ULANGENG 25 - KITTA KAREBA MADECENG

¹ Ebara'na duwa tau Israél lao ri pengadilangngé untu' mapparakara, nainappa iya séddié ripannessani dé' napasala, na laingngé pasala.

² Rékko iya pasalaé ripateppaiwi pahukkungeng pabbabba, harusu'i hakingngé suroi makkanroppang. Egana pabbabba taggattungngi polé ri ja iya puraé napogau',

³ iyakiya dé' nawedding naliweng wékkapatappulo. Rékko naliwengngi, bettuwanna iyaro tauwé ripakatunai ri yolona tau maégaé.

⁴ Aja' mungongngi pannyoro'na saping iya maddése gandongngé.”

Kewajibangngé lao ri séddié silessureng iya maté

⁵ “Rékko sining tau iya massilessurengngé sionrongngi, nasala séddinna polé ri mennang maté tessalai séddi ana' worowané, jandana dé' nawedding kawing sibawa tau laingnge ri saliwenna kaluwargana lakkainna. Silessurenna tau iya matéro waji' kawingiwi iyaro jandaé.

⁶ Ana' worowané macowana mennang harusu'i riyangga ana'na silessurenna iya matéro, kuwammengngi nappunnai wija ri yelle'na bangsa Israélié.

⁷ Rékko iyaro tauwé dé' namaélo kawingiwi bainéna silessurenna, iyaro makkunraié harusu'i lao mangolo ri tomariyolona kotaé sibawa makkeda, ‘Ipaku dé' namaélo pogau'i kewajibanna mpéréngngi silessurenna séddi wija ri yelle'na bangsa Israélié.’

⁸ Nainappa sining tomariyolona kotaé harusu mobbii iyaro tauwé namabbicara sibawa aléna. Rékko tette'i dé' namaélo,

⁹ harusu'i bainéna silessurenna maddeppériwi ri yolona sining tomariyolona kotaé, reddui sandala'na iyaro tauwé, mamméccuiwi rupanna sibawa makkeda, ‘Makkuwaiyé harusu rigaukengngi tau iya dé'é namaélo mpéréngngi wija silessurenna.’

¹⁰ Kaluwargana iyaro tauwé riissengngi matu ri Israélié selaku ‘Kaluwarga tau iya rireddu'é sandala'na.’ ”

Peraturang-peraturang laingngé

¹¹ “Rékko duwa worowané mattengngang mallaga, na bainéna iya séddié makkuragai duwangngi lakkainna sibawa rekko'i katawanna balinna lakkainna,

¹² rette'i limanna iyaro makkunraié sibawa aja' mukasiyangiwi.

^13-14 Aja' mupabengnguwang sibawa paké timbangeng nenniya ola' iya dé'é natongeng.

¹⁵ Pakéi timabangeng sibawa ola' iya tongengngé kuwammengngi mumalampé sunge ri wanuwa iya nawéréngngékko Puwang Allataalamu.

¹⁶ Nacéccé Puwang Allataalamu tau iya pojiyéngngi pabengnguwang.”

Parénta untu' mpunoi tau Amalé'é

¹⁷ “Engngerangngi pékkugi tau Amalé'é gaukekko wettummu ri laleng allalengengngé massu polé ri Maséré.

¹⁸ Dé' namétau mennang ri Allataala sibawa gasako polé ri munri wettummu mattengngang poso sibawa acappureng pakkulléng, nainappa nauno sininna taummu iya sipanrasa-rasaé joppa ri munri.

¹⁹ Rimakkuwannanaro, rékko purano nawéréng Puwang Allataalamu iyaro wanuwaé sibawa amanno polé risininna balié iya monroé mattulilingiko, sininna tau Amalé'éro harusu'i muwuno angkanna mennang dé' nariyéngngeranna. Aja' muwallupaiwi!”