ULANGENG 28 - KITTA KAREBA MADECENG

Barakka untu' tau iya mapatoé

¹ “Rékko muturusiwi Puwang Allataalamu sibawa matinulu pogau'i sininna parénta iya uwéréngngékko iyaé essoé, napancajiko matu bangsa iya tarompoé ri linoé.

² Turusiwi Puwang Allataalamu, nariwérékko matu sininna barakka'éwé:

³ Ribarakkakiwi kota-kotamu sibawa sining dare'mu.

⁴ Ribarakkakiko, angkanna maéga ana'mu, wassélé tanamu maonai sibawa saping nenniya bémbé bimbala'mu maégai.

⁵ Ribarakkakiwi éngngalang gandommu nenniya inanré iya muwébbué polé ri gandongngéro.

⁶ Ribarakkakiwi sininna usahamu.

⁷ Rékko rigasako, Puwangnge matu caui balimmu. Nagasako matu mennang secara taratoro', iyakiya lariwi sibawa tassiya-siya.

⁸ Puwang Allataalamu matu barakkakiwi usahamu sibawa lisekiwi sining lappomu sibawa gandong. Nabarakkakiko matu ri wanuwa iya Nawéréngngékko.

⁹ Rékko muturusiwi Puwang Allataalamu sibawa pogau'i sininna parénta-Na, napancajiko matu umma'-Na, pada-pada iya Najjanciyangngé.

¹⁰ Nasininna bangsaé ri linoé naitai matu makkedaé iko bangsa napiléna Puwangnge, sibawa naétauriko matu mennang.

¹¹ Riwérékko matu maéga ana'. Maégai matu olokolo'mu sibawa wassélé tanamu maonai ri wanuwa iya Najjanciyangngé Puwangnge lao ri néné-nénému untu' Nawérékko.

¹² Napateppai matu Puwangnge bosié ri wettunna polé ri onrong attaronna iya maonaé ri langié. Nabarakkakiwi matu sininna usahamu, angkanna weddikko mappainreng lao ri maéga bangsa, iyakiya iko dé' naparelluko minreng.

¹³ Puwang Allataalamu pancajiko matu pamimping ri yelle'na bangsa-bangsaé, tenniya ana' guru. Rékko matinuluko turusiwi sininna paréntana Puwangnge iya nawéréngngékko iya essoéwé, pédé madécékko matu sibawa dé' naengka musoro.

¹⁴ Iyakiya aja' sises-siseng muwallupaiwi iyaro parénta-paréntaé sibawa muwi cara maga. Aja'to mumassompa sibawa mattumani lao ri déwata-déwata laingngé.”

Addimonrinna atemmapatongngé

¹⁵ “Iyakiya rékko dé' muturusiwi Puwang Allataalamu, sibawa dé' mumatinulu pogau'i sininna paréntana sibawa hukkun-Na iya uwéréngngékko essoéwé, sininna iyaé tanroé nakennako matu:

¹⁶ Tattanroi kota-kotamu sibawa sining dare'mu.

¹⁷ Tattanroi éngngalang gandommu sibawa inanré iya muwébbué polé ri gandongngéro.

¹⁸ Tattanroko, angkanna banna céddé bawang ana'mu, wassélé tanamu nenniya saping sibawa bémbé bimbala'mu.

¹⁹ Tattanroi sininna usahamu.

²⁰ Rékko mupogau'i iya majaé sibawa sampéyangngi Puwangnge, papoléi matu abala, akacaungeng sibawa asukkarakeng ri laleng sininna iya mupogau'é, angkanna ri laleng wettu maponco'é bawang ripaccappu sisekko.

²¹ Sisullé-sullé lasaé kennako matu, angkanna paccappurenna dé' muwi séddi tau polé ri iko monro mupa ri wanuwa iya mutudangiyéro.

²² Puwangnge hukkukko matu sibawa sining lasa lélé-lélé, boro-boro sibawa semmeng. Papoléi matu timo sibawa anging iya paangurengngé angkanna masolang éngngalammu. Iyaro sining abalaé nakennaro matteru gangkammu binasa.

²³ Dé' nateppa matu bosié sibawa matedde'i matu tanamu pada-pada bessié.

²⁴ Dé' napateppai matu Puwangnge bosi uwai, sangadinna bosi awu sibawa kessi angkanna cappuko binasa.

²⁵ Rékko dé' muturusiwi Puwang Allataalamu, Naébbuko matu ricau risining balimmu. Maggasako matu secara taratoro', iyakiya lariwi sibawa tassiya-siya. Sininna bangsaé ri linoé métaui matu mitai acilakammu.

²⁶ Rékko matéko, mancajiwi ujumu inanréna sining manu'-manu'é sibawa olokolo masekkangngé, nadé'gaga rukkai iyaro olokolo'é.

