ULANGENG 23 - KITTA KAREBA MADECENG

Tau iya dé'é nauttama umma'na Puwangnge

¹ “Tau iya puraé rilase' iyaré'ga iya rirette katawanna dé' nawedding mancaji anggota umma'na Puwangnge.

² Tau iya jajiyé ri saliwenna annikkangngé sibawa sininna wija-wijanna lettu iya maseppuloé, dé' nawedding mancaji anggota umma'na Puwangnge.

³ Tau Amongngé sibawa Moab-é nenniya wija-wijanna mennang lettu iya maseppuloé dé' nawedding mancaji anggota umma'na Puwangnge,

⁴ nasaba dé' namaélo mennang mpérékko inanré sibawa uwai wettummu ri laleng allalengengngé massu polé ri Maséré. Mala mennang napéssaroiwi Biléam, ana' Béor polé ri kota Pétor ri Mésopotamia, untu' tanroiko.

⁵ Iyakiya dé' namaélo Puwang Allataalamu méngkalingai Biléam. Sibalé'na napinrai iyaro tanroé mancaji barakka, nasaba Namaséiko.

⁶ Gangka tuwomu sibawa lettu mannennungeng, aja' mutulungngi iyaro bangsa-bangsaé iyaré'ga mébbui mennang madécéng.

⁷ Aja' muwita mariyawai tau Edongngé nasaba silessuremmu mennanro. Aja'to muwita mariyawai tau Maséré'é, nasaba purako monro ri wanuwanna mennang.

⁸ Mappammulai ri assossoreng matellué sibawa matteru ri wija-wijanna mennang weddingngi mancaji anggota umma'na Puwangnge.”

Jagaiwi apaccingenna akkémanna tentaraé

⁹ “Wettummu mattengngang mammusu, harusu'ko niniriwi sininna séuwa-séuwaé iya pancajiyékko najisi'.

¹⁰ Rékko séddié tau mancaji najisi'i nasaba passui manning ri wettu matinrona, harusu'i nasalai akkémangngé sibawa monro ri saliweng.

¹¹ Muttama'nana arawéngngé harusu'i cemmé sibawa wettunna labu essoé weddinni lisu ri akkémangngé.

¹² Harusu'ko passadiya onrong ri saliwenna akkémangngé untu' majjambang.

¹³ Rékko maéloko lao kuwaro, tiwiko ri lainnaé muwapparelluwangngé makkuwatoro sipolo aju untu' kali kalebbong onrong majjambang sibawa untu' tébungngi.

¹⁴ Puwang Allataalamu sibawakko ri laleng akkémammu untu' linrungiko sibawa mpérékko apakalang lao risining balimmu. Rimakkuwannanaro jagaiwi kuwammengngi natette mapaccing akkémammu. Aja' narapii engka séuwa iya dé'é nasipato ri yelle'mu, kuwammengngi dé' nasalaiko Puwangnge.”

Madduparupang peraturang

¹⁵ “Rékko séddié ata lari polé ri puwanna nainappa lao ri iko méllau allinrungeng, aja' musuroi lisu.

¹⁶ Weddingngi monro risala séddinna kotamu situru iya napilé, sibawa dé' nawedding mugaukeng sibawa matedde.

¹⁷ Séddié tau Israél, muwi worowané iyaré'ga makkunrai, dé' nawedding mancaji cakkuribang ri bola-bola assompangngé.

¹⁸ Makkuwatoro dowi iya nalolongengngé selaku wassélé accakkuribangenna dé' nawedding ritiwi ri Bolana Puwang Allataalamu untu' makkamaja tinja, saba' nabenci Puwang Allataalamu cakkuribangngé ri bola-bola assompangngé sibawa saro accakkuribangengngé.

^19-20 Rékko mappainrekko dowi lao ri tau laingngé, weddikko méllau bunga. Iyakiya rékko mappainrekko dowi iyaré'ga inanré iyaré'ga barang laing lao ri tau sibangsamu, iyaro pappainrengngé harusu'i riwéréng temmabbunga. Turusiwi iyaro paréntaé, na Puwang Allataalamu barakkakiwi sininna séuwa-séuwaé iya mupogau'é ri wanuwa iya mutudangiyé.

²¹ Rékko muwajjanciyangngi séuwaé lao ri Puwang Allataalamu, aja' mupasoro-soroi untu' rupaiwi iyaro jancié, nasaba tette'i natuntu Puwang Allataalamu, namadorakako rékko dé' murupaiwi.

²² Dé' mumadosa rékko dé' muwébbu janci lao ri Puwangnge.

²³ Iyakiya rékko macenning atiko mébbu janci lao ri Puwang Allataalamu, waji'ko rupaiwi.

²⁴ Rékko mattengngakko mallaleng molai palla anggoro'na tau laingngé, weddikko manré buwa anggoro singngéga iya muwacinnaiyé, iyakiya dé' nawedding mupaddeppungeng ri laleng bakaé.

²⁵ Rékko mattengngakko joppa molai dare gandonna tau laingngé, weddikko manré gandong iya mukabettié sibawa limammu, iyakiya dé' nawedding murette sibawa kandao.”