ULANGENG 22 - KITTA KAREBA MADECENG

¹ Rékko saping iyaré'ga bimbala appunnangenna tau sibangsamu pusa namuwitai iyaro olokolo'é, aja' muwajjaiwi temmissengngi, iyakiya tiwii iyaro olokolo'é lisu ri punnana.

² Rékko mabélai bolana punnana, iyaré'ga dé' muwissengngi niga punnana, tiwii iyaro olokolo'é ri bolamu. Rékko poléi punnana sappai, wérénni.

³ Pakkuwatowiro rékko runtu'ko sikaju kaleddé, silampa pakéyang iyaré'ga agi-agi appunnangenna sibangsamu.

⁴ Rékko sikaju kaleddé iyaré'ga saping appunnangenna tau sibangsamu menrung ri lalengngé, aja' muwajjaiwi temmissengngi, iyakiya tulungngi paoto'i iyaro olokolo'é paimeng.

⁵ Tau makkunraié dé' nawedding mappakéyang pada-pada worowané sibawa worowané dé' nawedding mappakéyang pada-pada makkunraié, saba' tau iya pogau'éngngi makkuwaéro nacéccé Puwang Allataalamu.

⁶ Rékko runtu'ko sarang manu'-manu' ri pongngajué iyaré'ga ri tanaé sibawa indo' manu'-manu'é mattengngang maddongkong ri yasé'na tellona iyaré'ga silaong ana'-ana'na, aja' muwalai indo'na iyaro manu'-manu'é.

⁷ Weddikko malai ana'-ana'na iyaro manu'-manu'é, iyakiya leppessangngi indo'na luttu, kuwammengngi mumalampé sunge sibawa tuwo madécéng.

⁸ Rékko patettokko bola, harusu'ko sappoi mattulili wiring pabbingenna. Dé' matu mutanggung jawa'i rékko engka tau sempé polé ri pabbingengngéro namaté.

⁹ Aja' mutaneng tanet-taneng laing ri palla anggoro'mu sangadinna pong anggoro. Rékko taneng tokko, dé' naweddikko malai wassélé'na iyaro dare'é, muwi polé ri anggoro'é iyaré'ga polé ri tanet-taneng laingngé.

¹⁰ Aja' mupasibaliwi sapingngé sibawa kaleddé'é riséddié rakkala.

¹¹ Aja' mupakéi pakéyang iya riyébbué polé ri wol-é sibawa lénang iya ritennungngé massibawa.

¹² Ebburengngi jombé-jombé ri iya eppa cappa pakéyammu.”

Peraturanna passalenna assisumpungenna worowané sibawa makkunraié

¹³ “Ebara'na séddié worowané kawing sibawa séddié ana' dara, narimunri dé'na nacinnaiwi.

¹⁴ Nainappa mébbu teppuwang bellé-bellé makkedaé dé'na naparawang bainéna wettunna mennang kawing.

¹⁵ Ri laleng gau'éro tomatowanna iyaro makkunraié harusu'i nala kaing bottinna iya engkaé baté darana, iya pabuttiyéngngi makkedaé ana'na mennang iyaro wettué perawang mupi. Iyaro kaingngé harusu'i mennang nappaitang lao risining tomariyolona kotaé ri pengadilangngé.

¹⁶ Ambo'na iyaro ana'daraé harusu'i makkeda lao ri mennang, ‘Purani uwabbéréyang ana'ku lao ri tauwéwé mancaji bainéna, iyakiya makkekkuwangngé dé'na nacinnaini.

¹⁷ Mébbui teppuwang bellé-bellé sibawa makkeda makkedaé bainéna tenniyana perawang wettunna mennang kawing. Iyakiya iyaé buttinna makkedaé ana'ku wettuéro perawang mupi. Pénessaiwi baté daraé ri kaing bottinnaé!’

¹⁸ Sining tomariyolona kotaé harusu'i mobbii iyaro tau worowané sibawa barasa'i.

¹⁹ Harusu towi mennang dendai sératu dowi péra' sibawa mabbéréyangngi iyaro dowié lao ri matuwanna, nasaba purai nasolangi alebbirenna séddié makkunrai Israél. Nainappa iyaro makkunraié harusu'i tette mancaji bainéna, sibawa dé' nawedding ripassarang gangka tuwona.

²⁰ Iyakiya ébara'na iyaro teppuwanna tongengngi sibawa dé' gaga buttinna makkedaé iyaro bainéna perawang mupi wettunna kawing,

²¹ iyaro makkunraié harusu'i ritiwi ri sumpang bolana tomatowanna. Ri onrongngéro sining tau worowané polé ri kotaéro harusu'i genrungngi sibawa batu gangka maté. Iyaro makkunraié purani napogau' séuwa iya pakasiriéngngi bangsata nasaba kédosalai ri wettu dé'napa nakawing ri wettu monrona mupa ri bolana ambo'na. Ri laleng rihukkunna mupallennye'i iyaro jaé.

²² Rékko séddié worowané ripoléi kédo sala sibawa bainéna tau laingngé, harusu'i rihukkung maté iya duwa. Nanallalengiro mupallennye'i iyaro jaé.

²³ Ebara'na ri laleng kota séddié tau worowané ripoléi kédo sala sibawa séddié ana'dara iya mattunangangngénna sibawa tau laingngé.

²⁴ Ri laleng gau'éro harusu'i mennang ritiwi ri saliweng kota narigenrung batu gangka maté. Iyaro ana'daraé harusu'i riyuno nasaba dé' nagora méllau tulung, na iyaro gau'é kajajiyangngi ri laleng kota, iya weddingngé riyéngkalinga gorana. Sibawa iyaro tau worowané harusu'i riyuno nasaba nakédosalaiwi ana'dara iya mattunangangngénna. Ri laleng hukkungngi iya duwa, mupallennye'i iyaro jaé.

²⁵ Iyakiya laing gau'na rékko ri dare'é séddi tau worowané kédosalaiwi séddié ana'dara iya mattunangangngénna sibawa tau laingngé. Ri laleng gau'éro banna worowané harusu'i rihukkung maté.

²⁶ Iyaro ana'daraé dé' nawedding riyagaga nasaba dé' napogau' séuwa iya siratangngé rihukkung maté. Iyaro parakaraé pada-padai parakara séddié tau iya luruiyéngngi tau laingngé sibawa mpunoi.

²⁷ Iyaro akédongeng salaé kajajiyangngi ri dare'é, sibawa muni iyaro ana'daraé gorai méllau tulung, iyakiya dé' gaga polé tulungngi.

²⁸ Ebara'na séddié tau worowané ripoléiwi kédosalaiwi séddié ana'dara iya dé'éppa namattunangang.

²⁹ Ri laleng gau'éro harusu'i nawaja lao ri ambo'na iyaro ana' daraé lise kawing angke'na limappulo dowi péra'. Iyaro ana' daraé harusu'i mancaji bainéna nasaba ripassai kédosala, sibawa gangka tuwona dé' nawedding natelle.

³⁰ Dé' séddi tau wedding cella-cellai ambo'na sibawa lusérengngi sala séddinna bainéna ambo'na.”