²⁷ Nahukkukko matu Puwangnge sibawa sining lettang pada-pada iya Napogau'é lao ri tau Maséré'é. Pennoi matu watakkalému sibawa lo mannana nenniya puru-puru iya makate'é, iyakiya dé'é gaga pabburana.

²⁸ Naébbuko matu Puwangnge jangeng, buta sibawa malippu.

²⁹ Makkapése'ko matu ri lakessoé pada-pada tau butaé, iyakiya dé' nalolongeng laleng. Sininna usahamu dé' wassélé'na matu. Matteru-teruko ritenre sibawa rirampo, nadé'gaga mattulung.

³⁰ Rékko dé' muturusiwi Puwang Allataalamu, iyaé gau'é nakennai matu alému: Mattunangakko matu, iyakiya tau laingngé kawingiwi tunangammu. Patettokko matu bola, iyakiya dé' muwonroiwi. Mutanengiwi matu palla anggoro'é iyakiya dé' muwanréi buwa-buwana.

³¹ Rigéréi matu sapimmu ri yolona matammu, iyakiya dé' muwanréi jukuna. Muwitai matu sining kaleddé'mu ririmpa lao sibawa dé'na naripalisu matu. Riyabbéréyangngi matu sining bimbala'mu lao risining balimmu nadé'gaga mattulung.

³² Riyabbéréyangngi matu ana'-ana'mu selaku ata lao ri tau laingngé ri yolona matammu. Esso-esso mapessé matammu sappai ana'-ana'mu, iyakiya siya-siya bawang, saba' dé' nalisuna matu mennang.

³³ Bangsa laingngé matu malai sininna wassélé tana iya mulolongengngé sibawa majjama ladde, iyakiya alému dé' agaga mulolongeng ri lainnaé ritenre matteru-teru sibawa riyabeccoki.

³⁴ Jangekko matu nasaba aga iya mupéneddingiyé.

³⁵ Puwangnge matu mébbui ajému penno sibawa lo mannana iya mapeddié sibawa dé' nawedding majjappa; polé ri ajé lettu ri ulué pennoko matu sining lettang.

³⁶ Iko sibawa arummu natiwiko matu Puwangnge ri wanuwa laing iya dé'é muwissengngi sibawa dé'to naissengngi néné-nénému. Mattumaniko matu kuwaro lao ri déwata-déwata iya riyébbué polé ri ajué sibawa batué.

³⁷ Ri wanuwa-wanuwa onrommu napassara-sarang Puwangnge, masélengngi matu sining tauwé mitako; naéllé-kéllé'ko matu sibawa nacawa-cawaiko mennang.

³⁸ Maéga biné muwampo, iyakiya céddé wassélé mulolongeng, nasaba tanet-tanemmu cappui nanré incalé.

³⁹ Mutanengiwi matu sining palla anggoro'é sibawa mupiyarana, iyakiya dé' mucéppu buwa anggoro iyaré'ga ménungngi uwai anggoro'na, nasaba iyaro sining pong anggoro'é cappui nanré ule.

⁴⁰ Ri sininna wanuwammu tuwoi pong zaitungngé, iyakiya madduttungngi matu sining buwana, angkanna dé'na mulolongengngi minnya'na.

⁴¹ Lolongekko matu ana'-ana' worowané sibawa makkunrai, iyakiya riyalai mennang selaku tawangeng musu, angkanna ateddéngekko mennang.

⁴² Sininna ajukajummu sibawa tanet-tanemmu cappui matu nanré béré-béré.

⁴³ Tau laing iya monroé ri wanuwammu pédé makuwasai matu, na akuwasammu pédé kurangngi.

⁴⁴ Mappunnaiwi mennang dowi untu' napainrengiko, iyakiya dé' muwappunnai agaga untu' riyappainrengeng lao ri mennang. Na angkanna nakuwasaiko mennang.

⁴⁵ Sininna iyaro abalaé nakennako matu sibawa matterui gangguko angkammu binasa, nasaba dé' muturu' lao ri Puwang Allataalamu sibawa dé' mupogau'i hukkung-hukkung iya Nawéréngngékko.

⁴⁶ Iyaro sining abalaé selaku butti polé ri pahukkungenna Puwangnge lao ri iko sibawa wija-wijammu untu' mannennungeng.

⁴⁷ Purano ribarakkaki ri Puwang Allataalamu ri laleng sininna gau'éro, iyakiya dé' mumaélo mattumani ri Aléna sibawa ati iya masagénaé sibawa marennu.

⁴⁸ Rimakkuwannanaro harusu'ko mattumani lao risining balimmu iya nasuroé Puwangnge untu' méwako. Makkadérekko matu, madekka sibawa mallusu-lusu nenniya akurangeng ri laleng sininna gau'éro. Puwangnge matu tenre'ko sibawa mabecco narapiko binasa.

