ULANGENG 29 - KITTA KAREBA MADECENG

¹ Iyanaé ada-ada assijancing iya nasaba paréntana Puwangnge naébbui Musa sibawa bangsa Israélié wettunna mennang engka ri tana Moab. Iyaro assijancingngé sinrupai pattamba polé ri assijancing iya naébbué Puwangnge sibawa mennang ri Bulu Sinai.

Méngngerangngi paimeng akessingenna Puwangnge sibawa assijancin-Na

² Nasuroni Musa sininna tau Israélié maddeppungeng, nainappa makkeda lao ri mennang, “Alému pura mitai aga iya napogau'é Puwangnge lao ri arung Maséré, sining pajaba'na sibawa sininna wanuwanna.

³ Pura toni muwita sining abala iya maseroé, sining mujiza'é sibawa sining makalallaingngé iya napogau'é Puwangnge.

⁴ Iyakiya narapi essoéwé, dé'pa napakkulléko pahang manengngi iya mupéneddingiyéro.

⁵ Patappulo taung ittana Puwangnge pimpikko molai padang kessi'é, namuni pakéyammu sibawa sandala'mu dé' namancaji malusa.

⁶ Dé' muwappunnai roti untu' inanré, uwai anggoro iyaré'ga énungeng maseri untu' riyénung, iyakiya Puwangnge mabbéréyangngi sininna iya muwapparelluwangngé kuwammengngi muwissengngi makkedaé Aléna ritu Puwang Allataalamu.

⁷ Na wettutta lettu ri onrongngéwé, Arung Sihon polé ri Hésybon sibawa Arung Og polé ri Basan polé musuriki. Iyakiya ricaui mennang.

⁸ Risittaiwi mennang tanana naritawaingengngi suku Rubén, Gad sibawa sibagiyang suku Manasyé.

⁹ Nasitinajako matinulu turusiwi sininna assijancingngéwé, kuwammengngi mupapolé wassélé ri laleng sininna usahamu.

¹⁰ Iyaé essoé tettong manekko ri yolona Puwang Allataalamu, sininna kapala sukué, tomariyoloé, parawiraé, sininna worowané,

¹¹ makkunraié, ana'-ana'é sibawa sininna tau laing iya monroé ri yelle'mu sibawa bantuko mappolo aju nenniya mallémpa uwai.

¹² Puwang Allataalamu mébbu assijancing sibawa iko, sibawa maddeppungeng manekko kuwaé untu' siyoi iyaro assijancingngé enrengngé tarimai kewajibang-kewajibanna.

¹³ Nasibawang assijancingngéro Puwangnge pakkasse'ko iyaé essoé mancaji bangsa-Na, sibawa mancajiwi Allataalamu pada-pada iya Najjanciyangngé lao ri iko sibawa lao ri néné-nénému Abraham, Ishak sibawa Yakub.

¹⁴ Iyaro assijancingngé silaong sininna kewajibanna naébbui Puwangnge tenniya sibawa iko bawang,

¹⁵ iyakiya sibawa tungke' tau iya essoéwé tettong kuwaé, ri yolona Puwang Allataalata, sibawato wija-wijatta ri wettu mangoloé.”

Addimonrinna atemmatinulurengngé lao ri Puwangnge

¹⁶ “Muwéngngerang mupi pékkugi totota ri Maséré sibawa pékkuguki mallaleng molai wanuwanna bangsa-bangsa laingngé.

¹⁷ Purani muwita dato'-dato' barahalana mennang iya mappakaciddi-ciddi'é polé ri ajué, batué, péra'é sibawa ulawengngé.

¹⁸ Jaji jagaiwi aja' narapii muwi séddi tau ri yelle'mu, worowané iyaré'ga makkunrai, kaluwarga iyaré'ga suku iya tettongngé kuwaé, balé'i polé ri Puwang Allataalata untu' massompa ri déwata-déwatana bangsa laingngé. Iyaro pangkaukenngé pada-padai ure' iya tuwoé mancaji tanet-taneng mapai sibawa makkéracungngé.

¹⁹ Ri yelle'mu iya méngkalingayéngngi tuntutang iya matedde'éro aja' naengka mappikkiri makkedaé tette'i matu makessing totona, namuni matedde atiwi maccowériwi élona muto. Iyaro gau'é napabbinasa manekko matu, sining tau iya majaé iyaré'ga iya makessingngé.

²⁰ Dé' naddampengengngi matu Puwangnge tau makkuwaéro. Sibalé'na nakennai matu caina Puwangnge iya malluwa-luwa'é, sibawa sininna abala iya tarokié ri laleng kitta'éwé kennai matu, narapi ripabbinasa ri Puwangnge.

²¹ Puwangnge pancajiwi matu séddi conto untu' sininna suku Israélié, enrengngé hukkungngi sibawa tanro iya riteppué ri laleng assijancing iya tarokié ri laleng kitta'éwé, kitta Hukkunna Puwangnge.

²² Ri esso ri munri wija-wijammu sibawa tau laingngé ri wanuwa mabélaé mitai matu sining abalaé sibawa anrasa-rasang iya napapolé Puwangnge ri yasé'na wanuwammu.

²³ Sining dare'mu mancajiwi matu padang makabuttué tattongko balérang sibawa pejjé. Dé' nawedding ritanengi tanana sibawa wellaé dé' namaélo tuwo kuwaro. Wanuwammu sinrupai matu kota-kota Sodom sibawa Gomora, Adma sibawa Zéboim iya napaccappué Puwangnge wettunna malluwa-luwa cai-Na.

²⁴ Nakkutana matu sininna linoé, ‘Magi napogau'i Puwangnge makkuwaéro sibawa wanuwanna mennang? Aga saba'na Namacai masero makkuwaro?’

²⁵ Na pappébalinna iyanaritu, ‘Nasaba nassakkarengngi mennang assijancinna Puwangnge, Allataalana néné-nénéna mennang, assijancing iya naébbué sibawa mennang wettunna natiwi massu polé ri Maséré.

²⁶ Mattumaniwi mennang lao ri déwata-déwata laing iya dé'é naissengngi, padahal nattéyang Puwangnge mennang sompai déwata-déwataéro.

²⁷ Iyanaro saba'na namacai Puwangnge lao ri umma'-Na sibawa papoléngengngi wanuwanna mennang sininna abala iya tarokié ri laleng kitta'éwé.

²⁸ Mabbettui caina Puwangnge sibawa masero, na ri laleng cai-Na iya battowaé Nabébbui bangsa Israélié polé ri tanana mennang sibawa maggenrungengngi mennang lao ri wanuwa laingngé angkanna mennang engka kuwaro.’

²⁹ Engka siyagangngaré passaleng iya narahasiyakangngé Puwang Allataalata; iyakiya hukkun-Na purani Napannessa lao ri idi, na idi sibawa wija-wijatta harusu'i turusiwi untu' mannennungeng.”