténgngé, barakka'na Puwangnge sibawa tanro-Na. Langié sibawa tanaé uwobbi mancaji sabbi ri apettummu. Piléi atuwongngé.

²⁰ Eloriwi Puwang Allataalamu, apatoiwi, sibawa atinuluno ri aléna. Na iko sibawa wija-wijammu tuwoi matu sibawa malampé sunge ri wanuwa najjanciyangngé Puwangnge lao ri néné-nénému, Abraham, Ishak sibawa Yakub.”