⁴⁹ Séuwa bangsa iya dé'é mupahangngi basana maélo napapolé Puwangnge polé ri cappa linoé untu' méwako. Pada-pada kuwajangngé naséro'ko matu mennang.

⁵⁰ Mabecco mennang sibawa dé' namamasé lao ri tau macowaé iyaré'ga ana'-ana'é.

⁵¹ Napaccappui matu mennang olokolo'é sibawa wassélé tanamu, sibawa dé' natarongekko gandong, uwai anggoro, minnya zaitung iyaré'ga saping sibawa bémbé bimbala'mu narapi matéko alupureng.

⁵² Naluruiwi matu mennang tungke' kotaé ri wanuwa iya nawéréngngékko Puwang Allataalamu angkanna maruttung témbo'-témbo'na iya matanré sibawa ripakkasse'é iya muwattuwangngéro.

⁵³ Ri wettunna sining balimmu keppungngi kota-kotamu, pettu paddennuwakko matu nasaba makkadéreng, angkanna muwanréi ana'-ana'mu, ana'-ana' iya nawéréngngékko Puwang Allataalamu.

^54-55 Mala muwi arung iya kaminang makessingngé akkalenna pettu paddennuwangngi matu ri wettu akkeppungengngéro, angkanna nanréi ana'-ana'na nasaba dé' gaga inanré laing. Muwi céddé dé'to nawéréngngi silessurenna iyaré'ga bainéna iya napojiyé iyaré'ga ana'-ana'na iya tuwoé mupa.

^56-57 Mala makkunrai arung iya kaminang makessingngé akkalenna sibawa iya sugi senna'é angkanna dé' naengka naharusu mallaleng, pogau' towi makkuwaéro. Wettunna balié keppungngi kotaé, iyaro makkunraié pettu paddennuwangngi matu nasaba akkadérengngé, angkanna massubbu-subbui manréi ana'na iya nappa jajiyé sibawa érunna. Muwi céddé dé'to nawéréngngi lakkainna iya napojiyé iyaré'ga ana'-ana'na.

⁵⁸ Rékko dé' mumatinulu turusiwi sininna hukkunna Puwang Allataalamu iya tarokié ri laleng kittaéwé sibawa dé' mupakalebii Allataalamu iya marajaé sibawa mappahérangngé,

⁵⁹ Puwangnge matu papoléi ri yasé'mu sibawa wija-wijammu sining lasa iya dé'é nawedding ripajjappa sibawa sining sai iya dé'é nariyullé pappajai.

⁶⁰ Sining lasa mappakatau-taué iya musabbingngé ri Maséré kennako matu, nadé' mulléi majjappa.

⁶¹ Papolé towi matu Puwangnge maddupa-rupang lasa sibawa sai iya dé'é nariteppu ri laleng kitta'éwé, kitta Hukkunna Puwangnge. Nainappako ripabbinasa matu.

⁶² Namuni jumellamu singngégani wéttowingngé ri langié, banna céddé bawang ri yelle'mu iya tuwoé mupa, nasaba dé' mumatinulu lao ri Puwang Allataalamu.

⁶³ Pada-pada masennanna Puwangnge mabbéré adécéngeng lao ri iko sibawa tambaiwi jumellamu, masennangngi matu pabbinasai sibawa paccappuko. Ribébbuko matu polé ri wanuwa iya dé'énna namaittana mutudangiwi.

⁶⁴ Puwangnge passara-sarakko matu ri yelle'na bangsa-bangsaé ri sininna linoé. Kuwaro sompako matu déwata-déwata iya riyébbué polé ri ajué sibawa batué, déwata-déwata iya dé'e muwissengngi sibawa dé'to naissengngi néné-nénému.

⁶⁵ Ri yelle'na bangsa-bangsaéro dé' mulolongeng matu atennangeng, sibawa dé'to gaga onrong iya weddingngé muteppu appunnangemmu; Puwangnge mébbuko matu bata-bata senna sibawa pettu paddennuwang.

⁶⁶ Tuli naancangngi bahaya atuwommu. Esso wenni masélekko sibawa métau maté.

⁶⁷ Wettummu mita agi-agi maddumba'i aromu nasaba métau. Ri élékéléé muwaddennuwangiwi wennié, sibawa ri wennié muwaddennuwangiwi éléé.

⁶⁸ Puwangnge kirikko matu lisu ri Maséré sibawa kappala, namuni purai napowada makkedaé dé'na mulisu matu kuwaro. Makkuragako matu kuwaro balu'i alému selaku ata lao ri balimmu iyakiya dé' muwi séddi tau maélo melliko.”